Strongim Bel Bilong Narapela Narapela Long Ol Miting Bilong Kongrigesen

1. Bilong wanem yumi bekim tok long ol miting?

BILONG WANEM yumi go long ol miting bilong kongrigesen? Nambawan risen em long litimapim nem bilong Jehova. (Sng. 26:12; 111:1) Na tu, yumi go long ol miting bambai yumi ken strongim narapela narapela long dispela taim nogut nau yumi stap long en. (1 Tes. 5:11) Taim yumi putim han na bekim tok, yumi litimapim nem bilong God na strongim narapela narapela.

2. Long wanem ol taim yumi ken bekim tok long ol miting bilong yumi?

² Long olgeta wik, rot i op long yumi ken bekim tok long ol miting bilong yumi. Olsem, long ol wiken yumi ken bekim tok long Wastaua Stadi bilong kongrigesen. Long ol miting i kamap namel long wik, yumi ken bekim tok long hap Mekim Wok Painimaut, Baibel Stadi Bilong Kongrigesen, na long ol narapela hap i gat askim na bekim.

3. (a) Yumi inap bungim wanem ol hatwok? (b) Olsem wanem tok bilong Hibru 10:24, 25 i ken helpim yumi?

³ Yumi olgeta i laik preisim Jehova na strongim ol wanbilip bilong yumi. Tasol taim yumi bekim tok, yumi inap bungim sampela hatwok. Yumi inap pret long bekim tok o ating yumi laik tru long bekim tok, tasol brata i no makim yumi planti taim. Olsem wanem yumi ken winim ol dispela hatwok? Yumi ken skelim pas em aposel Pol i raitim i go long ol Hibru. Em i stori long pasin bilong bung wantaim olsem bikpela samting, na em i tok yumi mas tingting strong long “strongim bel bilong narapela narapela.” (Ritim Hibru 10:24, 25.) Taim yumi lukim olsem sotpela bekim yumi mekim i strongim ol narapela long odiens, yumi bai amamas long putim han na bekim tok. Na sapos brata i no makim yumi planti taim, yumi ken amamas olsem rot i op long ol narapela long kongrigesen i ken bekim tok.​—1 Pita 3:8.

4. Yumi bai stori long wanem 3-pela poin long dispela atikol?

⁴ Long dispela atikol, pastaim yumi bai stori long hau yumi ken strongim narapela narapela long liklik kongrigesen we i no gat planti lain bilong bekim tok. Bihain, yumi bai stori long hau yumi ken strongim narapela narapela long bikpela kongrigesen we planti i save putim han long bekim tok. Na laspela samting, yumi bai stori long ol rot we yumi ken mekim ol gutpela bekim we bai strongim ol narapela.

STRONGIM NARAPELA NARAPELA LONG LIKLIK KONGRIGESEN

5. Hau yumi ken strongim narapela narapela sapos i no gat planti long miting?

⁵ Long liklik kongrigesen o long wanpela grup, i no gat planti long miting em brata i ken makim bilong bekim tok. Sampela taim ating em bai wet liklik haptaim long wanpela i ken putim han na bekim tok. Dispela i pulim taim bilong miting i go longpela na sampela inap pilim skin les. Yu ken mekim wanem? Yu ken redi long putim han planti taim. Taim yu mekim olsem, yu kirapim ol narapela long bekim tok planti taim moa.

6-7. Hau yumi ken daunim pasin bilong pret long bekim tok?

⁶ Yu ken mekim wanem sapos yu save pret long bekim tok? Planti i save pilim olsem. Tasol bilong yu ken strongim ol brata na sista bilong yu, i gutpela yu painim ol rot bilong daunim pasin bilong pret long bekim tok! Hau yu ken mekim olsem?

⁷ Yu ken kisim gutpela helpim taim yu skelim ol tok i stap long ol Wastaua bilong ol yia i go pinis.b Olsem, redi gut. (Prov. 21:5) Taim yu redim gut ol hap bilong miting, yu no inap pilim hevi long putim han na bekim tok. Na tu, mekim ol sotpela bekim. (Prov. 15:23; 17:27) Taim yu mekim sotpela bekim, yu no inap tingting planti. Taim yu mekim sotpela bekim we i gat wanpela o tupela sentens tasol na yu no mekim longpela bekim we yu stori long planti samting, em bai isi moa long ol bratasista i kliagut long tok yu mekim. Taim yu mekim sotpela bekim na yu kolim long tok bilong yu yet, yu soim olsem yu bin redi gut na yu kliagut long ol tok i kamap long miting.

