Ripot Long Wok Bilong Kingdom
Tok i Tru Bilong Baibel i Helpim Man Long Lusim Lotu Bilong Lain Tumbuna
SAMPELA man i strong tru long bihainim lotu bilong lain tumbuna bilong ol. Planti milion manmeri i pilim olsem i no stret sapos ol i senisim lotu bilong ol. Pastaim Sol, bihain em i kamap aposel Pol, em i gat dispela kain tingting. Em i tok: “Mi strong tumas long bihainim pasin bilong ol tumbuna bilong mi, na long dispela pasin mi mekim mi bin winim pasin bilong planti bilong ol yangpela man bilong ol Juda ol i wanlain wantaim mi.” Tasol taim em i kisim save long tok i tru, em i lusim lotu Juda na kamap wanpela Kristen. (Galesia 1:13-16) Planti manmeri long nau ol i bin kisim save olsem God yet i as bilong ol tok bilong Baibel, em i no tok bilong ol tumbuna. Long kantri Itali tok i tru bilong Baibel i bin helpim wanpela meri long lusim lotu em lain tumbuna bilong em i bin holim strong. Kaunim stori hia:
Wanpela meri i tok: “Mitupela sister bilong mi i gat planti bratasusa na famili bilong mipela i strong long bihainim lotu bilong lain tumbuna bilong mipela, em lotu Katolik. Mipela i givim bel tru long lotu Katolik. Mi go bikpela na mi marit. Taim man bilong mi i dai, inap planti yia mi stap wanpis na lukautim ol pikinini bilong mi. Pikinini meri bilong sister bilong mi em i wanpela katekis, na em i save givim planti askim long pris long ol tok bilong Baibel, tasol pris i no bekim gut ol askim bilong em.
“Wanpela taim mi go long asples na mi bungim ol Witnes Bilong Jehova long namba wan taim na mi orait long ol i stadi wantaim mi. Ol poroman Katolik bilong mi bilong bipo ol i tok bilas long mi, long wanem, mi stadi long Baibel. Tasol dispela samting i no pasim mi long stadi. Long namba wan taim mi gat Baibel bilong mi yet na mi no laik lusim. Sister bilong mi tu i kirap givim bel long Jehova. I no longtaim, inap 18 mun samting, na mitupela i kisim baptais.
“Taim mi kirap lusim lotu Katolik, mi krai, long wanem mi tingting planti long lusim ol pasin bilong lotu mi bin bihainim inap 76 yia pinis. Tasol nau mi amamas long bihainim rot Jehova i makim, na mi wok long helpim ol narapela long lusim tudak bilong spirit!”—Lukim 1 Pita 2:9.
Man Bilong Katim Gras Bilong Ol Man Em i Stretim Tingting
Wanpela man bilong Japan em i wok bisnis long katim gras bilong ol man. Taim em i mekim dispela wok bilong em, em i save toktok wantaim ol man long wok bilong ol spirit nogut na ol kain samting olsem. Tasol taim em i kirap long stadi long Baibel, em i save dispela pasin bilong em i no gutpela. Olsem na taim em i katim gras bilong ol man em kirap singautim ol i kam sindaun wantaim em na lainim tok bilong Baibel. Em i save toktok wantaim ol yangpela man long God i bin wokim ol samting. Long olgeta wik em i tokim Witnes i stadi wantaim em long kisim planti Baibel na buk Yu Inap i Stap Oltaim long Paradais long Graun i kam bambai em i ken tilim long ol man em i katim gras bilong ol.
Em i no kamap Witnes yet, tasol insait long namba wan yia em i stadi, em i bin tilim 30 Baibel na 30 buk Stap Oltaim long ol man. Inap olsem 25 man i harim tok em i autim long ol na ol i kirap long stadi. Sampela taim inap olsem 10-pela man i sindaun wantaim em taim Witnes i kam stadi wantaim em. Nau 7-pela man em i bin autim tok long ol taim em i katim gras bilong ol, ol i bin stretim tingting kranki bilong ol na ol i kisim baptais na kamap Witnes Bilong Jehova!