Yupela Famili, Bung Wantaim na Stadi Long Tok Bilong God
“Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.”—MATYU 4:4.
1. Baibel i tok wanem long wok bilong papa bilong famili long lainim ol pikinini long ol pasin bilong Jehova?
PLANTI taim God Jehova i bin givim tok long ol papa bilong famili bilong kirapim ol long tingim wok bilong ol long skulim ol pikinini bilong ol. Ol samting ol i skulim ol pikinini long en bai helpim ol pikinini long i stap bilong ol long nau, na helpim ol long redi long laip i kamap long bihain. Wanpela ensel i stap olsem maus bilong God em i tokim Abraham olsem em i gat wok long skulim famili bilong em na bai ol i “bihainim tok” bilong Jehova. (Stat 18:19) Ol papamama Israel i kisim tok olsem ol i mas tokim ol pikinini bilong ol long olsem wanem God i bin kisim bek ol Israel long Isip na givim Lo long ol long maunten Sainai, long Horep. (Kisim Bek 13:8, 9; Lo 4:9, 10; 11:18-21) Na ol papa Kristen i mas “stretim gut ol pikinini bilong [ol] na skulim ol long tok bilong Bikpela.” (Efesus 6:4) Maski papa o mama tasol i mekim wok bilong Jehova, dispela papa o mama i mas wok strong long skulim ol pikinini long ol pasin bilong Jehova.—2 Timoti 1:5; 3:14, 15.
2. Sapos tupela marit i no gat pikinini, ol i mas mekim famili-stadi? Stori long dispela.
2 Tasol famili-stadi long Tok Bilong God i no bilong ol famili tasol i gat pikinini. Taim tupela marit i mekim famili-stadi, maski ol i no gat pikinini, dispela i soim olsem ol i laikim tru ol samting bilong spirit.—Efesus 5:25, 26.
3. Bilong wanem em i bikpela samting long mekim famili-stadi long olgeta taim?
3 Bilong stadi i ken helpim gut famili, famili i mas stadi long olgeta taim, na dispela i stret wantaim samting Jehova i bin skulim ol Israel long en taim ol i stap long ples drai nating: “Yumi man i no inap kisim laip long kaikai tasol. Nogat. Yumi mas bihainim olgeta tok bilong God tu na bai yumi kisim laip.” (Lo 8:3) Sampela famili i stretim rot bilong mekim stadi long olgeta wik, na sampela ol i mekim sotpela stadi long olgeta de. Tasol maski wanem wanem samting yu mekim, makim stret taim bilong stadi. Stretim gut ol wok na bai ‘yu gat taim’ bilong mekim stadi. Yu laik helpim famili bilong yu na bai ol i no ken bagarap.—Efesus 5:15-17; Filipai 3:16.
Ol Samting Bilong Tingim
4, 5. (a) Long rot bilong Moses, Jehova i tokim ol papamama long mekim wanem bikpela samting taim ol i skulim ol pikinini bilong ol? (b) Bilong mekim olsem, yumi mas mekim wanem long nau?
4 Taim yu mekim famili-stadi, stadi bai mekim gutpela wok sapos yu tingim sampela samting yu laik bai stadi i mekim. Em hia sampela samting:
5 Long olgeta wan wan stadi, wok long helpim ol pikinini long kisim pasin bilong laikim tru God Jehova. Taim ol Israel i no go insait yet long Graun Bilong Promis, ol i bung long ples daun bilong ol Moap na Moses i tokim ol long samting bihain Krais Jisas i tok em i “namba wan [lo] na i winim olgeta arapela lo.” Em wanem lo? “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.” (Matyu 22:36, 37; Lo 6:5) Moses i laik bai ol Israel i tingim gut dispela lo na lainim ol pikinini bilong ol long en. Bilong mekim olsem, ol i mas kolim dispela lo planti taim, na kamapim ol as na ol pikinini i mas laikim tru Jehova, na stori long ol tingting na pasin em inap pasim ol long kamapim dispela pasin, na kamapim long ples klia olsem ol yet i laikim tru Jehova. Olsem wanem? Yumi mas lainim ol pikinini bilong yumi olsem? Tru tumas, yumi mas mekim! Na ol tu i mas kisim helpim bilong “katim skin long bel bilong ol,” olsem rausim olgeta samting inap pasim ol na ol i no laikim tru God. (Lo 10:12, 16, NW; Jeremaia 4:4) Sampela samting bilong pasim ol olsem, em pasin bilong laikim ol samting bilong dispela graun, na ol wok bilong dispela graun ol inap insait long en. (1 Jon 2:15, 16) Pasin bilong laikim tru Jehova i mas mekim wok, olsem kirapim yumi long mekim ol samting Papa bilong yumi long heven em i laikim. (1 Jon 5:3) Bilong famili-stadi i ken helpim famili inap long olgeta taim bihain, olgeta wan wan stadi i mas strongim dispela pasin bilong laikim tru Jehova.
