Was Gut Long Pasin Bilong Yu Long ‘Skulim Gut Ol Man’

‘Yu mas autim tok, givim strongpela tok long ol bilong sutim bel bilong ol na bilong kirapim ol long tanim bel, na oltaim yu mas isi long ol na skulim ol gut.’​—2 TI. 4:​2.

1. Jisas i givim wanem wok long lain bilong em? Olsem wanem em i stap olsem gutpela piksa?

JISAS i bin mekim gutpela wok tru long oraitim ol sikman taim em i mekim wok bilong em long graun, tasol ol man i no tingim em olsem man bilong oraitim ol sik o man bilong wokim ol mirakel, nogat, ol i tingim em olsem wanpela tisa. (Mk. 12:19; 13:1) Wok bilong autim gutnius bilong Kingdom Bilong God em i nambawan bikpela wok bilong Jisas, na em i nambawan bikpela wok bilong lain bilong em long nau. Ol Kristen i gat wok long mekim yet wok bilong kamapim ol disaipel long rot bilong skulim ol man long bihainim ol tok bilong Jisas.​—Mt. 28:​19, 20.

2. Yumi mas mekim wanem bilong inapim wok bilong yumi long autim tok?

² Bilong inapim wok bilong yumi long kamapim ol disaipel, oltaim yumi mas traim long mekim wok tisa bilong yumi i kamap gutpela moa. Taim aposel Pol i raitim pas long wanwok bilong em, Timoti, em i kamapim klia olsem em i bikpela samting long skulim gut ol man. Em i tok: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Ti. 4:16) Pol i no tingting long pasin bilong givim save tasol long ol man. Nogat. Ol Kristen i mekim gut wok tisa, ol i putim tok i go daun long bel bilong ol man na i kirapim ol long senisim pasin bilong ol. Dispela em i wanpela pasin yumi mas i gat save long mekim. Orait, olsem wanem yumi ken kisim pasin bilong ‘skulim gut ol man’ taim yumi autim gutnius bilong Kingdom Bilong God long ol narapela?​—2 Ti. 4:​2.

Kisim Pasin Bilong ‘Skulim Gut Ol Man’

3, 4. (a) Olsem wanem yumi ken kisim pasin bilong ‘skulim gut ol man’? (b) Olsem wanem Skul Tiokratik Bilong Autim Tok i helpim yumi long kamap gutpela tisa?

³ Wanpela dikseneri i tok, pasin bilong mekim gut wanpela wok em samting man i kisim long rot bilong stadi, na traim traim, na lukim gut pasin bilong ol narapela i mekim dispela wok. Yumi mas tingim gut dispela tripela samting bambai yumi ken kamap gutpela tisa bilong gutnius. Bilong kisim stretpela save long wanpela samting yumi laik lainim, yumi mas stadi long dispela samting na beten. (Ritim Song 119:​27, 34.) Taim ol pablisa husat i mekim gut wok tisa i skulim narapela, yumi ken lukim pasin ol i bihainim na dispela i helpim yumi long lain long pasin bilong ol na bihainim. Na sapos oltaim yumi traim traim long bihainim save yumi bin kisim, dispela bai helpim yumi long mekim gut moa wok tisa.​—Lu. 6:40; 1 Ti. 4:​13-​15.

⁴ Jehova em i Nambawan Bikpela Tisa. Long rot bilong oganaisesen bilong em long graun, em i givim tok long ol wokman bilong em long olsem wanem ol i mas mekim wok bilong ol long autim tok. (Ais. 30:​20, 21) Olgeta kongrigesen i gat Skul Tiokratik Bilong Autim Tok long olgeta wik, em dispela skul i helpim olgeta i insait long en long kamap gutpela man bilong autim tok bilong Kingdom Bilong God. Nambawan buk bilong dispela skul em Baibel. Baibel i tokim yumi long ol samting yumi mas skulim ol man long en. Na tu, em i soim wanem pasin bilong skulim man i wok gut na i stret. Long Skul Tiokratik Bilong Autim Tok yumi harim planti taim olsem bai yumi kamap gutpela tisa moa sapos ol tok yumi lainim ol man long en i kam long Baibel, na sapos yumi mekim ol gutpela askim, mekim ol tok i no hatwok long kisim, na tingim tru sumatin. Orait nau yumi ken skelim ol dispela wan wan samting. Bihain long en bai yumi skelim olsem wanem yumi ken putim tok i go daun long bel bilong sumatin.

