Yupela Inap Tru Long Em i Bringim Yupela Long Hul Wara Bilong Laip
‘Pikinini Sipsip bai i stap wasman bilong ol. Em bai i bringim ol i go long ol hul wara bilong givim laip.’—KTH 7:17.
1. Tok Bilong God i kolim wanem tok bilong makim ol Kristen God i bin makim? Jisas i givim wanem wok long ol?
TOK BILONG God i kolim ol Kristen God i bin makim—em ol i lukautim olgeta samting bilong Krais hia long graun—olsem “wokboi i gat gutpela tingting.” Taim Krais i kam bilong skelim dispela lain “wokboi” long 1918, em i lukim ol dispela Kristen God i bin makim na ol i stap long graun, ol i stap gut long wok bilong ol long givim stretpela save bilong God long ol man long “taim bikman i makim.” Olsem na Jisas, em dispela Bikman, em i amamas long makim ol long “bosim olgeta samting bilong en.” (Ritim Matyu 24:45-47) Long dispela rot, paslain long ol Kristen God i bin makim i kisim laip long heven, ol i lukautim ol manmeri i lotuim Jehova hia long graun.
2. Stori long olgeta samting bilong Jisas.
2 Bikman i gat namba long bosim olgeta samting bilong em, na em i ken mekim wanem wanem wok em i laik mekim long ol dispela samting. Olgeta samting bilong Jisas Krais—em King Jehova i makim—em olgeta samting bilong Kingdom hia long graun. Dispela “planti manmeri tru” olsem bikpela lain em aposel Jon i bin lukim long driman, ol tu i insait long en. Jon i stori long dispela bikpela lain manmeri olsem: “Mi lukim planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos, na long han bilong ol, ol i holim ol lip bilong diwai pam.”—KTH 7:9.
3, 4. Bikpela lain bilong ol arapela sipsip i kisim wanem gutpela samting?
3 Ol manmeri insait long bikpela lain em ol manmeri Jisas i kolim olsem “ol arapela sipsip” bilong em. (Jo. 10:16) Ol i laik i stap oltaim long Paradais long graun. Ol i bilip tru olsem Jisas bai “bringim ol i go long ol hul i gat wara i kamap, em wara bilong givim laip. Na God bai i mekim drai wara bilong ai bilong ol, na ol bai i no krai moa.” Ol i tingim dispela laik bilong ol long stap oltaim long Paradais na ol i “wasim ol klos bilong ol long blut bilong Pikinini Sipsip, na ol klos i kamap waitpela.” (KTH 7:14, 17) Ol i bilip long ofa bilong Jisas, olsem na long ai bilong God ol i pasim ol ‘waitpela klos.’ Na God i kolim ol stretpela man na pren bilong em, wankain olsem Abraham.
4 God i kolim bikpela lain bilong ol arapela sipsip olsem stretpela manmeri, olsem na ol i ken tingting long abrusim bagarap taim God i pinisim olgeta pasin nogut bilong dispela graun long taim bilong bikpela hevi tru. (Jem. 2:23-26) Ol inap pas gut wantaim Jehova, na olsem wanpela lain olgeta, ol inap abrusim bagarap long taim bilong Armagedon. (Jem. 4:8; KTH 7:15) Ol i no tingting long bosim ol yet, nogat, ol i amamas long mekim wok aninit long King i stap long heven na ol brata bilong en long graun.
5. Olsem wanem bikpela lain i helpim ol brata bilong Krais em God i bin makim?
5 Lain bilong Satan i bin birua long ol Kristen God i bin makim na ol i birua yet long ol. Maski i olsem, ol dispela Kristen i ken bilip olsem ol poroman bilong ol, em bikpela lain manmeri, bai helpim ol. Namba bilong ol Kristen God i bin makim i liklik tru, tasol long olgeta yia namba bilong bikpela lain i wok long i go antap inap planti handet tausen. Ol Kristen God i bin makim ol i no inap stap long olgeta wan wan bilong 100,000 kongrigesen Kristen na lukautim ol. Olsem na wanpela rot ol arapela sipsip i helpim ol, em ol man long bikpela lain manmeri husat i winim mak ol i mekim wok olsem ol elda long ol dispela kongrigesen. Ol i lukautim planti milion Kristen i stap aninit long “wokboi i gat gutpela tingting.”