6. (a) Yumi mas mekim wanem bambai yumi ken helpim pikinini long kisim stretpela save? (b) Olsem wanem Baibel i kamapim klia olsem stretpela save em i bikpela samting?
6 Helpim ol pikinini long kisim stretpela save long ol samting God i laik bai ol i mas mekim. Bilong mekim olsem, i no inap sapos pikinini i kaunim tasol bekim long magasin o buk. Ating yumi mas toktok wantaim pikinini na bai yumi ken save em i kisim gut ol bikpela tok o nogat. Stretpela save em i bikpela samting bilong helpim yumi long kisim ol pasin bilong nupela man, na long helpim yumi long tingim ol bikpela samting tasol long taim bilong hevi, olsem mekim ol samting God i save laikim.—Filipai 1:9-11; Kolosi 1:9, 10; 3:10.
7. (a) Wanem ol askim inap helpim famili long bihainim ol tok ol i stadi long en? (b) Wanem sampela tok bilong Baibel i soim olsem dispela inap kamapim gutpela wok?
7 Helpim ol long bihainim ol tok ol i lainim. Bilong mekim olsem, orait, long olgeta wan wan famili-stadi, askim ol: ‘Ol dispela tok inap helpim yumi olsem wanem? Yumi mas mekim sampela senis long i stap bilong yumi? Bilong wanem yumi laik mekim ol senis?’ (Sindaun 2:10-15; 9:10; Aisaia 48:17, 18) Sapos yumi helpim famili long save long olsem wanem ol i ken bihainim ol samting ol i lainim, dispela inap mekim bikpela wok long helpim ol long kamap strong long spirit.
Mekim Gutpela Wok Long Ol Tul
8. Lain wokboi i bin givim wanem ol tul long yumi bilong mekim Baibel-stadi?
8 “Wokboi i gat gutpela tingting” i bin givim yumi planti tul yumi ken mekim wok long en bilong mekim stadi. Nius Wastaua, bilong mekim wok long en wantaim Baibel, yumi inap kisim long 131 tok ples. Na bilong mekim stadi long Baibel, i gat ol buk long 153 tok ples, ol buklet long 284 tok ples, ol kaset long 61 tok ples, ol video-kaset long 41 tok ples, na i gat wanpela kompyuta program long 9-pela tok ples bilong helpim yumi long skelim ol tok bilong Baibel!—Matyu 24:45-47.
9. Olsem wanem yumi inap bihainim ol skripsa em dispela paragraf i kolim taim yumi mekim stadi Wastaua wantaim famili?
9 Long taim bilong famili-stadi, planti famili i save redim stadi bilong Wastaua. Dispela inap helpim tru famili! Wastaua i save kamapim nambawan bikpela kaikai bilong strongim lain bilong Jehova i stap long olgeta hap. Taim famili i bung wantaim na stadi long Wastaua, no ken kaunim tasol ol paragraf na bekim ol askim. Wok strong long kisim gut ol tok. Lusim hap taim long opim Baibel na lukim ol skripsa em paragraf i no kamapim ol tok bilong en. Tokim famili long stori long olsem wanem ol dispela skripsa i stret wantaim ol tok bilong paragraf. Helpim ol long pilim tru ol tok.—Sindaun 4:7, 23; Aposel 17:11.