Ol Tok Yumi Mekim i Mas Kam Long Baibel

5. Wanem samting i mas i stap olsem as bilong ol tok yumi skulim ol man long en? Bilong wanem i olsem?

⁵ Jisas, nambawan tisa i winim olgeta narapela tisa, em i kisim ol tok em i lainim ol man long en long Baibel. (Mt. 21:13; Jo. 6:45; 8:17) Em i no kamapim ol tok bilong em yet, nogat, em i kamapim ol tok bilong dispela Man i bin salim em i kam. (Jo. 7:​16-​18) Yumi bihainim dispela pasin. Olsem na Tok Bilong God i mas i stap olsem as bilong ol tok yumi mekim long ol haus o long ol Baibel stadi. (2 Ti. 3:​16, 17) Maski yumi mekim ol smatpela tok, dispela i no gat strong olsem tok bilong Baibel. Baibel i gat strong. Maski yumi wok long helpim sumatin long kisim wanem wanem tok, nambawan gutpela rot yumi ken bihainim, em yumi askim em long ritim tok Baibel i mekim long dispela samting.​—Ritim Hibru 4:12.

6. Tisa i ken mekim wanem na bai sumatin i kliagut long tok em i stadi long en?

⁶ Dispela i no makim olsem tisa Kristen i no gat wok long redim Baibel stadi. Nogat. Tisa i mas tingting gut long wanem ol skripsa em yet o sumatin bai ritim long Baibel long taim bilong stadi. Planti taim i gutpela long ritim ol skripsa i kamapim as bilong ol bilip bilong yumi. Em i bikpela samting tu long helpim sumatin long kliagut long tok bilong ol skripsa em i ritim.​—1 Ko. 14:​8, 9.

Mekim Ol Gutpela Askim

7. Bilong wanem pasin bilong mekim ol askim i gutpela rot bilong skulim sumatin?

⁷ Pasin bilong kamapim ol gutpela askim i kirapim tingting bilong sumatin na i helpim tisa long putim tok i go daun long bel bilong sumatin. Olsem na no ken kamapim mining bilong skripsa long sumatin, askim em long kamapim mining bilong en long yu. Ating sampela taim yu mas kamapim ol narapela askim o planti sotpela askim bilong helpim sumatin long kisimgut ol tok. Taim yu mekim ol askim bilong skulim sumatin, yu helpim em long kisimgut as bilong bilip, na tu, yu helpim em long em yet i ken bilip olsem dispela tok i stret.​—Mt. 17:​24-​26; Lu. 10:​36, 37.

8. Olsem wanem yumi ken save long samting i stap long bel bilong sumatin?

⁸ Bilong stadi long ol buk na nius bilong yumi, yumi save mekim ol askim na bekim. Ating i no longtaim na ol man yu stadi long Baibel wantaim ol, ol inap bekim ol askim i stap long buk long rot bilong kamapim ol tok bilong paragraf. Tasol tisa husat i laik bai tok i go daun long bel bilong sumatin, em i no laik harim tasol ol stretpela bekim. Olsem: Ating sumatin inap kamapim tok Baibel i mekim long pasin pamuk. (1 Ko. 6:18) Tasol ol askim i kirapim tingting bilong sumatin inap kamapim klia em i gat wanem tingting tru long tok em i wok long lainim. Tisa inap mekim ol dispela askim: “Bilong wanem Baibel i tambuim maritpasin em man na meri i no marit wantaim i mekim? Yu ting olsem wanem long dispela lo bilong God? Sapos man i bihainim ol lo bilong God long stretpela pasin, yu ting dispela bai helpim em?” Ol bekim bilong ol dispela askim i ken kamapim klia tingting i stap long bel bilong sumatin.​—Ritim Matyu 16:​13-​17.

Mekim Ol Tok i No Hatwok Long Kisim

9. Yumi mas tingim wanem samting taim yumi kamapim ol tok bilong Baibel long sumatin?

⁹ Planti tok i tru i stap long Baibel ol i no hatwok long kisimgut. Tasol ating ol bilip bilong lotu giaman i bin paulim tingting bilong ol man yumi stadi wantaim ol long Baibel. Em wok bilong yumi ol tisa long kamapim ol tok bilong Baibel long rot em sumatin i no hatwok long kliagut long en. Ol tisa i mekim gut wok, ol i save kamapim ol tok i no hatwok long kisim, i klia, na i stret. Sapos yumi bihainim dispela pasin, bai yumi no mekim na sumatin i hatwok long kliagut long tok i tru. No ken kamapim ol tok i no bikpela samting. I no gat wok long stori long olgeta samting bilong skripsa yumi ritim. Stori tasol long ol tok i bikpela samting bilong kamapim klia poin bilong samting yupela i stadi long en. Sumatin bai kisim save long ol strongpela tok bilong Baibel taim em i wok long kliagut moa long ol tok.​—Hi. 5:​13, 14.

