“Mi Laikim Pasin Bilong Em Long Strongim Bel”
GÜNTER GRASS, em wanpela man Jemani i save raitim ol buk na i bin winim Prais Nobel bilong raitim ol buk long 1999, em i raitim wanpela buk i stori long em yet long 2006. Long dispela buk, em i stori long taim ol i tokim em long insait long wanpela lain bilong Jemani em ol i lukautim ol man long taim bilong pait. Em i stori tu long wanpela man i bin mekim sampela samting na i bin kirapim em tru, na dispela samting i bin i stap long tingting bilong em winim 60 yia. Em wanpela man husat i bin sanap strong long bilip bilong em taim ol i mekim nogut long em.
Wanpela nius (Frankfurter Allgemeine Zeitung) i bin givim askim long Grass na nius i tok, Grass i tingim gen dispela man husat i no laik insait long pait. Grass i tok olsem dispela man “i no laik sapotim kain kain tingting, maski em i tingting bilong wanpela lain Nazi, o Komiunis, o Soselis. Em i wanpela Witnes Bilong Jehova.” Grass i no inap tingim nem bilong dispela Witnes, tasol Grass i kolim em, Mipela-i-no-save-mekim-kain-samting-olsem. Sampela lain Witnes Bilong Jehova i mekim wok painimaut na ol i kisim save olsem nem bilong dispela man em Joachim Alfermann. Ol i bin paitim em planti taim na semim em nogut tru, na bihain ol i putim em i stap wanpis long rum kalabus. Tasol Alfermann i stap strong yet na i no laik holim ol samting bilong pait.
Grass i tok: “Mi laikim pasin bilong em long strongim bel na karim hevi, na mi askim mi yet olsem: Olsem wanem em inap karim hevi na sanap strong long olgeta dispela samting? Na em i mekim olsem wanem?” Ol i strong tru long bagarapim pasin bilong Aflermann long i stap gut long God, tasol em i bin karim hevi na sanap strong, na long Februeri 1944 ol i salim em i go long ples kalabus nogut long Stutthof. Em i lusim kalabus long Epril 1945, na em i stap laip yet taim pait i pinis na em i stap gutpela Witnes Bilong Jehova i go inap long taim em i dai long 1998.
Alfermann em i wanpela bilong 13,400 Witnes—long Jemani na long ol narapela kantri em Nazi i bin kisim—em ol i bin mekim nogut long ol, long wanem, ol i holim strong bilip bilong ol. Ol i bihainim tok bilong Baibel, na i no insait long wok politik na i no laik insait long pait. (Matyu 26:52; Jon 18:36) Inap olsem 4,200 Witnes i bin i stap long ol kalabus nogut na 1,490 i bin lusim laip bilong ol. Long nau tu, dispela pasin bilong ol long karim hevi na sanap strong i kirapim tru planti man husat i no holim wankain bilip olsem ol. Tasol ol i amamas long pasin bilong ol dispela Witnes long sanap strong.
[Piksa long pes 32]
Joachim Alfermann