10 Sapos i gat sampela pikinini insait long famili, yu ken mekim wanem na bai famili-stadi em taim bilong kisim strong na amamas, na yu no mekim nating tasol? Wok long helpim olgeta wan wan long insait tru long stadi na bai tingting bilong ol i pas long stadi. Sapos inap, stretim rot bilong olgeta wan wan pikinini i gat Baibel bilong em yet na Wastaua bilong stadi. Sapos pikinini i liklik, bihainim pasin sori Jisas i bin mekim na sindaun klostu tru long pikinini, na holim em tu. (Skelim wantaim Mak 10:13-16.) Het bilong famili i ken tokim pikinini long stori long wanpela piksa i stap long buk o nius bilong stadi. O paslain long stadi em i ken tokim pikinini long redi long kaunim wanpela skripsa. Na pikinini i gat bikpela krismas liklik i ken stori long sampela rot famili i ken mekim wok long en bilong bihainim ol tok bilong stadi.
11. I gat wanem ol narapela tul bilong helpim yumi long kisim save? Olsem wanem yumi inap mekim gutpela wok long ol dispela tul long taim bilong famili-stadi?
11 Maski yu mekim wok long Wastaua long taim bilong famili-stadi, yu no ken lusim tingting long ol narapela tul bilong stadi yumi inap kisim long planti tok ples. Sapos yu laik kisim sampela save moa long wanpela tok bilong Baibel, buk Insight on the Scriptures inap helpim yu. Na yu inap kisim bekim long sampela askim moa long rot bilong Watch Tower Publications Index o long dispela kompyuta program bilong Sosaiti. Sapos i gat ol dispela tul long tok ples bilong yu, na yu lain long mekim wok long ol, dispela inap helpim gut famili-stadi bilong yu. Bilong kirapim tingting bilong ol pikinini na bai ol i amamas long stadi, ating yu ken lusim hap taim bilong stadi na lukim wanpela hap bilong wanpela gutpela video bilong Sosaiti o harim wanpela hap bilong wanpela pilai i stap long kaset, na bihain toktok long en. Sapos yu mekim gutpela wok long ol dispela tul bilong stadi, dispela inap helpim famili-stadi long kamap gutpela na helpim famili olgeta.
Senisim Rot Bilong Helpim Famili
12. Olsem wanem long rot bilong famili-stadi yumi inap stretim sampela hevi bilong famili?
12 Ating famili bilong yu i save redim stadi Wastaua bilong wik. Tasol yu mas luksave long ol hevi bilong famili na long tingting bilong ol long ol samting. Sapos mama i no wok mani, orait em i ken lusim hap taim long olgeta de, na taim ol pikinini i lusim skul na kam bek long haus, em i ken toktok wantaim ol. Sampela hevi em i ken stretim long dispela taim, tasol sampela hevi, ating em i mas lusim hap taim moa bilong stretim. Na taim ol bikpela hevi i kamap insait long famili, no ken givim baksait long en. (Sindaun 27:12) Ating em ol hevi i save kamap long skul, na sampela narapela kain hevi tu. Tingim sampela tok i stret long ol dispela hevi, na paslain long taim bilong stadi, toksave long famili long samting yu laik stadi wantaim ol long en.
13. Sapos famili i toktok long rot bilong karim hevi bilong i stap rabis, olsem wanem dispela inap helpim ol?
13 Olsem: Planti kantri i stap rabis, olsem na long planti hap, ating famili i mas toktok long rot bilong karim dispela hevi. Olsem wanem? Sapos long taim bilong famili-stadi yu toktok long sampela hevi i painim famili na ol lo bilong Baibel em famili i mas bihainim, yu ting dispela bai helpim famili bilong yu?—Sindaun 21:5; Saveman 9:11; Hibru 13:5, 6, 18.