6. Baibel i tok profet olsem wanem long bikpela lain bai i helpim ol Kristen em God i bin makim?
6 Profet Aisaia i bin tok profet long bikpela lain manmeri bai helpim ol Kristen em God i bin makim. Em i tok: “Bikpela i tok olsem, ‘Olgeta mani samting bilong kantri Isip na bilong kantri Sudan bai i bilong yupela ol Israel. Na ol birua bai i kalabusim ol longpela man bilong kantri Seba na salim ol i kam long yupela, na bai ol i kamap wokboi nating bilong yupela.’ ” (Ais. 45:14) Long nau ol arapela sipsip i kam long lain wokboi na Gavening Bodi bilong en, na ol i bihainim tok bilong ol. Ol arapela sipsip i stap olsem ol “wokboi nating” na ol i amamas long givim bel olgeta na yusim strong na mani samting bilong helpim wok bilong autim tok long olgeta hap, em wok Krais i bin givim long ol Kristen God i bin makim.—Ap. 1:8; KTH 12:17.
7. Bikpela lain i kisim skul long mekim wanem wok?
7 Taim bikpela lain i helpim ol Kristen God i bin makim, bikpela lain i kisim skul ol bai yusim taim ol i kamap namba wan lain bilong i stap long nupela taim bihain long Armagedon. Dispela lain i mas stap strong, na ol i mas redi long bihainim tok bilong Bikman. Olgeta wan wan Kristen i gat rot long soim olsem King, Krais Jisas, i ken mekim wok long ol. Taim ol i bilip na stap gut long God long nau, ol i soim olsem ol i redi long bihainim tok taim King i tokim ol long mekim ol samting long nupela taim.
Bikpela Lain i Kamapim Klia Bilip Bilong Ol
8, 9. Olsem wanem bikpela lain i kamapim klia bilip bilong ol?
8 Ol arapela sipsip, em ol poroman bilong ol Kristen God i bin makim, ol i kamapim klia bilip bilong ol long kain kain rot. Namba wan, ol i helpim ol Kristen God i bin makim long autim tok bilong gutnius bilong Kingdom Bilong God. (Mt. 24:14; 28:19, 20) Namba tu, ol i amamas long bihainim tok Gavening Bodi i mekim.—Hi. 13:17; ritim Sekaraia 8:23.
9 Namba tri, bikpela lain i helpim ol brata bilong ol, em ol Kristen God i bin makim, long rot bilong bihainim ol stretpela stiatok bilong Jehova long i stap bilong ol. Ol i wok strong long kisim ‘pasin laikim, amamas, bel isi, i no belhat kwik, helpim ol man, gutpela pasin, wokabaut stret, stap isi, na daunim laik bilong olpela bel.’ (Ga. 5:22, 23) Long nau, ol man i no save bihainim ol dispela pasin, ol i save bihainim ol “pasin bilong olpela bel.” Tasol maski i olsem, bikpela lain i strong long sakim ‘pasin pamuk, pasin doti, bel i kirap long mekim ol pasin nogut, lotu long ol giaman god, olkain posin, birua, belhat na kros, bel nogut, mangal, pasin bilong ting long yu yet tasol, tok pait, brukim lain, bel kaskas, spak, hambak, singaut bikmaus nabaut, na ol kain kain pasin olsem.’—Ga. 5:19-21.
10. Bikpela lain i tingting strong long mekim wanem?
10 Yumi ol sinman, olsem na i hatwok long yumi kamapim ol pasin bilong holi spirit, na sakim ol pasin bilong olpela bel, na ol samting nogut bilong dispela graun bilong Satan. Maski i olsem, yumi no ken larim bel hevi bilong sampela pasin yumi hatwok long daunim, o sampela taim yumi no inapim ol mak bilong bihainim pasin bilong Jisas, o sik, i mekim na bilip bilong yumi na pasin bilong yumi long laikim Jehova i no strong moa. Yumi save olsem Jehova bai mekim samting em i tok promis long mekim—em bai lukautim bikpela lain long taim bilong bikpela hevi tru.
