Kisim Tingting Bilong God Long Ol Samting
LONG Septemba 14, 2002, i gat gutpela san long New York, long Amerika. Long dispela de, 6,521 manmeri bilong ol narapela narapela kantri i kam bung long Ediukesen Senta long Patterson na long tupela narapela haus bilong ol Witnes Bilong Jehova long dispela hap. Ol manmeri i bung bilong lukim gretiuesen bilong klas namba 113 bilong Wastaua Baibel Skul Bilong Gileat. Ol sumatin i kam long 14 kantri na insait long 5-pela mun i go pinis, ol i bin wok long kisim save long ol samting bilong mekim wok misineri long 19 kantri ol bai go long en.
Carey Barber i gat 97 krismas na em wanpela memba bilong Gavening Bodi bilong ol Witnes Bilong Jehova, em i mekim wok siaman long dispela program. Em i stori long wok Skul Gileat i mekim klostu 60 yia nau na i bin helpim planti tausen long mekim wok misineri. Brata Barber i tok: “I gat as tru na yumi ken tok planti gutpela samting i bin kamap taim dispela lain i skul na kisim sampela save moa. Long olgeta hap bilong graun, planti handet tausen man i gat pasin daun i dediketim laip bilong ol long Jehova na ol i kirap bihainim lotu i tru na ol i mekim wok holi bilong em, long wanem, ol misineri i bin skul gut i helpim ol.”
Paslain long ol sumatin i go long Skul Gileat, planti bilong ol i bin kamapim amamas bilong ol long mekim bikpela wok moa bilong autim tok. Tupela marit i bin skul winim wanpela yia long lainim tok ples Saina bambai ol i ken autim tok long bikpela lain manmeri bilong Saina i stap long ples bilong ol long Kanada. Narapela tupela marit i kirap lainim tok ples Albenia long laik bilong ol yet na bihain ol i bin go long Albenia bilong helpim planti manmeri long dispela hap em ol i laik kisim save long Baibel. Sampela narapela long dispela klas bilong Gileat ol i bin kam long Hangari, Guatemala, na Ripablik Dominika, em ol kantri ol i bin go long en bilong mekim wok long hap i sot long ol tisa bilong Tok Bilong God.
Paslain long ol i go long ol asainmen bilong ol long Afrika, Isten Yurop, Sentral na Saut Amerika, na long hap bilong Is—ol sumatin i harim ol tok bilong strongim ol long tingim God long olgeta wok ol i mekim.
Kisim Tingting Bilong God Long Ol Samting
Bihain long tok bilong kirapim bung, Brata Barber i singautim Maxwel Lloyd, em wanpela memba bilong komiti bilong brens bilong Amerika. Em i mekim wanpela tok nem bilong en, “Kisim Tingting Bilong Jehova Long Ol Samting.” Brata Lloyd i kamapim stori bilong Devit na Pikinini bilong God, em Jisas. (1 Samuel 24:6; 26:11; Luk 22:42) Bihain long em i kirapim ol sumatin long tingim olsem stadi bilong Baibel ol i bin mekim inap faipela mun i bin helpim ol long kisim tingting bilong God long ol samting, em i askim ol: “Taim yupela i mekim Baibel-stadi wantaim ol manmeri long nupela asainmen bilong yupela, bai yupela i helpim ol long skelim tingting bilong God long ol samting?” Na long pasin bilong givim sampela tok bilong helpim narapela, em i tokim ol sumatin olsem: “No ken tok, ‘Long tingting bilong mi, o Mi ting . . . ’ Nogat. I gutpela moa long helpim ol narapela long save long tingting bilong God. Taim yupela i bihainim dispela pasin, bai yupela i stap olsem wanpela gutpela blesing long ol lain em yupela i wok wantaim ol long dispela asainmen bilong yupela.”
Bihain long dispela, Gerrit Lösch i mekim tok, em wanpela memba bilong Gavening Bodi. Em i mekim tok “Mi Stap Wantaim Yu,” na em i stori olsem planti taim Jehova i tokim ol gutpela wokboi bilong em olsem, “Mi stap wantaim yu.” (Stat 26:23, 24; 28:15; Josua 1:5; Jeremaia 1:7, 8) Long nau tu, yumi ken i gat wankain bilip long Jehova sapos yumi stap gut long em. Brata Lösch i tok: “Yu tingting planti olsem bai yu no inap painim ol manmeri bilong stadi wantaim ol long Baibel? Tingim, Jehova i tok, ‘Mi stap wantaim yu.’ Yu save tingting planti nogut yu bai sot long sampela samting bilong skin? Jehova i tok: ‘Bai mi no lusim yu. Bai mi no larim yu i stap nating. Nogat tru.” ’ (Hibru 13:5) Bilong pinisim tok, Brata Lösch i kirapim ol sumatin long tingim tok promis Jisas i mekim olsem em bai stap wantaim ol gutpela disaipel bilong em long wok bilong ol long kamapim disaipel.—Matyu 28:20.
