Amamas Long ‘Winim Pait Wantaim Pikinini Sipsip’
LONG wanpela pas em Carey W. Barber i bin raitim long 1971, em i stori long ol wok bilong God em i bin mekim insait long 50 yia na em i tok: “Ol wok bilong Jehova mi mekim insait long ol dispela yia i bin gutpela tru. Pasin bilong bung wantaim lain bilong em; pasin bilong em long lukautim mi long ol man nogut bilong dispela graun em Satan i bosim; tingting long winim pait wantaim Pikinini Sipsip, Jisas Krais; na ol samting i kamapim klia pasin laikim bilong Jehova, olgeta dispela samting i givim mi bel isi na dispela i lukautim bel bilong mi na helpim mi long wet long winim laspela pait long bihain.”
Bihain long sikspela yia, Brata Barber, em wanpela Kristen God i bin makim, em i kirap mekim wok olsem wanpela memba bilong Gavening Bodi Bilong Ol Witnes Bilong Jehova. Taim em i mekim dispela wok insait long 30 yia, em i wok yet long wetim taim bilong “winim pait wantaim Pikinini Sipsip.” Em i bin inapim dispela wok, taim em i stap gut long God i go inap long em i dai long Sande, Epril 8, 2007, taim em i gat 101 krismas.—1 Korin 15:57.
Mama i karim Carey Barber long Inglan long 1905, na em i kisim baptais long 1921, long Winnipeg, Kanada. Tupela yia bihain em wantaim twins brata bilong em, Norman, i go sindaun long Brooklyn, New York, bilong helpim wanpela nupela wok. Long dispela taim, ol lain bilong Jehova i laik kirap long wokim ol buk bilong ol yet bilong autim gutnius bilong Kingdom “long olgeta hap bilong graun.” (Matyu 24:14) Pastaim Brata Barber i save mekim wok long wanpela masin bilong prinim ol liklik nius samting. Wanpela samting dispela masin i prinim em ol pepa i gat ol tok bilong kamapim long Suprim Kot Bilong Amerika. Bihain, Brata Barber i wok long Dipatmen Bilong Wok Autim Tok, moa yet long ol wok bilong kongrigesen na bilong autim tok long olgeta hap bilong kantri.
Brata Barber i save gut long ol dispela wok, olsem na long 1948 ol i makim em olsem wanpela wasman raun. Em i save raun long ol kibung na ol kongrigesen long olgeta hap bilong wes bilong Yunaitet Stets. Em i tok olsem em i amamas long raun na mekim wok bilong autim tok. Long rot bilong dispela asainmen planti bratasista i save long Brata Barbar. Pasin bilong em long kisim kwik save na givim bel long wok autim tok i helpim em taim em i go long namba 26 klas bilong Wastaua Baibel Skul Bilong Gileat. Long taim ol i skul, em i bungim Sydney Lee Brewer bilong Kanada, em tu i bilong dispela klas. Bihain long gretiuesen tupela i marit na ol i go mekim wok bilong lukautim ol kongrigesen long hap bilong Chicago, Illinois. Insait long 20 yia, taim tupela i raun wantaim long mekim wok sekit, Sista Barber i stap olsem gutpela poroman na em i save strongim Brata Barber long olgeta taim.
Ol lain husat i bin bungim Brata Barber na i save long em taim em i mekim wok olsem wasman distrik o wasman sekit o insait long 30 yia em i bin wok na raun olsem wanpela memba bilong Gavening Bodi, ol bai tingim yet ol gutpela tok em i save mekim. I gat as tru na yumi ken amamas long em i “winim pait wantaim Pikinini Sipsip.”