Tokaut Long Bilip Bilong Yumi—No Ken Pret na Surik
1 Stadi Wastaua i namba wan rot bilong yumi lain bilong God i kisim “kaikai” bilong spirit long “taim bikman i makim.” (Mt 24:45) I gat tupela as na yumi go long dispela bikpela miting, olsem: Yumi laik kamap strong long spirit, na yumi laik tokaut long bilip bilong yumi.—Hi 10:23-25.
2 Helpim Yumi Yet: Long planti kongrigesen, insait long 3-pela 3-pela brata sista, wanpela tasol i save redim stadi pastaim. Na insait long 3-pela 3-pela, wanpela tasol i bekim tok. Miting tasol i no inap helpim yumi long kisim gut ol strongpela kaikai bilong spirit em Stadi Wastaua i kamapim. Yumi mas makim hap taim bilong stadim ol tok bilong Wastaua paslain long miting.
3 Taim yu laik redim tok bilong stadi, gutpela sapos yu mekim dispela samting pastaim: Kaunim na tingim ol askim i stap long blok klostu long pinis bilong stadi. Ol dispela askim inap helpim yu long tingim ol bikpela tok bilong stadi.
4 Long taim bilong stadi, putim gut yau long ol tok. Harim gut namba wan tok brata bilong lukautim Stadi Wastaua i mekim; dispela inap helpim yu long kisim gut ol tok bilong stadi. Ating em bai kamapim 3-pela o 4-pela askim em ol tok bilong stadi bai bekim. O sapos stadi bilong dispela wik bai stori moa long stadi bilong wik i go pinis, ating brata bai kamapim gen sampela bikpela tok bilong dispela stadi bilong wik i go pinis. Sapos sampela senis i kamap long bilip bilong yumi long wanpela tok profet o lo bilong Baibel, orait brata bai kamapim dispela long yumi. Tasol brata i no ken mekim planti tok, long wanem, wanpela as bilong stadi em bilong givim rot long ol brata sista long ol i ken tokaut long bilip bilong ol. Putim gut yau long ol tok ol i mekim, long wanem, dispela inap strongim bilip bilong yumi.
5 Tokaut Long Bilip Bilong Yu: Olsem wanem? Yu save bekim sampela tok long taim bilong stadi? Gutpela sapos yu mekim liklik tok tasol na i klia. (Lukim Luk 21:1-4.) Ol brata sista i save laikim liklik tok i kam long bel. Brata i bekim namba wan tok long paragraf i mas mekim liklik tok tasol na bekim stret askim. Nau ol narapela i ken kamapim wanpela skripsa o sampela narapela tok long paragraf. Long dispela rot planti brata sista inap tokaut long bilip bilong ol. Ol tok i mas gutpela na strongim ol brata sista.
6 Sapos nau tasol yu kirap long kam long stadi o yu pret liklik long bekim tok, yu ken askim brata bilong lukautim stadi long helpim yu. Tokim em long ol paragraf yu laik bekim tok long en, na taim yu putim han i go antap em i ken lukim na makim yu. Ating yu ken kaunim wanpela skripsa em Wastaua i no kamapim tok bilong en na stori liklik long insait bilong en. Na yu ken raitim sampela hap tok long arere bilong Wastaua bilong helpim yu long tingim ol tok yu laik mekim. Sapos yu wanpela yangpela, no ken lusim tingting olsem: Taim yu bekim tok, ol narapela i amamas na laikim tru ol tok yu kamapim.—Mt 21:16.
7 Em bikpela samting long yumi mas tokaut long bilip bilong yumi, na Stadi Wastaua i gutpela rot bilong helpim yumi long mekim olsem. Sapos yu pret liklik long bekim tok, wok strong long winim dispela hevi. Subim yu yet na bai yu inap bekim tok. Long dispela rot bai yu inap insait long miting na bai yu amamas. Olsem na gutpela sapos yu tingting strong long bekim tok long Stadi Wastaua long wik antap.—Snd 15:23.
[Ol Askim]
1. Yumi kisim wanem samting long Stadi Wastaua?
2. Yumi ken mekim wanem na bai Stadi Wastaua inap helpim gut yumi?
3. Taim yu redim stadi, gutpela sapos yu mekim wanem?
4. (a) Long taim bilong stadi yumi mas putim gut yau long wanem ol tok? (b) Dispela bai helpim yumi olsem wanem?
5. Taim yumi bekim ol askim, gutpela sapos yumi mekim wanem kain tok?
6. Sapos yu nupela o yu pret liklik long bekim tok, yu ken mekim wanem?
7. Taim yumi go long Stadi Wastaua, yumi mas tingting strong long mekim wanem?