Pasin Bilong Stadi i Gat Gutpela Pe

YU BIN lukim ol man taim ol i makim wanem ol prut ol i laik baim? Ol i lukim kala na bikpela bilong en bilong save em i mau o nogat. Sampela i smelim na holim o bengim prut liklik. Na sampela i holim wanpela prut long wanpela han na wanpela long narapela han bilong skelim, wanem prut i hevi moa na i gat planti wara. Wanem tingting bilong ol dispela man? Ol i wok long skelim ol liklik liklik samting, na olsem wanem wanpela prut i narapela kain long narapela, na ol i tingim ol prut ol i bin kisim bipo, na ol i skelim prut ol i lukim nau wantaim save ol i holim pinis. Ol i kisim gutpela pe, olsem prut i swit tru, long wanem, ol i skelim gut na makim wanem prut ol i kisim.

Tasol pe yumi kisim taim yumi stadi long Baibel em i gutpela moa. Taim yumi tingim stadi i bikpela samting, bilip na pasin bilong laikim tru God i save kamap strong moa, na wok autim tok bilong yumi i kamap gutpela moa, na ol samting yumi pasim tok long mekim i kamapim klia olsem yumi save skelim gut ol samting na bihainim gutpela tingting na save bilong God. Sindaun 3:15 i tok long dispela gutpela pe yumi kisim olsem: “Em i winim olgeta arapela samting yu laikim tumas.” Olsem wanem? Yu save kisim ol gutpela pe olsem? Pasin bilong yu long mekim stadi inap makim olsem yu bai kisim gutpela pe olsem o nogat.—Kl. 1:9, 10.

Stadi em i wanem samting? I no pasin bilong ritim antap antap tasol. Bilong stadi yu mas lusim sampela taim long wokim tingting na tingim gut dispela samting yu stadi long en. Yu mas skelim gut samting yu ritim, na skelim dispela wantaim save yu holim pinis, na tingim gut as bilong ol tok ol i kamapim. Taim yu stadi, tingting strong long ol tok i nupela long yu. Na tu, tingting long olsem wanem yu inap bihainim moa yet ol tok kaunsel bilong Baibel. Yu wanpela Witnes Bilong Jehova, olsem na bai yu tingting long rot bilong yusim dispela tok bilong helpim ol narapela. Olsem na bilong stadi gut yumi mas tingim tingim long bel.

Kisim Stretpela Tingting

Taim yu laik stadi, yu save kisim Baibel, buk yu laik mekim stadi long en, wanpela pensil, na wanpela notbuk. Tasol olsem wanem? Yu save redim bel bilong yu? Baibel i tok “Esra i man bilong wok strong [“long redim bel bilong em,” NW] long kisim save long lo bilong Bikpela na long bihainim gut dispela lo. Na tu em i wok long skulim gut ol Israel long olgeta tok bilong lo bai ol tu i ken bihainim.” (Esr. 7:10) Bilong redim bel yumi mas mekim wanem?

Beten i save helpim yumi long kisim stretpela tingting long stadi yumi mekim. Yumi laik bai bel bilong yumi i redi long kisim ol tok Jehova i givim bilong helpim yumi. Taim yu laik kirap mekim stadi, beten askim Jehova long givim spirit holi long yu bilong helpim yu. (Lu. 11:13) Askim em long helpim yu long kisim save long insait bilong samting yu bai stadim, na olsem wanem dispela tok i stret wantaim ol samting em bai mekim, na olsem wanem dispela i ken helpim yu long save wanem samting i gutpela na wanem samting i nogut, na olsem wanem yu ken bihainim ol dispela tok long i stap bilong yu, na olsem wanem ol dispela tok i helpim yu long pas gut wantaim Jehova. (Snd. 9:10) Taim yu stadi, wok long askim God long gutpela tingting. (Jems 1:5) Bihainim stretpela pasin na skelim yu yet wantaim ol samting yu lainim na askim Jehova long helpim yu long rausim ol tingting kranki na ol laik nogut. Oltaim “litimapim nem bilong Bikpela” long ol samting em i kamapim. (Sng. 147:7) Pasin bilong beten long taim bilong stadi i mekim yumi i stap klostu long Jehova, long wanem, long rot bilong beten yumi bekim tok long em taim em i toktok wantaim yumi long rot bilong Baibel.—Sng. 145:18.

