Bai Yu Bekim Olsem Wanem?
1. Bilong wanem yumi mas bihainim pasin bilong Jisas taim ol man i givim askim long yumi?
1 I kam inap long nau ol man i save tingim yet gutpela pasin bilong Jisas long bekim tok bilong ol man i gat askim. Taim yumi autim tok na ol man i givim narapela narapela askim long yumi, i gutpela long yumi bihainim pasin bilong Jisas taim yumi bekim askim bilong ol.—1 Pi. 2:21.
2. Wanem samting bai helpim yumi long bekim gut askim?
2 Harim Gut Pastaim: Jisas i save skelim gut as na man i givim askim. Olsem na sampela taim em i givim askim long man bilong painimaut tingting tru bilong dispela man. Taim man i askim yu, “Yu bilip long Jisas?,” ating em i laik save long as na yu no insait long ol amamas bilong Krismas. Sapos yu kliagut long as na em i askim, yu inap toktok gut moa wantaim em.—Lu. 10:25-37.
3. Yumi gat wanem ol samting i stap bilong helpim yumi long painim ol gutpela bekim long Baibel em man inap pilim tru?
3 Bekim Long Tok Bilong Baibel: Pasin bilong yusim Baibel long bekim askim, em namba wan gutpela rot. (2 Ti. 3:16, 17; Hi. 4:12) Buk Toktok Gut na buklet “Sampela Tok Bilong Baibel Bilong Toktok Wantaim Man Long En” inap helpim gut yumi long bekim stret askim. Maski man i givim askim em i no bilip olsem tok bilong Baibel i gat strong, ating yu inap kamapim gut long em ol tok em Baibel i skulim man long en. Kirapim em long skelim gut olsem ol gutpela tingting na save i stap long Baibel i bin helpim ol man inap longtaim pinis. Taim yu bihainim pasin bilong Jisas, ol bekim bilong yu bai i gutpela tru “olsem gutpela piksa ol i wokim long gol na bilasim long silva” na i helpim man.—Snd. 25:11.
4. Long wanem ol taim em i gutpela long yumi no ken traim long bekim olgeta askim man i givim?
4 Yu Ting Yumi Mas Bekim Olgeta Askim? Sapos yu no save long bekim bilong wanpela askim, no ken sem long tokaut olsem: “Mi no save, tasol mi inap mekim wok painimaut long askim bilong yu na mi ken kam bek na bekim.” Taim yu soim pasin daun na yu soim olsem yu tingim man bilong haus, dispela pasin bai kirapim em na ating em bai tokim yu long go bek lukim em. Tasol sapos yu luksave olsem man i givim askim em i laik kirapim tok pait, orait bihainim pasin bilong Jisas na no ken toktok moa wantaim em. (Lu. 20:1-8) Wankain tu sapos wanpela man i giaman tasol long harim tok i tru na em i traim long tok pait wantaim yu, long gutpela pasin lusim em na yusim taim bilong yu long painim ol man i laik tru long harim tok.—Mt. 7:6.
5. Jisas i makim wanem gutpela pasin bilong bekim ol askim em yumi ken bihainim?
5 Jisas i save em i bikpela samting long wet long Jehova i helpim em long mekim gut wok bilong em long “autim tok tru,” na tu, bekim askim bilong ol man em ol i laik tru long kisim save. (Jo. 18:37) Yumi gat gutpela wok tru long bihainim pasin bilong Jisas long bekim askim bilong ol man em “God i bin makim bilong kisim laip i stap gut oltaim,” laka?—Ap. 13:48.