Sediul Bilong Famili—Famili Stadi
1 Wanpela gutpela presen tru yu papa o mama Kristen i ken givim long pikinini bilong yu, em long putim pasin bilong yu long laikim tru Jehova i go insait long bel bilong em. Yu ken mekim olsem “taim yupela i stap long haus” na mekim famili stadi long olgeta wik. (Lo 6:5-7) Maski poroman marit bilong yu em i wanpela wanbilip, o yupela i no wanbel long lotu, o yu wanpela papa o mama tasol i lukautim pikinini, yu inap helpim pikinini bilong yu long i go klostu long yu na Jehova long rot bilong mekim famili stadi long olgeta taim.
2 Kirap Mekim Famili Stadi: Namba wan bikpela samting long mekim famili stadi em olsem: Stadi i mas kamap olsem pasin bilong famili. Sapos yu no save gut long wanem taim i gutpela long mekim stadi, orait toktok wantaim famili long dispela samting. (Snd. 15:22) Sapos yu gat ol liklik pikinini, ating yu laik mekim ol sotpela stadi namel long wik. Yu yet i ken skelim wanem kain pasin bilong mekim stadi i gutpela long famili bilong yu. Makim taim bilong stadi long sediul bilong yupela, na wok strong long bihainim.
3 Yu ken stadi long wanem ol buk samting? Sampela i save redim ol buk samting em ol bai stadi long taim bilong Buk Stadi Bilong Kongrigesen o taim bilong Stadi Wastaua. Sampela narapela i save stadi long ol narapela buk bilong ol yangpela. Papa bilong wanpela pikinini man na pikinini meri i tok: “Wanpela samting i mekim na ol pikinini i save amamas long wetim stadi bilong mipela long olgeta wik, em mipela i save mekim pilai bilong makim ol stori i stap long buk Baibel Stori Buk Bilong Mi. Ol i save pilim tru na kisimgut as bilong ol dispela stori, na dispela i bikpela samting moa, winim pasin bilong pinisim planti paragraf insait long stadi.”
4 Stadi Long Olgeta Wik: Yupela i mas mekim famili stadi long olgeta wik na olgeta insait long famili i mas amamas long wetim dispela taim. Taim sampela samting i kamap, sampela taim yupela i mas senisim de na taim bilong mekim famili stadi. Na tu, sampela taim yupela i mas senisim samting yupela i laik stadi long en. Tasol maski senis i kamap, no ken lusim stadi inap longpela taim, yu mas strong long mekim long olgeta taim. Long wanpela famili, pikinini meri i tok: “Sapos taim bilong mekim stadi i mas senis, Papa i save raitim nupela taim long wanpela hap pepa na pasim long dua bilong bokis ais na bai mipela olgeta i ken save stadi bai kamap long wanem taim.” Dispela kain pasin em i gutpela tru bilong mekim yet famili stadi long olgeta taim! Taim yu mekim bikpela long ol pikinini bilong yu na “stretim gut ol . . . na skulim ol long tok bilong Bikpela,” yu kamapim klia pasin bilong yu long laikim ol na Papa bilong yumi long heven.—Ef. 6:4.