Olsem Wanem Olgeta Long Famili i Ken Wok Wantaim—Long Mekim Baibel-Stadi
1 Tok i tru i mekim na i stap bilong ol famili i gat as bilong en, tasol pasin bilong mekim gut wok bilong Jehova i no save kamap nating, nogat. Yumi mas lusim bikpela hap taim na strong bilong kamapim wanpela famili i strong long ol samting bilong spirit. Bilong kamap strong olsem, olgeta insait long famili i mas wok gut wantaim. Dispela em namba wan hap bilong wanpela stori i gat 3-pela hap bilong en, em bai stori long olsem wanem ol famili i ken wok wantaim long kisim gutpela pasin bilong stadi.
2 Kaunim Baibel Olgeta De: Sindaun 24:5 i tok: “Man i gat gutpela save, . . . em i strongpela man tru.” Save man i kisim taim em i kaunim Tok Bilong God long olgeta de, dispela i strongim bel bilong em na bai em inap long sakim ol samting Satan i mekim bilong daunim em long spirit. (Sng 1:1, 2) Olsem wanem? Yupela famili i save bung wantaim bilong kaunim Baibel long olgeta de? Long Sedyul Bilong Skul Bilong Wok Autim Tok i gat “Namba Tu Sedyul Bilong Kaunim Baibel” long olgeta wik bilong yia. Bilong bihainim dispela sedyul, famili i mas lusim liklik hap taim olsem 10-pela minit long olgeta wan wan de. Makim wanpela gutpela taim, olsem taim bilong kaikai long moning, bihain long kaikai long apinun, o paslain long taim bilong slip, long kaunim Baibel na skelim teks bilong de long buklet Skelim Sampela Tok Bilong Baibel Long Olgeta De. Mekim dispela olsem wanpela pasin bilong famili long olgeta de.
3 Stadi Wantaim Long Olgeta Wik: Baibel-stadi bilong famili i mas i stap olsem bikpela samting bilong famili long olgeta wan wan wik. Olgeta wan wan i mas strongim dispela stadi na givim bel long bekim tok na insait long en. Papa i mas tingim samting bilong helpim famili taim em i skelim ol buk samting ol bai stadi long en, na de, taim, na stadi bai longpela o nogat. Putim famili-stadi i stap namba wan samting long sedyul long wik. No ken larim ol samting i no bikpela samting i pasim yupela long mekim stadi.—Fl 1:10, 11.
4 Planti taim ol man i save ringim wanpela papa long ol samting bilong wok, olsem na em i rausim waia bilong telefon long taim bilong famili-stadi. Sapos ol man i kam long haus, em i singautim ol long sindaun wantaim ol long stadi o ol i ken wet inap long stadi i pinis. Dispela papa i bin strong bambai em i no ken larim wanpela samting i bagarapim famili-stadi. Dispela pasin i bin kirapim tru ol pikinini bilong em, na wok bisnis bilong em i kamap gutpela.
5 Em i gutpela samting tru taim famili olgeta i wok wantaim long mekim ol wok bilong spirit! Taim yumi wok strong long mekim gut Baibel-stadi bilong famili, Jehova bai blesim yumi.—Sng 1:3.