“Bai Yu Kisim Bel Isi Taim Kain Kain Traim i Painim Yu?” Em tok bilong Lawrence Bowen, wanpela tisa bilong Skul Gileat. Em i tok olsem ol bikpela tok i bin kamap long Iden i as na hevi i painim ol man i laik lotuim Jehova wanpela tasol na sampela taim ol bikpela traim i painim ol. Brata Bowen i strongim ol sumatin long bihainim pasin bilong Jisas—em i bin bilip strong long Jehova na dispela i givim bel isi tru long em na em i karim ol bikpela hevi Jehova i larim em long karim bilong skulim em long pasin bilong bihainim tok. (Hibru 5:8, 9) Yumi ken tok piksa long Jehova em i olsem man i kukim gol long paia bilong rausim pipia bilong en, em bai skelim stret hat bilong paia bilong rausim ol samting i no klin. Tasol bilip em ol traim i kukim olsem paia, i save helpim man moa yet, winim gol em paia i mekim i kamap klin tru. Bilong wanem yumi tok olsem? Brata Bowen i tok “Long wanem, strongpela bilip i ken karim olgeta kain hevi, na em i helpim yumi long sanap strong ‘inap long las de.” ’—Matyu 24:13.
Mark Noumair, em narapela tisa bilong Skul Gileat, em i kamapim wanpela askim: “Bai Yu Stap Olsem Man Ol Narapela i Laikim?” As tok bilong em i kam long 1 Samuel 2:26, dispela ves i stori long Samuel na tok: “Bikpela wantaim ol man i laikim em.” Taim em i skelim pinis pasin bilong Samuel, Brata Noumair, em i winim 10-pela yia long mekim wok misineri long Afrika, em i tok: “Yu tu i ken kamap man Jehova i laikim sapos yu stap gut long wok God i givim yu long mekim. Em i givim gutpela wok misineri long yu.” Bihain Brata Noumair i strongim ol sumatin long tingim dispela asainmen bilong ol olsem wanpela wok holi God i givim ol na ol i mas kisim tingting bilong God na mekim dispela wok bilong ol.
Taim ol sumatin i stap long Skul Gileat, ol i gat rot long bungim planti man long Sarere Sande bilong ol i ken autim tok long “ol strongpela wok bilong God” olsem i stap long Baibel. (Aposel 2:11) Na tu, ol inap autim tok long ol dispela samting long 10-pela narapela narapela tok ples. Wallace Liverance, em narapela tisa bilong Skul Gileat, em i givim askim long sampela sumatin na ol i kamapim ol ekspiriens bilong ol long hap bilong program i stori long “Ol Strongpela Wok Bilong God i Kirapim Bel Bilong Ol Man Long Mekim Wok.” Brata Liverance i tok: “Long de Pentikos Spirit Holi i kirapim ol lain i stap long rum antap long tokaut long ‘ol strongpela wok bilong God.’ Na long nau tu Spirit Holi i helpim olgeta gutpela wokboi bilong God.” Sampela i laik autim tok long planti manmeri moa, olsem na ol i lainim ol nupela tok ples.
Gutpela Tok Bilong Helpim Ol Long Kisim Tingting Bilong God Long Ol Samting
Bihain long ol tok bilong kirapim program, Gary Breaux na William Young, tupela i mekim wok long brens-ofis long Amerika, ol i toktok wantaim ol brata bilong ol narapela narapela komiti bilong brens bilong ol kantri i gat ol misineri long en, na tu, ol i toktok wantaim tupela marit em ol i mekim wok misineri inap 41 yia pinis. Wanpela tok ol i mekim em olsem: “Ol misineri i no tingting long kisim planti gutpela samting bilong skin ol i save stap longpela taim. Ol i putim tingting bilong ol i go long mekim wok em ol i kam long mekim. Ol i save ol i bin kam bilong autim tok na helpim ol manmeri long save long Jehova.”
David Splane, em narapela memba bilong Gavening Bodi, em i pinisim dispela program wantaim dispela tok “Yupela i No Go Longwe!” Ol dispela 46 sumatin ol bai salim ol i go long ol narapela hap bilong graun, olsem na yumi laik save wanem insait bilong dispela tok bilong em? Em i stori gut olsem: “Maski yu stap long wanem hap bilong dispela graun, oltaim bai yu stap long haus bilong Jehova sapos yu stap gut long em.” Yes, olgeta Kristen i stap gut long God, maski ol i stap long wanem hap, ol i mekim wok insait long wanpela hap bilong tempel spirit o haus bilong God em i kamap long taim Jisas i kisim baptais long taim bilong ol aposel. (Hibru 9:9) Dispela i mekim gut bel bilong ol manmeri i stap long dispela gretiuesen, ol i amamas long save olsem Jehova i stap klostu long olgeta gutpela wokboi bilong em i stap long graun! Wankain olsem Jehova i bin tingim Jisas taim em i stap long graun, Em i tingim yumi olgeta na ol wok yumi mekim long Em, maski yumi stap long wanem hap. Olsem na long samting bilong lotu, yumi no stap longwe long ol narapela na long Jehova na Jisas.
Bihain long ol i kamapim ol gude ol narapela i stap long ol narapela hap bilong graun i salim i kam, na ol i toksave long ol asainmen bilong ol sumatin, na ol i ritim wanpela pas em klas i raitim bilong tok tenkyu long gutpela skul ol i bin kisim long Gileat, orait siaman i pinisim program. Em i strongim ol nupela misineri long mekim yet gutpela wok bilong ol na amamas long mekim wok bilong Jehova.—Filipai 3:1.
[Blok long pes 23]
Ol SAMTING BILONG OL SUMATIN
Hamas kantri ol i kam long en: 14
Hamas kantri ol bai go long en: 19
Hamas sumatin: 46
Krismas bilong ol, averes: 35.0
Hamas yia long tok i tru, averes: 17.2
Hamas yia long wok painia, averes: 13.7
[Piksa long pes 24]
Klas Namba 113 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.