Save Long Pasin Bilong Bekim Gut Tok

I GAT sampela askim yu bai ting olsem ol i liklik askim, tasol ol samting dispela askim i kamapim em i bikpela samting tru.

Ating man i givim askim long yu i gat laik tru long yu mas bekim, tasol bilong save long pasin bilong bekim gut dispela askim yu mas save tu olsem yu bai bekim planti tok o nogat, na yu bai bihainim wanem rot bilong bekim dispela askim. (Jo. 16:12) Sampela taim, olsem Jisas i bin tokim ol aposel, wanpela man bai givim askim long yumi long wanpela samting, tasol i no stret long em i save long bekim bilong en, o ating dispela bekim i no inap helpim em.​—Ap. 1:​6, 7.

Baibel i tokim yumi: “Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.” (Kl. 4:6) Olsem na paslain long yumi bekim wanpela askim, yumi mas tingting gut long wanem tok yumi bai mekim na bai yumi mekim olsem wanem.

Pilim Tingting Bilong Man i Givim Askim

Bilong trikim Jisas, ol Sadyusi i kamapim wanpela askim long kirap bek bilong wanpela meri i bin maritim planti man. Tasol Jisas i save pinis olsem ol Sadyusi i no save bilip olsem ol man i dai pinis bai kirap bek. Olsem na taim em i bekim askim bilong ol em i bekim long ol tok i stretim tingting kranki bilong ol, em dispela tingting yet i bin kirapim ol long mekim dispela askim. Long gutpela tingting em i kamapim wanpela stori bilong Baibel ol man i save long en, na em i kamapim sampela tingting ol i no bin tingim bipo​—em i kamapim klia olsem God bai kirapim bek ol daiman. Ol birua bilong em i kirap nogut tru long bekim bilong em na ol i pret long givim sampela askim moa long em.​—Lu. 20:​27-40.

Bilong save long pasin yu mas bihainim long bekim askim, yu mas pilim ol tingting bilong man i givim askim long yu. Olsem: Wanpela wanklas o wanwok i askim yu long as na yu no save mekim Krismas. Bilong wanem em i laik save? Em i laik save tru long as na yu no mekim, o em i laik save i gat tambu long yu long painim amamas? Bilong painimaut, ating yu mas askim em long as na em i givim dispela askim long yu. Orait, nau bekim askim bilong em. Na tu, yu ken stori olsem taim yumi bihainim tok bilong Baibel dispela i save lukautim yumi, na ol samting bilong dispela holide i save mekim ol man i tingting planti na karim hevi, ol i no painim yumi.

Sapos ol i singautim yu long stori long ol Witnes Bilong Jehova long wanpela lain sumatin. Taim yu mekim tok pinis, ating ol i laik kamapim sampela askim. Sapos ol i laik save tru long sampela samting na ol i givim askim, orait bekim stret askim bilong ol. Tasol sapos ol askim i kamapim sampela tingting nogut bilong komiuniti long ol Witnes, orait, paslain long bekim tok long ol, mobeta yu stori liklik long ol samting i mekim na ol man i kisim dispela kain tingting long ol Witnes, na bilong wanem ol Witnes Bilong Jehova i larim tok bilong Baibel i makim ol samting ol bai mekim. Em i gutpela long ting olsem dispela kain askim em samting ol man i save tingim, na i no olsem ol i laik tok resis wantaim yumi, maski ol i bin kamapim ol dispela kain askim long pasin i olsem ol i laik tok resis. Olsem na bekim bilong yu inap helpim ol man long kisim stretpela tingting long yumi, na givim stretpela save long ol, na kamapim ol tok bilong Baibel i as bilong ol bilip bilong yumi.

Bai yu tok wanem long bos bilong yu sapos em i no laik larim yu long lusim wok bilong i go long wanpela kibung? Pastaim skelim tingting bilong em. Olsem wanem sapos yu tokim em olsem yu bai wok ovataim long narapela taim? O sapos yu tokim em olsem ol tok yu kisim long ol kibung i save helpim yu long bihainim stretpela pasin na mekim gutpela wok? Ating dispela bai mekim na em i tok orait? Sapos yu soim olsem yu tingim wok bilong em, ating em bai orait long yu ken mekim samting em i save em i bikpela samting long i stap bilong yu. Tasol olsem wanem sapos em i laik bai yu mekim wanpela pasin i no stret? Tru yu inap tok nogat na kamapim sampela tok bilong Baibel. Tasol ating em bai gutpela moa sapos yu toktok wantaim em pastaim olsem sapos wanpela man i orait long giaman o stil bilong helpim bos, ating kain man olsem em inap giaman o stil long bos tu, a?

