Stadi 4
Yumi Mas Stadi
1 Yumi mas stadi bilong strongim bilip na yumi inap autim gut tok. Sapos yumi stadi, em bai helpim yumi long stretim pasin bilong yumi na bai yumi inap i stap long nupela pasin.—Mt 4:4.
2 Yumi mas makim taim bilong lainim tok bilong Baibel. (Ef 5:15-17) Sapos yumi lusim bikpela hap taim long harim tok bilong redio o long toktok nating tasol, bai yumi no gat taim bilong lainim tok bilong Baibel.—Fl 1:9-11.
3 Stadi em olsem: Yumi painim as bilong tok; na yumi tingting long dispela tok; na yumi tingim rot bilong bihainim dispela tok. I gat tripela samting bilong helpim yumi, em spirit bilong God, na oganaisesen bilong em, na Baibel. Olsem na taim yumi laik stadi, gutpela sapos yumi beten pastaim.—Je 1:5; Lu 11:9-13.
4 Stadi long Baibel. Long Skul ol i makim hap tok bilong Baibel bilong kaunim. Gutpela sapos long olgeta wik yumi kaunim dispela hap tok ol i bin makim. Ol famili i ken kaunim wantaim. Taim ol i kaunim pinis wanpela hap tok, wanpela i ken kamapim ol bikpela tok bilong en. Sapos yu wanpela i kaunim, tingim gut dispela tok na olsem wanem dispela tok i helpim yu.
5 Taim yu kaunim pinis hap tok bilong Baibel, sapos yu no save gut long sampela tok, yu ken lukim sampela buk bilong Sosaiti i kamapim ol dispela tok.
6 Stadi bilong painim bekim. Sampela taim wanpela man o Baibel-stadi bilong yumi i givim askim long yumi na yumi mas stadi bambai yumi inap painim bekim bilong dispela askim. Sapos ol i askim yu long wanpela tok bilong Baibel, yu ken kaunim sampela ves paslain na bihain long dispela tok o yu ken lukim ol buk bilong Sosaiti i kamapim dispela tok na bai yu inap save long insait bilong en.
7 Taim yu painim pinis bekim, tingim sampela gutpela pasin bilong kamapim long man na bai man i ken save dispela bekim i stret.
8 Redim tok bilong Stadi Wastaua. Taim yu kisim nupela Wastaua, kaunim tok bilong en. Na paslain long Stadi, tingim gen ol tok bilong dispela Wastaua. Kaunim nem na nambawan skripsa na ol liklik het-tok bilong en. Taim yu bekim tok long Stadi, mekim long toktok bilong yu yet. Opim Baibel na lukim ol skripsa. Tingim gen ol bikpela tok bilong en.
9 Famili-stadi. Papa i mas lukautim gut famili long ol samting bilong spirit. (1 Ti 5:8) Gutpela sapos famili i toktok long teks long olgeta de. Makim wanpela taim long olgeta wik na mekim famili-stadi long dispela taim. Helpim famili bambai ol i ken kisim gut tok bilong Baibel na putim long bel bilong ol. (Ef 6:4; Lo 6:4-7) Sampela famili i save redim Wastaua long famili-stadi; tasol yu ken stadi long ol narapela buk tu.
10 Stadi i helpim yumi. Sapos yumi stadi na lainim gut ol tok, yumi no ken lusim tingting long ol dispela tok. Bai yumi inap bekim askim bilong ol nupela man, na opim kwik Baibel na lukim tok. Sapos yumi stadi, bai yumi save gut long tok bilong Baibel na bilip bilong yumi bai kamap strong na bai yumi amamas long mekim laik bilong God.
11 Sapos yumi stadi na tingim gut ol samting bilong spirit, Jehova i tok: “Em i larim yu i save gut long em.” (1 Sto 28:9) Yumi mas stadi bambai yumi inap save long God na bihainim gutpela pasin.—Kl 1:9, 10.