14. Wanem sampela samting inap mekim na i gutpela sapos famili i toktok long tingting bilong Jehova long pasin pait na bagarapim man, ol bikpela pait, na pasin bilong ol Kristen long no ken insait long ol dispela samting?
14 Narapela samting bilong toktok long en, em pasin bilong pait na bagarapim man. Tingting bilong Jehova long dispela samting i mas stap long tingting na long bel bilong yumi. (Stat 6:13; Song 11:5) Taim yupela i toktok long dispela pasin bilong pait long taim bilong famili-stadi, toktok long pasin ol pikinini i ken mekim taim ol bikhetmanki long skul i laik mekim nogut long ol, na i gutpela sapos ol i skul long spot judo samting o nogat, na olsem wanem ol i ken makim ol gutpela amamas. Pait na bagarapim man i bin kamap long planti hap—klostu olgeta kantri i gat pait i kamap insait long en, o pait namel long ol narapela narapela lain o ol lain politik, o ol lain raskol i pait. Olsem na sapos famili bilong yu i stap namel long ol lain i pait, ating famili i mas toktok long pasin Kristen ol i mas bihainim.—Aisaia 2:2-4; Jon 17:16.
15. Long wanem kain pasin yumi ken lainim ol pikinini long ol samting bilong marit na maritpasin?
15 Taim pikinini i wok long go bikpela, em i mas kisim save long ol samting bilong marit na maritpasin, inap long krismas bilong ol. Klostu olgeta papamama long sampela lain ol i no save toktok wantaim pikinini bilong ol long ol samting bilong maritpasin. Sapos pikinini i no gat save long dispela samting, ating em bai kisim tingting kranki bilong ol narapela pikinini, na dispela inap nogutim em. Mobeta papamama i bihainim pasin bilong Jehova—long Baibel em i save tokaut stret long ol dispela samting. Ol tok bilong God inap helpim pikinini bilong yumi long amamas long em yet, na sapos em man, long mekim gutpela pasin long meri, o sapos em meri, long mekim gutpela pasin long man. (Sindaun 5:18-20; Kolosi 3:5; 1 Tesalonaika 4:3-8) Maski yu toktok pinis long ol dispela samting, yu no ken surik long kamapim gen ol tok. Taim sampela senis i kamap, pasin bilong kamapim gen ol tok em i bikpela samting.
16. (a) Sampela famili i save mekim famili-stadi long wanem kain taim? (b) Yu yet yu bin mekim wanem bilong stretim rot bambai yu inap mekim famili-stadi long olgeta taim?
16 Yumi ken mekim famili-stadi long wanem taim? Planti famili i bihainim pasin bilong famili Betel na mekim famili-stadi long Mande long apinun. Tasol sampela i mas mekim stadi bilong ol long narapela taim. Long Ajentina, wanpela famili i gat papa na mama na 9-pela pikinini, ol i save kirap long 5 klok long olgeta moningtaim bilong mekim famili-stadi. Wok skin bilong ol i mekim na i no gat narapela taim long mekim dispela stadi. Dispela i hatwok liklik, tasol dispela i bin kirapim ol pikinini long pilim tru olsem famili-stadi em i bikpela samting. Long Filipin, wanpela elda i bin mekim famili-stadi long olgeta taim wantaim meri na 3-pela pikinini bilong em. Namel long wik tu papamama i bin stadi wantaim ol pikinini wan wan bilong helpim ol long pilim tru tok i tru. Long Amerika, long olgeta moningtaim, wanpela sista, em man bilong em i no Witnes, em i save wokabaut wantaim ol pikinini bilong em i go long ples bilong kisim skul-bas. Taim ol i wetim bas, ol i lusim 10-pela minit samting long kaunim na stori long sampela hap bilong nius o buk ol bai stadi long en bihain. Orait nau mama i mekim sotpela beten na ol pikinini i kalap long bas. Long Demokratik Ripablik Bilong Kongo, wanpela meri, em man bilong em i no wanpela Witnes na i bin lusim famili, em i mas mekim bikpela wok taim em i stadi, long wanem, em i no bin skul gut. Pikinini man bilong em i bikpela pinis em i helpim em—long olgeta wik em i save kam lukim famili na go pas long mekim stadi wantaim mama na ol liklik brata bilong em. Mama i stap olsem gutpela piksa—em i redim gut stadi. Olsem wanem? I gat sampela samting i mekim na famili bilong yu i hatwok long mekim famili-stadi long olgeta taim? No ken les. Beten strong na askim Jehova long helpim yu long mekim Baibel-stadi long olgeta taim.—Mak 11:23, 24.