11. Satan i mekim wok long wanem ol pasin bilong daunim bilip bilong ol Kristen?
11 Tasol long olgeta taim yumi was gut, long wanem, yumi save olsem namba wan birua bilong yumi em Satan, na em i no save les hariap. (Ritim 1 Pita 5:8.) Em i save mekim wok long ol apostet na ol narapela man long mekim yumi ting olsem ol bilip yumi bihainim i giaman. Tasol dispela trik bilong em i no save wok gut. Na i wankain tu long taim ol man i mekim nogut long ol bratasista. Tru sampela taim dispela i save mekim na ol i no mekim bikpela wok bilong autim tok, tasol planti taim dispela i save strongim bilip bilong ol. Olsem na Satan i save yusim moa yet wanpela samting em i ting em inap wok gut tru long daunim bilip bilong yumi. Em i save mekim wok nogut long pasin bilong yumi long bel hevi. Ol Kristen long taim bilong ol aposel i kisim tok lukaut long dispela pasin: “Yupela tingim gut. Ol man bilong sin bipo ol i birua nogut long Jisas. Tasol em i sanap strong moa.” Bilong wanem ol Kristen i mas tingim dispela tok? Ol Kristen i mas tingim dispela tok na bai ol i ‘no ken les long sanap strong, na bel bilong ol i no ken guria.’—Hi. 12:3.
12. Olsem wanem tok bilong Baibel i strongim ol man i bel hevi?
12 Sampela taim yu bin tingting olsem yu no laik lotuim Jehova moa? Sampela taim yu pilim olsem yu no save mekim gut wanpela samting? Sapos olsem, no ken larim Satan i mekim wok long ol dispela tingting bilong pasim yu long lotuim Jehova. Pasin bilong stadi gut long Baibel, beten strong, na go oltaim long ol miting na bung wantaim ol wanbilip, dispela bai strongim yu na helpim yu long “no ken les long sanap strong.” Jehova i tok promis olsem em bai helpim ol man i lotuim em long kisim bek strong, na yumi ken bilip tru long dispela tok promis bilong em. (Ritim Aisaia 40:30, 31.) Givim bel long mekim ol wok Kristen. Lusim ol samting i pulim nating taim bilong yu, na wok long helpim ol narapela. Taim yu mekim olsem dispela bai strongim yu maski yu bel hevi.—Ga. 6:1, 2.
Winim Taim Bilong Bikpela Hevi na Go Insait Long Nupela Taim
13. Ol man i abrusim bagarap long Armagedon bai mekim wanem wok?
13 Bihain long Armagedon, planti milion manmeri em ol i no bin bihainim stretpela pasin, ol bai kirap bek na ol i mas kisim skul long pasin bilong Jehova. (Ap. 24:15) Ol i mas kisim save long ofa bilong Jisas bilong baim bek ol man, na tu, ol i mas bilip long dispela ofa na bai ol inap kisim ol gutpela blesing long rot bilong en. Ol i mas sakim ol bilip giaman na lusim ol pasin em bipo ol i save mekim. Ol i mas kamap nupela man na dispela i makim olsem ol i Kristen tru. (Ef. 4:22-24; Kl. 3:9, 10) Ol manmeri bilong bikpela lain i abrusim bagarap long Armagedon ol bai i gat bikpela wok long mekim. Man! Bai yumi amamas tru long mekim ol dispela wok bilong Jehova long dispela taim we i no gat wanpela samting nogut bilong nau i stap na i pulim yumi.
14, 15. Stori long ol samting em ol manmeri i winim taim bilong bikpela hevi tru bai toktok long en wantaim ol stretpela manmeri i kirap bek.
14 Ol gutpela wokman bilong Jehova em ol i bin dai paslain long taim Jisas i kam long graun na autim tok, ol tu bai i gat planti samting ol i mas kisim save long en. Ol bai kisim save long husat dispela Mesaia em ol i bin wet long lukim, tasol ol i no bin lukim. Long taim ol i bin i stap laip, ol i bin kamapim klia olsem ol i amamas long Jehova i skulim ol. Tingim bikpela amamas yumi bai kisim taim yumi helpim ol dispela gutpela wokman—olsem yumi bai amamas long stori long Daniel long truim bilong ol tok profet em i bin raitim tasol em yet i no bin kliagut long en.—Dan. 12:8, 9.
