Painim Ol Bekim Bilong Ol Askim

“Yumi save pinis long rot bilong lukautim yumi yet na famili bilong yumi long ol samting bilong skin, na yumi gat planti gutpela samting em bipo yumi no gat​—eakon, CD pilaia, . . .​—tasol nau yumi laik save, yumi stap bilong mekim wanem. Bilong wanem yumi wok strong long kisim planti samting? Dispela bai helpim yumi olsem wanem?” ​—David G. Myers, dokta bilong skelim tingting, long Hope College, Holland, Michigan, long Amerika.

BAI yu bekim ol askim bilong dispela man olsem wanem? Ating sampela i ting olsem ol i westim taim long painim bekim bilong ol dispela askim. Tasol sapos yu no laik tingim ol kain askim olsem, dispela i kain olsem wanpela liklik ston i stap insait long su bilong yu na yu larim tasol na yu no tingim​—tru yu inap wokabaut yet, tasol bai yu no amamas.

Sapos yu laik save i stap bilong yumi i gat as tru bilong en o nogat, orait i no yu wanpela tasol i laik save long dispela samting. Long wanpela bikpela wok painimaut ol i mekim long olgeta hap bilong graun, ol i kisim save olsem ol man long planti kantri i wok long tingting long “i gat wanem as tru bilong i stap bilong ol.”

Sapos yu laik kisim bel isi tru, yu mas kisim save long bekim bilong dispela 3-pela bikpela askim.

Yumi kamap olsem wanem?

Yumi stap bilong mekim wanem?

Wanem samting bai kamap bihain?

Yu inap painim we bekim bilong ol dispela bikpela askim na yu inap bilip tru long en? Ol stori i kamap bihain long dispela bai i no kamapim tingting nating o tingting bilong ol man, nogat. Ol bai kamapim bekim bilong ol dispela askim i stap long Tok Bilong God, em Baibel. Mipela i laik bai yu yet i lukim long Baibel bilong yu ol tok em i mekim long ol dispela samting.