Pasin bilong harim gut ol tok i makim ol manmeri bilong Jehova ol i narapela kain long ol narapela sumatin. Ol man i no givim bel long God ol i gat tupela tingting na ol i sutim tok long Baibel. Tasol yumi no gat dispela kain tingting. Yumi save bilip long Jehova. (Snd. 3:5-7) Sapos yumi no kisim gut wanpela tok, yumi no kisim tingting olsem dispela tok i kranki. Yumi wok long painim painim ol bekim, na yumi wetim Jehova. (Mai. 7:7) Olsem Esra, yumi laik bihainim ol tok yumi lainim na yumi laik skulim ol narapela long en. Sapos dispela kain tingting i stap long bel, bai yumi inap kisim ol gutpela samting long rot bilong stadi.

Pasin Bilong Stadi

No ken kirap tasol long paragraf 1 na mekim stadi i go inap long pinis. Pastaim lusim liklik hap taim long skelim liklik dispela hap o sapta olgeta. Skelim gut het-tok. Dispela i olsem tim bilong samting yu laik stadim. Orait, nau skelim ol liklik het-tok na olsem wanem ol i poroman wantaim dispela tim. Lukluk gut long ol piksa, ol sat, o ol blok bilong skulim yumi. Askim yu yet: ‘Bai mi kisim wanem save? Dispela bai helpim mi olsem wanem?’ Dispela i olsem stia bilong stadi yu laik mekim, na yu no mekim nating tasol.

Orait nau kisim ol tok i stret na tru. Ol hap bilong Wastaua bilong mekim stadi long en na sampela buk i gat ol askim. Taim yu ritim ol paragraf, em bai helpim yu sapos yu makim ol bekim. Maski i gat ol askim o nogat, ating bai yu gat laik long makim ol bikpela tok yu laik tingim. Sapos wanpela tok i nupela long yu, orait lusim liklik hap taim moa long skelim gut dispela tok bambai yu klia gut long en. Wok long painim ol tok piksa o sampela pasin bilong tingting yu inap mekim wok long en long autim tok o long wanpela tok yu bai mekim bihain. Tingim sampela man yu inap strongim bilip bilong ol sapos yu tokim ol long dispela tok yu stadi long en. Putim mak long ol tok yu laik mekim wok long en, na riviu long en taim yu pinisim stadi bilong yu.

Taim yu stadi, ritim ol skripsa paragraf i kolim. Skelim gut olsem wanem olgeta wan wan skripsa i helpim as tingting bilong paragraf.

Ating bai yu painim sampela tok yu no klia gut long en o yu laik skelim gut moa. No ken larim kain tok olsem i pulim taim na tingting bilong yu. Raitim long wanpela notbuk bilong skelim bihain. Planti taim yumi kisim save long ol tok yumi no klia tumas long en taim yumi ritim olgeta hap yumi stadi long en. Sapos nogat, orait yu ken wok long painim sampela save moa long dispela. Yu ken tingim wanem ol tok yu mas painim sampela save moa long en? Ating ol i raitim wanpela skripsa yu no klia gut long mining bilong en. O yu no klia long olsem wanem skripsa ya i stret long dispela stadi. O yu pilim olsem yu save long wanpela tok, tasol yu no inap kamapim gut long narapela man. No ken abrusim ol dispela kain tok. Taim yu pinisim samting yu bin kirap long stadim, mobeta yu ken painim sampela save moa long dispela tok yu no klia gut long en.