O ating yu wanpela sumatin long skul na yu no laik insait long wanpela samting Baibel i tambuim. Tingim, ating tisa i no gat wankain tingting olsem yu, na em wok bilong em long bosim gut klas. Ol samting yu mas tingim i olsem: (1) Yu mas rispek long tingting bilong em, na (2) long pasin daun stori long tingting bilong yu, na (3) no ken surik long mekim samting yu save Jehova bai amamas long en. Bilong tisa i ken pilim tru tingting bilong yu, ating yu no ken mekim sotpela bekim i stori long bilip bilong yu na em tasol. (Snd. 15:28) Sapos yu wanpela yangpela, ating papa o mama i ken helpim yu long redim ol tok yu bai mekim.

Ating sampela taim yu mas mekim tok bilong daunim sampela tok ol man i gat namba i sutim long yu. Ating wanpela polisman, o ofisa bilong gavman, o jas bai tokim yu long bekim ol askim bilong em long pasin bilong yu long bihainim wanpela lo, o pasin Kristen bilong yu olsem yu no insait long ol samting bilong dispela graun, o tingting bilong yu long insait long sampela pasin bilong litimapim kantri. Bai yu bekim olsem wanem? Baibel i tok: “Bekim tok bilong ol long tok isi na long gutpela pasin.” (1 Pi. 3:16) Na tu, askim yu yet, bilong wanem ol man i tingting planti long ol dispela samting, na long pasin daun tokim ol olsem yu save long as na ol i tingting planti. Orait nau bai yu mekim wanem? Aposel Pol i bin stori long ol samting lo bilong Rom i larim em i mekim, olsem na ating yu inap mekim wankain pasin na tokim ol long samting em lo bilong nau i larim yu i mekim. (Ap. 22:​25-29) Ating stori bilong ol samting ol Kristen bilong bipo na ol Witnes Bilong Jehova long olgeta hap i bin mekim inap givim sampela tingting moa long dispela man i gat namba. O yu ken stori olsem taim ol man i daun long wok bos bilong God, dispela i save kirapim ol long daun long ol stretpela lo bilong ol man. (Ro. 13:​1-14) Kain tok olsem inap mekim na ol bai orait long harim tok bilong Baibel i kamapim as bilong tingting bilong yu.

Man i Givim Askim i Ting Wanem Long Baibel

Taim yu tingting long tok yu bai bekim, ating yu mas skelim olsem dispela man i givim askim i gat wanem tingting long Baibel. Jisas i bin mekim olsem taim em i bekim askim bilong ol Sadyusi long kirap bek. Em i save ol i bilipim ol tok bilong Moses tasol, olsem na em i kamapim wanpela stori i stap long hap Moses i bin raitim na em i tok: “Tasol Moses tu i bin soim yumi olsem ol man i dai pinis, ol i save kirap bek long matmat.” (Lu. 20:37) Gutpela sapos yu tu i kolim sampela tok bilong Baibel em man i bilipim na em i save long en.

Tasol olsem wanem sapos em i ting Baibel i no bikpela samting? Tingim tok aposel Pol i bin mekim long ol man i stap long Areopagus, olsem Aposel 17:​22-31 i stori long en. Em i autim tok i tru bilong Baibel, tasol em i no ritim stret long Baibel. Yu tu ken mekim olsem. Long sampela hap ating pastaim yu mas toktok wantaim man planti taim liklik, na bihain yu ken kolim stret sampela tok bilong Baibel. Taim yu laik kamapim tok bilong Baibel stret, pastaim kamapim sampela as na i gutpela long tingim tok bilong Baibel​—no ken tok strong olsem em i Tok Bilong God. Tasol samting yu laik mekim i olsem, yu laik autim klia laik bilong God, na larim man i harim tok bilong yu i lukim tok Baibel yet i mekim. Baibel i gat strong long pulim tingting bilong man, winim ol tok yumi inap mekim.​—Hi. 4:12.

‘Oltaim Mekim Gutpela Tok’

Jehova i save mekim gutpela tok, olsem na i stret Baibel i tokim ol wokboi bilong em long ‘oltaim mekim gutpela tok’! (Kl. 4:6; Kis. 34:6) Olsem na yumi mas bihainim gutpela pasin taim yumi toktok, maski i luk olsem yumi no gat wok long mekim olsem. Tok yumi mekim i mas gutpela, no ken mekim ol hatpela tok.

