Stadi 9
Pasin Bilong Bekim Gut Tok
1 Ol Kristen i mas inap long bekim gut tok. (Kl 4:6) Taim yumi bekim gut tok yumi save amamas.
2 Long ol miting. Sapos yu bekim namba wan tok long paragraf yu mas bekim stret askim. Bihain ol brata i ken kamapim sampela tok moa o sampela skripsa samting.
3 Taim yu bekim tok, no ken pulim tok i go bikpela, na no ken kaunim tasol tok bilong paragraf; kolim long toktok bilong yu yet.
4 Redim ol tok pastaim; katim ol bekim. Sapos i gat tupela askim, olsem (a) na (b), taim yu katim bekim, raitim (a) o (b) klostu long en.
5 Gutpela sapos yumi bekim tok long miting, olsem bai yumi ‘kirapim ol brata long bihainim pasin sori na mekim gutpela pasin.’—Hi 10:23-25.
6 Long autim tok. Sapos yu autim tok na wanpela man i givim askim long yu na yu no inap bekim gut dispela askim, yu ken tokim dispela man, bai yu painim bekim bilong askim bilong em na bihain bai yu kam tokim em long dispela. Sapos man i laik pasim tok bilong yu, askim em bilong wanem em i laik pasim. Gutpela sapos yu save long tingting bilong em na em i save gut long tingting bilong yu. Taim man i givim askim long yu, tokim em yu amamas em i mekim olsem. Sapos yu autim tok long wanpela man, na narapela man i kam sutim tok long yu bilong pasim tok bilong yu, tokim em long kamapim as bilong tok bilong em. Jisas i bin mekim olsem. (Mt 22:41-46) Sapos yumi kamapim tok bilong Baibel na yumi bekim tok long man, bai yumi bekim gut tok.
7 Long ol Baibel-stadi. Sapos Baibel-stadi i gat askim, orait taim yu bekim tok pinis, askim dispela man, dispela bekim i stret long em o nogat? Sapos em i no save gut, helpim em long sampela tok moa. Yu ken helpim ol Baibel-stadi long painim bekim bilong askim bilong ol long buk Stap Oltaim o long Baibel.
8 Taim yumi kot. (1 Pi 3:14, 15) Sapos yumi mekim wok bilong God na ol man i kotim yumi, yumi no ken pret; taim yumi sanap long kot, yumi mas bekim gut tok. Rom 13:1-7 i tok yumi mas daun long ol bikpela man bilong gavman. No ken bekim tok kros long ol. (Ro 12:17, 21; 1 Pi 2:21-23) Bihainim gutpela pasin.
9 No ken bekim bikpela tok long ol. Larim ol i kamapim as bilong dispela tok ol i sutim long yu, olsem Pol i bin mekim. (Ap 24:10-13) Sapos ol i tok bilas tasol long yu, o ol i laik bai yu kamapim ol brata, yu ken pasim maus i stap.—Sav 3:7.
10 Yumi gat Baibel, olsem tok bilong God, na dispela bai helpim yumi long bekim gut tok long ol man.