Taim aposel Pol i bin raitim pas long ol Kristen Hibru i gat planti tok insait long en, em i malolo namel long en bilong tok olsem: “Orait as bilong dispela tok yumi mekim, em i olsem.” (Hi. 8:1) Sampela taim yu save kirapim tingting bilong yu olsem? Tingting long as na Pol i bin mekim olsem. Long ol sapta em i raitim paslain, em i kamapim pinis olsem Krais em i Hetpris bilong God na em i bin go insait long heven stret. (Hi. 4:14–5:10; 6:20) Tasol taim em i stori gen long dispela tok long kirap bilong Hibru sapta 8 ves 1, Pol i bin kirapim tingting bilong ol man i ritim pas long tingim gut olsem wanem dispela tok i bikpela samting long i stap bilong ol. Em i stori olsem Krais i bin kamap long ai bilong God bilong helpim ol na em i opim rot bilong ol tu long i go insait long “Rum Tambu Tru” bilong heven. (Hi. 9:24; 10:19-22) Ol i save tru tru ol bai kisim samting ol i wetim, na dispela bai helpim ol long bihainim ol narapela tok dispela pas i mekim long bilip, na pasin bilong sanap strong na karim hevi, na pasin Kristen. Na i wankain long taim yumi stadi, sapos yumi putim gut tingting long ol bikpela tok, dispela bai helpim yumi long save gut long tim, na bai yumi pilim gut long tingting olsem i gat wanem as na yumi mas bihainim dispela tok.

Taim yu mekim stadi bilong yu yet, olsem wanem? Dispela bai kirapim yu long mekim sampela samting? Em i bikpela askim. Taim yu kisim save long wanpela samting, askim yu yet: ‘Dispela i mas mekim wanem long tingting bilong mi na ol mak mi laik winim? Olsem wanem mi inap bihainim dispela tok bilong stretim wanpela hevi, o makim samting mi laik mekim, o winim wanpela mak? Mi ken yusim dispela tok olsem wanem insait long famili, long wok autim tok, o insait long kongrigesen?’ Beten na tingim ol dispela askim, na tingting long ol samting tru tru i save kamap we yu inap mekim wok long save yu kisim.

Taim yu pinisim wanpela sapta o stori samting, orait lusim sampela hap taim long wokim riviu. Traim long tingim bek ol bikpela tok na ol tok i save helpim dispela tok. Dispela bai helpim yu long putim dispela tok long tingting bilong yu bambai yu inap yusim bihain.

Stadi Long Wanem Samting

Yumi ol manmeri bilong Jehova, yumi gat planti samting bilong stadi. Tasol bai yumi stadi long wanem samting pastaim? Em i gutpela sapos long olgeta de yumi skelim teks bilong de long buklet Skelim Sampela Tok Bilong Baibel Long Olgeta De. Long olgeta wik yumi gat ol miting bilong kongrigesen, na taim yumi stadi bilong redim ol hap bilong ol miting dispela bai helpim yumi tru. Sampela i save stadi tu long ol olpela buk na nius Kristen bilong yumi. Na sampela i save makim sampela ves bilong Baibel ritim bilong wik na ol i stadi gut tru long ol dispela ves.

Tasol olsem wanem sapos i stap bilong yu i mekim na yu no inap stadi gut long ol samting sediul i makim bilong ol miting bilong olgeta wik? Nogut yu mekim hariap tasol, o yu no mekim, long wanem, yu no inap mekim olgeta. Skelim hamas yu inap stadi long en, na mekim gut. Mekim long olgeta wik. Bihain, traim long redim ol narapela miting tu.