No Ken Les
17. (a) Bilong mekim famili-stadi long olgeta taim, yumi mas mekim wanem? (b) Wanem samting i kamapim klia olsem pasin bilong skulim famili long ol pasin bilong Jehova inap helpim gut ol?
17 Bilong mekim famili-stadi long olgeta taim, yu mas stretim rot. Na yu mas wok strong long mekim na no ken les. Tasol ol gutpela samting inap kamap long pasin bilong mekim famili-stadi long olgeta taim. (Sindaun 22:6; 3 Jon 4) Franz na Hilda, long Jemani, ol i mekim bikpela long 11-pela pikinini. Sampela yia bihain, pikinini meri bilong ol, Magdalena, i tok: “Samting nau mi tingim i bikpela samting, i olsem: Long olgeta wan wan de, papamama i save givim sampela tok bilong spirit long mipela.” Taim pasin bilong litimapim kantri i kamap strong aninit long wok bos bilong Adolf Hitler, papa bilong Magdalena i mekim wok long Baibel bilong redim famili long ol traim em i save bai kamap. Bihain, ol polis i kisim ol liklik pikinini i go long wanpela kain skul kalabus bilong stretim ol manki; na sampela narapela long famili ol i putim ol long kalabus na long ol banis kalabus nogut tru. Ol i kilim sampela i dai. Bilip bilong olgeta long famili i stap strong long dispela taim nogut, na bihain tu, olgeta wan wan long famili i abrusim bagarap, bilip bilong ol i stap strong.
18. Olsem wanem hatwok bilong ol papa na mama wanpis i bin kamapim gutpela kaikai?
18 Planti papa o mama wanpis, na ol papa o mama em poroman bilong ol i no wanlotu bilong ol, ol tu i save skulim ol pikinini bilong ol long Baibel. Long India, wanpela mama wanpis, em man bilong em i dai pinis, em i wok strong long helpim tupela pikinini bilong em long laikim tru Jehova. Tasol taim pikinini man bilong em i no bung moa wantaim lain bilong Jehova, bel bilong em i bagarap stret. Em i krai long Jehova i ken lusim tingting long ol popaia em i bin mekim taim em i skulim pikinini man bilong em. Tasol dispela pikinini i no lusim tingting olgeta long ol samting em i bin lainim. Bihain long 10-pela yia, em i kam bek, na em i kamap strong long spirit, na kamap wanpela elda long kongrigesen. Nau em wantaim meri bilong em i mekim wok painia. Tru tumas! Ol papa na mama i bin bihainim tok bilong Jehova na oganaisesen bilong em na ol i bin skulim famili bilong ol long Baibel long olgeta taim, ol i ken amamas tru! Olsem wanem? Yu tu yu save bihainim dispela tok insait long famili bilong yu?
Yu Inap Stori Long Dispela?
◻ Bilong wanem i bikpela samting long yumi mas mekim famili-stadi long olgeta taim?
◻ Yumi laik bai olgeta wan wan famili-stadi i mas mekim wanem wok?
◻ Yumi bin kisim wanem ol tul bilong helpim yumi?
◻ Bilong helpim famili, yumi ken mekim famili-stadi long wanem ol rot?
10. Yumi ken mekim wanem bilong helpim ol pikinini long insait long stadi na bai ol i amamas long dispela taim bilong stadi?
[Piksa long pes 15]
Famili-stadi bai mekim gutpela wok sapos yu tingim sampela samting yu laik bai stadi i mas mekim