Planti manmeri i karim bikpela hevi tru, na long olgeta de ol man i tok nogut long ol. Taim yumi bungim ol kain man olsem, ating bai ol i mekim hatpela tok long yumi. Bai yumi bekim wanem kain tok long ol? Baibel i tok: “Sapos man i belhat long yu, orait bekim tok isi long em, na bai belhat bilong en i dai.” Kain tok olsem inap mekim na maski man i no wanbel wantaim yumi, em bai senis liklik na isi long yumi. (Snd. 15:1; 25:15) Taim man i mekim gutpela tok, pasin na nek bilong en bai swit tru long ol manmeri i save harim ol hatpela tok long olgeta de, na ating ol bai harim gutnius yumi autim.

Yumi no gat laik liklik long tok pait wantaim ol man i no save rispek long tok i tru. Nogat. Yumi laik toktok gut wantaim ol man long Baibel sapos ol i larim yumi long mekim olsem. Maski wanem samting i painim yumi, yumi laik bekim tok long gutpela pasin na strongpela bilip olsem ol gutpela promis bilong God bai kamap tru.​—1 Te. 1:5.

Ol Samting Bilong Yu na Maus Bilong Bel

Taim wanpela samting i painim sumatin bilong Baibel o wanpela wanbilip na em i askim yu olsem em i mas mekim wanem, yu mas bekim wanem kain tok long em? Ating yu save pinis long samting yu yet bai mekim. Tasol olgeta wan wan i mas karim hevi bilong ol samting ol yet i mekim. (Ga. 6:5) Ol man aposel Pol i autim tok long ol, em i tokim ol long “bilip long [God] na mekim ol pasin em i laikim.” (Ro. 16:26) Dispela em i gutpela tok yumi ken bihainim. Man i save mekim ol samting bilong amamasim man i skulim em long Baibel o bilong amamasim narapela man, em i save bihainim man tasol, em i no bihainim bilip. (Ga. 1:10) Olsem na taim yu bekim stret na klia askim bilong man, ating dispela i no ken helpim em tru.

Orait, olsem wanem yu inap bekim long pasin i stret wantaim tok bilong Baibel? Yu ken kamapim ol stiatok bilong Baibel na ol samting i bin kamap em Baibel i stori long en. Sampela taim yu ken soim em rot bilong painim save insait long ol buk bambai em yet inap painim ol dispela stiatok na stori. Yu ken toktok wantaim em long ol stiatok na olsem wanem ol dispela stori bilong Baibel i gutpela bilong tingim, tasol no ken stori long olsem wanem ol dispela tok inap bekim askim bilong em. Askim em olsem, em i luksave long sampela bilong dispela tok inap helpim em long tingim samting em bai mekim? Tokim em long tingim, em i ken mekim wanem bilong amamasim Jehova olsem ol dispela stiatok na ol stori i kamapim. Long dispela rot yu helpim em long kisim pasin bilong “skelim wanem ol pasin i gutpela na wanem ol pasin i nogut.”​—Hi. 5:14.

Bekim Tok Long Ol Miting Bilong Kongrigesen

Long ol miting bilong kongrigesen Kristen, planti taim yumi gat rot long autim bilip bilong yumi. Wanpela rot em long bekim ol askim ol i kamapim. Bai yumi mekim olsem wanem? Yumi laik mekim gutpela tok i save litimapim nem bilong Jehova. Devit i bin mekim olsem “namel long ol manmeri i bung bilong lotu.” (Sng. 26:12) Na yumi laik bekim tok i save strongim ol wanbilip na i “kirapim ol long laikim ol arapela na mekim ol gutpela pasin long ol,” olsem aposel Pol i tok long mekim. (Hi. 10:​23-25) Yumi inap mekim olsem sapos yumi redim ol tok bilong miting pastaim.

Taim ol i makim yu long bekim tok, yu mas mekim sotpela tok i klia na i no hatwok long kisim. No ken stori long paragraf olgeta; stori long wanpela hap tok tasol. Sapos yu bekim hap tok tasol, dispela bai larim narapela i bekim tok tu. Em i gutpela tru long kamapim bikpela tok bilong ol skripsa i stap insait long buk samting yupela i stadi long en. Taim yu mekim olsem, traim kamapim hap bilong skripsa i stret long samting yupela i toktok long en. Lain long bekim tok long tok bilong yu yet, no ken ritim long paragraf tasol. Sapos tok yu mekim i no stret olgeta, no ken tingting planti. Sampela taim dispela samting i save painim olgeta man i save bekim tok.

Bilong bekim gut askim bilong man, i no olsem yumi mas save long bekim na em tasol, nogat. Yumi mas i gat pasin bilong skelim gut ol samting. Tasol yumi save amamas tru taim yumi bekim tok i stap long bel bilong yumi na ol man i harim ol i pilim tru long bel bilong ol!​—Snd. 15:23.