“Strongim Ol Wanhaus”

Jehova i save ol het bilong ol famili i mas wok hat long lukautim famili bilong ol. Sindaun 24:27 (NW), i tok: “Stretim gut wok bilong yu long ausait, na redim ol wok yu mas mekim long gaden.” Tasol yu no ken lusim tingting long ol samting bilong spirit famili i mas kisim. Olsem na dispela ves i stori moa olsem: “Orait bihain yu mas mekim ol samting bilong strongim ol wanhaus.” Het bilong famili i ken mekim olsem wanem? Sindaun 24:3 i tok: “Man i gat gutpela tingting na save, . . . famili bilong en bai i kamap strong.”

Gutpela tingting na save bilong yu inap helpim famili bilong yu olsem wanem? Man i gat dispela pasin em inap save tu long ol samting i no stap ples klia. Yumi ken tok olsem: Bilong mekim gutpela famili-stadi yumi mas save gut long famili bilong yumi pastaim. Olsem wanem? Meri pikinini bilong yu i wok long kamap strong long samting bilong spirit? Putim gut yau long tok bilong ol taim yu toktok wantaim ol. Ol i save toktok planti o bel nogut long ol samting? Tingting long kisim ol mani kago em i nambawan tingting bilong ol? Taim yu raun autim tok wantaim ol pikinini bilong yu, ol i amamas long tokaut long ol wankrismas olsem ol i Witnes Bilong Jehova? Ol i amamas long program bilong yupela long ritim Baibel wantaim famili na mekim famili-stadi? Ol i bihainim tru pasin bilong Jehova long i stap bilong ol? Taim yu skelim gut ol dispela samting bai yu kisim save long ol samting yu mas mekim olsem het bilong famili bilong helpim olgeta wan wan insait long famili long kamap strong long samting bilong spirit.

Lukluk long ol Wastaua na Kirap! bilong painim ol stori i stret long helpim famili. Orait pastaim tokim famili long ol samting yupela bai stadi long en bambai ol tu inap skelim dispela tok. Pasin sori i mas i stap long taim bilong stadi. Yumi no laik mekim strongpela tok o tok i semim wanpela bilong famili, tasol yumi laik stori gut long olsem wanem dispela tok inap helpim famili na kolim stret ol samting famili i mas mekim. Olgeta bilong famili i mas insait long stadi. Helpim olgeta wan wan long save olsem Tok bilong Jehova i “stret olgeta” bilong helpim yumi long wokabaut stret.—Sng. 19:7.

Kisim Ol Gutpela Pe

Ol man i luksave long ol samting i kamap—maski ol i no save pilim liklik ol samting bilong spirit—ol inap stadi long ol samting bilong ples antap, ol samting i kamap long graun, na bodi bilong ol yet, tasol ol i no inap save long as tru bilong ol samting ol i lukim. Tasol ol man i save stadi long Baibel long olgeta taim, na spirit bilong God i helpim ol, ol inap lukim ol dispela samting na luksave long ol gutpela wok bilong God, na truim bilong ol tok profet bilong Baibel, na ol samting God i mekim bilong blesim ol man i bihainim tok bilong em.—Mk. 13:4-29; Ro. 1:20; KTH 12:12.

Tasol maski i gutpela tru long yumi inap mekim olsem, yumi no ken kisim pasin antap. Nogat. Pasin bilong skelim Tok Bilong God long olgeta de bai helpim yumi long bihainim pasin daun. (Lo 17:18-20) Na tu, dispela i save helpim yumi long sakim “pasin bilong sin,” long wanem, taim Tok Bilong God i stap long bel bilong yumi, strong bilong sin long pulim yumi i no inap daunim laik bilong yumi long sakim sin. (Hi. 2:1; 3:13; Kl. 3:5-10) Olsem na bai yumi “wokabaut long pasin bilong ol manmeri tru bilong Bikpela, na bai em i laikim olgeta pasin bilong [yumi]. Na bai [yumi] i mekim planti kain gutpela wok.” (Kl. 1:10) Yumi laik mekim olsem na dispela em i as na yumi stadi long Tok Bilong God, na taim yumi mekim olsem dispela em i nambawan pe tru yumi inap kisim.