15 Tru, ol manmeri i kirap bek bai i gat planti samting yumi mas skulim ol long en, tasol yumi tu bai i gat planti askim long givim long ol. Ol inap stori moa long ol samting em Baibel yet i no stori planti long en. Tingim amamas yumi bai kisim taim Jon Bilong Baptais, em kasen bilong Jisas, i stori long yumi long ol samting bilong Jisas. Ol samting yumi bai lainim long ol dispela gutpela wokman bilong Jehova bai mekim na yumi kliagut long Tok Bilong God, winim save yumi gat long nau. Ol gutpela wokman bilong Jehova em ol i bin dai—na sampela bilong bikpela lain em ol i dai long taim bilong pinis—ol bai kisim “laip i gutpela moa.” Ol i bin kirap mekim wok bilong Jehova long taim Satan i bosim graun. Man! Ol bai amamas tru long mekim wok bilong Jehova long nupela taim we i no gat hevi.—Hi. 11:35; 1 Jo. 5:19.
16. Olsem tok profet i makim, ol samting bai kamap olsem wanem long taim bilong De Bilong Kot?
16 Long dispela taim bilong De Bilong Kot, ol bai opim ol buk. Ol bai skelim olgeta man long rot bilong Baibel na ol tok i stap long ol dispela buk bilong makim olsem ol manmeri inap kisim laip oltaim o nogat. (Ritim Kamapim Tok Hait 20:12, 13.) Long pinis bilong taim bilong De Bilong Kot, olgeta man wan wan bai kamapim klia pinis tingting bilong ol long bikpela tok i bin kamap long wok bos bilong Jehova. Olsem wanem? Bai olgeta wan wan i daun long Kingdom Bilong God na larim Pikinini Sipsip i stiaim ol i go long “wara bilong givim laip”? O ol bai sakim na i no daun long Kingdom Bilong God? (KTH 7:17; Ais. 65:20) Orait long dispela taim olgeta man long graun inap wokim disisen bilong ol yet long dispela samting, na i no gat pasin nogut i stap o sin yumi bin kisim long ol tumbuna i stiaim tingting bilong yumi. I no gat wanpela man long dispela taim inap tok pasin bilong Jehova long skelim ol man i no stret. Ol man nogut ol tasol bai bagarap na pinis olgeta.—KTH 20:14, 15.
17, 18. Ol Kristen God i bin makim na ol arapela sipsip, ol i amamas long wetim wanem samting long taim bilong De Bilong Kot?
17 Long nau ol Kristen God i bin makim, em ol i winim mak bilong mekim wok king, ol i amamas long wetim wok king ol bai mekim long taim bilong De Bilong Kot. Man! Em wanpela gutpela wok tru ol bai mekim. Dispela samting i kirapim ol long bihainim tok Pita i givim long ol brata bilong ol long taim bilong ol aposel: “Yupela i mas wok strong long i stap ol lain tru bilong en. Sapos yupela i mekim olsem, orait yupela bai i no inap pundaun na lusim em. Na em bai i opim rot olgeta bilong yupela i ken i go insait long kingdom i stap oltaim oltaim, dispela kingdom bilong Jisas Krais, em Bikpela bilong yumi, na em i Man bilong kisim bek yumi.”—2 Pi. 1:10, 11.
18 Ol arapela sipsip ol i amamas long ol brata bilong ol em God i bin makim ol long mekim dispela gutpela wok. Ol i wok strong long helpim ol. Ol i pren bilong God long nau na ol i laik givim bel long mekim wok bilong God. Long taim bilong De Bilong Kot, ol bai amamas long givim bel olgeta long helpim ol wok bilong God taim Jisas i bringim ol i go long wara bilong laip. Em nau! Ol bai inap tru long i stap ol wokman bilong Jehova long graun inap oltaim oltaim!—Ro. 8:20, 21; KTH 21:1-7.
Yu Tingim Yet?
• Wanem ol samting i insait long ol samting bilong Jisas?
• Olsem wanem bikpela lain i helpim ol brata bilong ol em God i bin makim?
• Wanem ol gutpela wok na ol gutpela samting em bikpela lain i kisim?
• Yu gat wanem tingting long taim bilong De Bilong Kot?
[Piksa long pes 25]
Ol manmeri i insait long bikpela lain i bin wasim ol klos bilong ol long blut bilong Pikinini Sipsip na ol klos i kamap waitpela
[Piksa long pes 27]
Yu laik kisim save long wanem samting long ol gutpela wokman bilong Jehova taim ol i kirap bek?