8. Taim Jehova i lukim yumi givim bel long mekim wanpela samting, em i pilim olsem wanem?

⁸ Olsem wanem sapos yu bihainim sampela bilong ol dispela tok, tasol yu pret yet long bekim tok winim wanpela o tupela taim? Yu ken save tru olsem Jehova bai amamas olsem yu givim bel long mekim samting yu inap mekim. (Luk 21:1-4) Taim yu givim bel long mekim wanpela samting, i no olsem yu mas putim bikpela hevi long yu yet, nogat. (Fili. 4:5) Tingim samting yu inap mekim, putim mak long mekim olsem, na beten askim God long mekim bel bilong yu i stap isi. Ating pastaim, yu ken putim mak long mekim wanpela sotpela bekim.

STRONGIM NARAPELA NARAPELA LONG BIKPELA KONGRIGESEN

9. Yumi inap bungim wanem hatwok long ol bikpela kongrigesen?

⁹ Sapos kongrigesen bilong yu i gat planti pablisa, ating yu inap bungim narapela hatwok. Ating planti bratasista i save putim han long bekim tok, olsem na planti taim brata i no makim yu. Olsem, Danielle i save amamas long bekim tok long ol miting.c Em i tingim dispela olsem hap wok lotu bilong em, rot bilong strongim ol narapela, na rot bilong strongim bilip bilong em long ol tok i tru bilong Baibel. Tasol taim em i muv i go long bikpela kongrigesen, brata i makim em wan wan taim long bekim tok, na sampela taim brata i no makim em long wanpela miting olgeta. Em i tok: “Mi bel hevi. Mi pilim olsem mi mis-aut long wanpela gutpela samting. Taim dispela samting i kamap gen na gen, yu inap ting olsem ating brata i min long mekim olsem.”

10. Yumi ken mekim wanem na bai yumi gat planti moa sans long bekim tok?

¹⁰ Yu pilim wankain olsem Danielle i pilim? Sapos olsem, ating yu laik givap na putim yau tasol long ol tok i kamap long miting. Tasol no ken stop long traim long bekim tok. Yu ken mekim wanem? Yu ken redim 2-pela o 3-pela bekim bilong wan wan miting. Long dispela rot, sapos brata i no makim yu long ol fes paragraf bilong stadi, orait yu bai gat sans yet long bekim tok long ol narapela paragraf. Taim yu redim Wastaua Stadi, tingim hau wan wan paragraf i konek long tim bilong atikol. Sapos yu mekim olsem, orait rot i op long yu ken mekim ol gutpela bekim long taim bilong Wastaua Stadi. Na tu, ating yu ken redi long bekim tok long ol paragraf i stori long ol strongpela tok i tru we i hatwok long stori long en. (1 Kor. 2:10) Bilong wanem? Bikos long dispela hap bilong stadi, ating wan wan bai putim han long bekim tok. Olsem wanem sapos yu bihainim ol dispela tok, tasol yu luksave olsem brata i no makim yu long bekim tok long sampela miting? Paslain long miting i kirap, yu ken toktok wantaim brata i lukautim stadi na tokim em long askim em yu laik bekim tok long en.

11. Tok bilong Filipai 2:4 i kirapim yumi long mekim wanem?

¹¹ Ritim Filipai 2:4. Aposel Pol i kirapim ol Kristen long tingim laik bilong ol narapela. Hau yumi ken bihainim dispela tok long taim bilong miting? Long taim bilong miting, yumi mas tingim tu olsem ol narapela i laik bekim tok wankain olsem yumi.

12. Wanem wanpela gutpela rot bilong strongim ol narapela long taim bilong miting? (Lukim tu piksa.)

¹² Tingim dispela. Taim yu stori wantaim ol pren bilong yu, bai yu toktok planti na yu no givim sans long ol long toktok? Nogat, yu no inap mekim olsem! Yu laik bai ol tu i toktok. Olsem tasol, long ol miting, yumi laik givim sans long planti i ken bekim tok. Wanpela gutpela rot bilong strongim ol brata na sista bilong yumi em long givim sans long ol long kamapim bilip bilong ol. (1 Kor. 10:24) Yumi ken stori long hau yumi ken mekim olsem.

13. Hau yumi ken givim sans long planti moa long odiens long bekim tok?

¹³ Wanpela samting yumi ken mekim em long bekim ol sotpela tok, na bai i gat inap taim long planti moa long bekim tok. Ol elda na ol narapela pablisa i gat ekspiriens i ken stap gutpela piksa. Taim yu mekim sotpela bekim, abrusim pasin bilong stori long planti samting. Sapos yu stori long olgeta poin i stap long paragraf, bai i no gat poin long ol narapela i ken bekim. Olsem, i gat 2-pela samting em dispela paragraf i tokim yumi long mekim—mekim ol sotpela bekim na abrusim pasin bilong stori long planti samting. Sapos yu fes man o meri em brata i makim bilong bekim tok long dispela paragraf, orait i gutpela long stori long wanpela poin.