10. Wanem ol samting i makim hamas paragraf bai yumi mekim long wanpela stadi?

¹⁰ Yumi mas stadi long hamas paragraf long wanpela stadi? Bilong save long dispela, tisa i mas i gat pasin bilong skelim gut ol samting. Save na sindaun bilong ol sumatin na bilong ol tisa tu i narapela narapela. Tasol oltaim yumi mas tingim olsem yumi ol tisa i laik helpim sumatin long kisim strongpela bilip. Olsem na yumi givim hap taim long em bilong em i ken ritim, kliagut, na bilip long ol tok i tru i stap long Baibel. Yumi no ken stadi long planti paragraf tumas, yumi stadi tasol inap long skel bilong em long kisim ol tok. Tasol yumi no ken stap longpela taim tumas long wanpela paragraf. Taim sumatin i kliagut long wanpela bikpela tok, orait yumi go long narapela.​—Kl. 2:​6, 7.

11. Yumi ken lainim wanem samting long pasin bilong aposel Pol long mekim wok tisa?

¹¹ Taim aposel Pol i autim gutnius long ol nupela man, em i mekim long rot i no hatwok long ol man i kisim. Em i bin go long bikpela skul, tasol em i no mekim ol strongpela tok. (Ritim 1 Korin 2:​1, 2.) Ol tok i tru bilong Baibel i no hatwok long kisim, na dispela i mekim na ol man i amamas long ol. I no olsem man i mas stap wanpela saveman bambai em i ken kliagut long tok bilong Baibel.​—Mt. 11:25; Ap. 4:13; 1 Ko. 1:​26, 27.

Helpim Sumatin Long Pilim Tru Ol Tok Em i Lainim

12, 13. Wanem samting inap kirapim sumatin long bihainim tok em i wok long lainim? Stori long dispela.

¹² Bilong wok tisa bilong yumi i ken karim gutpela kaikai, sumatin i mas pilim ol tok yumi skulim em long en. Em i mas save olsem wanem dispela tok i stret long em yet, olsem wanem tok i helpim em, na olsem wanem laip bilong em bai kamap gutpela moa sapos em i bihainim ol tok bilong Baibel.​—Ais. 48:​17, 18.

¹³ Olsem: Yumi skelim Hibru 10:​24, 25 wantaim sumatin, em dispela skripsa i save strongim ol Kristen long bung wantaim ol wanbilip bilong kisim strong long tok bilong Baibel na bilong bung wantaim ol bratasista. Sapos sumatin i no kam yet long ol miting bilong kongrigesen, yumi ken stori liklik long olsem wanem yumi save mekim ol miting na wanem kain tok i save kamap. Yumi ken tok ol miting bilong kongrigesen em hap wok bilong lotu bilong yumi na ol i save helpim yumi. Bihain long dispela, yumi ken singautim sumatin i kam long miting. Gutpela sapos laik bilong em long bihainim tok bilong Jehova i kirapim em long bihainim dispela tok bilong Baibel, na em i no tingting long amamasim man i stadi wantaim em.​—Ga. 6:​4, 5.

14, 15. (a) Ol Baibel sumatin inap kisim wanem save long Jehova? (b) Taim Baibel sumatin i kisim save long ol pasin bilong God, olsem wanem dispela inap helpim em?

¹⁴ Bikpela samting tru ol sumatin i kisim taim ol i stadi long Baibel na bihainim ol stiatok bilong en, em ol i kisim save long Jehova na i kirap laikim em tru. (Ais. 42:8) Em i gutpela Papa na Man Bilong Wokim yumi na olgeta samting long heven na graun i bilong em, tasol em i save kamapim tu ol pasin na strong na save bilong em long ol man i laikim em na i mekim wok bilong em. (Ritim Kisim Bek 34:​6, 7) Taim Moses i laik kisim lain Israel long kalabus bilong Isip, Jehova i kamapim em yet long rot bilong dispela tok: “Mi bai kamap wanem wanem kain mi laikim.” (Kis. 3:​13-​15, NW) Dispela i makim olsem Jehova bai kamap wanem wanem kain em i mas kamap bilong mekim ol samting em i tingting pinis long mekim long lain bilong em. Olsem na lain Israel i kisim save long Jehova olsem Man Bilong Kisim Bek ol, Man Bilong Pait, Man Bilong Lukautim ol, na Man Bilong Inapim ol tok promis, na em i helpim ol long ol narapela rot tu.​—Kis. 15:​2, 3; 16:​2-5; Jos. 23:14.

¹⁵ Ating ol sumatin bilong yumi bai i no kisim helpim long Jehova long rot bilong ol mirakel olsem Moses i bin kisim. Tasol taim bilip bilong ol i kamap strong na ol i pilim tru ol tok ol i lainim na ol i kirap bihainim ol dispela tok, ol bai lukim olsem ol i mas askim Jehova long strongim bel bilong ol, givim savetingting long ol, na stiaim ol. Taim ol i mekim olsem, ol tu bai kisim save long Jehova olsem Man Bilong Givim Gutpela Tingting, Man Bilong Sambai long ol, na Man Bilong Lukautim ol long olgeta samting ol i mas kisim.​—Sng. 55:22; 63:7; Snd. 3:​5, 6.

Tingim Tru Sumatin

16. Bilong wanem save bilong mekim wok tisa i no nambawan bikpela samting bilong mekim gut dispela wok?

¹⁶ Sapos yu ting yu no gat bikpela save long mekim wok tisa olsem yu gat laik long mekim, yu no ken bel hevi. Jehova na Jisas i bosim wok bilong skulim ol man i wok long kamap long olgeta hap bilong graun long nau. (Ap. 1:​7, 8; KTH 14:6) Ol i ken blesim hatwok bilong yumi bambai ol tok yumi mekim i kirapim tingting bilong man i gat gutpela bel. (Jo. 6:44) Sapos tisa i no gat bikpela save long mekim wok tisa, pasin bilong laikim tru sumatin bai inapim gut wok tisa bilong em. Aposel Pol i kamapim klia em i save olsem em i bikpela samting long laikim tru ol sumatin yumi wok long lainim.​—Ritim 1 Tesalonaika 2:​7, 8.

17. Olsem wanem yumi ken soim olsem yumi tingim tru olgeta wan wan Baibel sumatin?

¹⁷ Na olsem tasol, yumi ken kamapim pasin bilong tingim tru olgeta wan wan Baibel sumatin na lusim hap taim bilong kisim save long em. Taim yumi stadi long ol stiatok bilong Baibel wantaim em, bai yumi kisim save long sindaun bilong em. Ating bai yumi luksave olsem em i bihainim pinis sampela tok bilong Baibel em i bin lainim. Tasol long sampela narapela samting em i mas stretim yet wokabaut bilong em. Long rot bilong helpim sumatin long luksave long olsem wanem em i ken bihainim ol tok i kamap long ol Baibel stadi, yumi inap helpim em long kamap disaipel tru bilong Krais.

18. Bilong wanem em i bikpela samting long beten wantaim sumatin na kolim nem bilong em long beten?

¹⁸ Bikpela samting moa, yumi ken beten wantaim sumatin na kolim nem bilong em taim yumi beten. Em i mas luksave olsem yumi laik helpim em long save gut long Man Bilong Wokim em, go klostu long Em, na larim Em i stiaim em. (Ritim Song 25:​4, 5.) Taim yumi beten askim Jehova long blesim hatwok sumatin i mekim bilong bihainim tok em i lainim, sumatin bai luksave olsem em i bikpela samting long kamap man bilong ‘bihainim tok.’ (Jem. 1:22) Na taim sumatin i putim yau long ol beten bilong yumi, em tu bai lain long pasin bilong beten. Yumi kisim bikpela amamas tru taim yumi helpim Baibel sumatin long kisim pasin bilong pas gut wantaim Jehova!

19. Bai yumi skelim wanem samting long stadi i kamap bihain long dispela?

¹⁹ Em i strongim tru bel bilong yumi long save olsem winim 6.5 milion Witnes long olgeta hap i wok strong long kisim pasin bilong ‘skulim gut ol man,’ na ol i laik helpim ol man i gat gutpela bel long bihainim ol tok Jisas i bin givim. Wok autim tok bilong yumi i bin kamapim wanem ol samting? Bai yumi skelim bekim bilong dispela askim long stadi i kamap bihain long dispela.

Yu Inap Tingim?

• Bilong wanem ol Kristen i mas kisim pasin bilong ‘skulim gut ol man’?

• Long wanem ol rot yumi ken mekim wok tisa bilong yumi i kamap gutpela moa?

• Sapos yumi no gat bikpela save long mekim wok tisa, wanem samting i ken inapim gut wok tisa bilong yumi?

[Piksa long pes 9]

Yu insait pinis long Skul Tiokratik Bilong Autim Tok?

[Piksa long pes 10]

Bilong wanem em i bikpela samting long tokim sumatin long ritim ol skripsa long Baibel?

[Piksa long pes 12]

Beten wantaim sumatin na kolim nem bilong em long beten