14. Wanem samting i ken helpim yumi long save long hamas taim yumi ken bekim tok? (Lukim tu piksa.)

¹⁴ Bihainim gutpela tingting taim yu laik makim hamas taim yu bai putim han long bekim tok. Sapos yumi putim han planti taim, yumi inap mekim na brata i pilim presa long makim yumi planti taim maski ol narapela i no gat sans long bekim tok yet. Dispela inap mekim na ol narapela i pilim hatwok long putim han.​—Ekl. 3:7.

15. (a) Yumi mas mekim wanem sapos brata i no makim yumi long bekim tok? (b) Hau ol brata i lukautim stadi i ken soim olsem ol i tingim olgeta long kongrigesen? (Lukim blok “Sapos Yu Lukautim Stadi.”)

¹⁵ Taim planti pablisa i putim han long taim bilong stadi, ating yumi no inap bekim tok planti taim olsem yumi laik mekim. Sampela taim ating brata i no inap long makim yumi. Dispela inap mekim yumi bel hevi, tasol yumi no ken ting brata i gat tok long yumi na em i mekim olsem.​—Ekl. 7:9.

16. Olsem wanem yumi inap strongim ol narapela husat i bekim tok?

¹⁶ Sapos yu no inap bekim tok planti taim olsem yu laik mekim, orait i gutpela yu putim yau taim ol narapela i bekim tok, na bihain long miting yu ken tok amamas long ol long bekim bilong ol. Ol bratasista bilong yu inap kisim strong long tok amamas yu mekim long ol wankain olsem bekim bilong yu bai strongim ol. (Prov. 10:21) Pasin bilong tok amamas em narapela rot bilong strongim narapela narapela.

SAMPELA MOA ROT BILONG STRONGIM NARAPELA NARAPELA

17. (a) Hau ol papamama i ken helpim ol pikinini long redim ol bekim i stret long ol? (b) Olsem vidio i soim, wanem 4-pela rot bilong redim wanpela bekim? (Lukim tu futnot.)

¹⁷ Wanem narapela rot yumi ken strongim narapela narapela long ol miting bilong yumi? Sapos yu wanpela papa o mama, helpim ol liklik pikinini bilong yu long redim ol bekim i stret long krismas bilong ol. (Mat. 21:16) Sampela taim Wastaua Stadi i stori long ol strongpela tok, olsem hevi bilong ol marit o pasin bilong stap klin na sakim ol pasin doti, tasol ating i gat wanpela o tupela paragraf em liklik pikinini i ken bekim tok long en. Na tu, helpim pikinini long kliagut long as na sampela taim brata i no inap makim em long bekim tok. Taim yu stori long em long dispela samting, em i no inap bel hevi sapos brata i abrusim han bilong em na makim ol narapela long bekim tok.​—1 Tim. 6:18.d

18. Hau yumi ken abrusim pasin bilong litimapim nem bilong yumi yet taim yumi bekim tok? (Provep 27:2)

¹⁸ Yumi olgeta i ken redim ol gutpela bekim we i onarim Jehova na i strongim ol wanbilip Kristen. (Prov. 25:11) Sampela taim yumi ken stori liklik long ekspiriens bilong yumi, tasol yumi mas abrusim pasin bilong stori tumas long yumi yet. (Ritim Provep 27:2; 2 Kor. 10:18) Yumi mas wok strong long kirapim ol narapela long tingim Jehova, Tok bilong em, na lain bilong em. (Rev. 4:11) Sapos askim bilong paragraf i kirapim yumi long stori long ekspiriens bilong yumi yet, orait i stret long mekim olsem. Eksampel bilong dispela i stap long neks paragraf bilong dispela atikol.

19. (a) Wanem gutpela samting bai kamap taim yumi soim olsem yumi tingim olgeta long odiens? (Rom 1:11, 12) (b) Yu yet i laikim wanem samting long pasin bilong bekim tok long miting?

¹⁹ I no gat ol strongpela lo long hau yumi ken bekim tok long ol miting, tasol yumi olgeta i ken tingting long mekim ol tok i strongim ol narapela. Ating yumi mas bekim tok planti taim moa. O yumi ken amamas long ol taim we yumi bekim tok na amamas tu olsem ol narapela i gat sans long bekim tok. Taim yumi tingim laik bilong ol narapela long ol miting bilong kongrigesen, yumi olgeta i ken amamas na tok “yupela i strongim mi na mi strongim yupela.”​—Ritim Rom 1:11, 12.