Samting Bilong Helpim Ol Famili
1. Pasin bilong tingim Sabat long olgeta wik i helpim ol famili Israel olsem wanem?
1 Pasin bilong bihainim lo bilong Sabat em wanpela gutpela samting i kam long Jehova na dispela i bin helpim ol famili bilong lain Israel. Long de Sabat lain Israel i save malolo long ol wok bilong ol na lusim hap taim bilong tingim tingim ol gutpela pasin bilong Jehova na pasin bilong ol long pas gut wantaim em. Dispela i opim rot long ol papamama i ken putim Lo long bel bilong ol pikinini bilong ol. (Lo 6:6, 7) Long olgeta wik pasin bilong tingim Sabat i opim rot long lain bilong Jehova long tingim moa pasin bilong ol long pas gut wantaim em.
2. Pasin bilong tingim Sabat i skulim yumi olsem wanem long Jehova?
2 Tru long nau, Jehova i no tokim ol famili long bihainim lo bilong Sabat. Tasol dispela lo i skulim yumi long wanpela pasin bilong God. Olsem: Em i save tingim tru ol lain bilong em long ol samting bilong spirit. (Ais. 48:17, 18) Long nau, wanpela rot Jehova i kamapim pasin bilong em long laikim na tingim tru lain bilong em, em long rot bilong Famili Lotu.
3. Wanem wok bilong Famili Lotu?
3 Wanem Wok Bilong Famili Lotu? Kirap long Janueri 2009, yumi bungim tripela miting wantaim long wankain de; Buk Stadi Bilong Kongrigesen, miting bilong Skul Tiokratik Bilong Autim Tok, na Miting Bilong Wok. Wanpela as na dispela senis i kamap, em bilong opim rot long ol famili i ken strongim pasin bilong ol long pas gut moa wantaim Jehova. Ol i ken mekim olsem long rot bilong makim wanpela de long olgeta wik long mekim famili lotu. Ol i bin kirapim olgeta wan wan famili long surikim famili stadi bilong ol i go long nait em bipo miting bilong buk stadi i save kamap long en. Na ol i ken mekim wok long dispela hap taim bilong stadi gut long tok bilong Baibel na mekim stadi we inap helpim gut famili.
4. Yu ting famili i mas lusim wanpela aua tasol bilong mekim famili lotu? Stori long dispela.
4 Taim yumi laik go long Buk Stadi Bilong Kongrigesen, yumi save lusim sampela aua bilong redi. Olsem: Yumi bilas, wokabaut i go long ples bilong buk stadi o ron long ka i go. Planti bilong yumi i save lusim sampela aua long redi bilong i go long dispela miting. Tasol nau i gat senis long sediul bilong ol miting bilong yumi, olsem na nau yumi inap yusim dispela hap taim bilong lotuim Jehova, em bipo yumi save yusim bilong i go long miting bilong Buk Stadi. Olsem na dispela i opim rot long yumi ken mekim Famili Lotu winim wanpela aua. Na taim yumi mekim olsem, yumi mas tingim ol samting we inap helpim famili na skel bilong ol wan wan insait long famili, na yumi mas makim taim i stret bilong mekim famili lotu.
5. Insait long hap taim bilong famili lotu, yu ting famili olgeta i mas bung wantaim? Stori long dispela.
5 Insait Long Hap Taim Bilong Famili Lotu, Yu Ting Famili Olgeta i Mas Bung Wantaim? Taim ol marit i toktok wantaim long ol tok bilong Baibel, na ol famili i gat ol pikinini ol tu i mekim olsem, ol i save strongim narapela narapela. (Rom 1:12) Na famili i pas gut moa wantaim. Olsem na long taim bilong Famili Lotu, tok bilong Baibel i mas i stap olsem nambawan samting famili i toktok long en. Tasol olgeta wan wan insait long famili i ken lusim sampela hap taim long mekim stadi bilong ol yet. Olsem: Famili olgeta i ken sindaun wantaim na mekim stadi, na bihain wan wan i ken mekim stadi bilong ol yet insait long hap taim i stap yet bilong mekim famili lotu. Ol i ken pinisim ol hap bilong miting em ol i no bin pinisim, o ritim ol magasin. Sampela famili i pasim tok long ol i no ken lukim TV long dispela nait olgeta.
6. Olsem wanem ol famili i ken mekim Famili Lotu bilong ol?
6 Pasin Bilong Mekim Famili Lotu. Long taim bilong mekim Famili Lotu, i no olsem ol i mas mekim ol askim na bekim tasol, nogat. Bilong olgeta insait long famili i ken amamas long mekim Famili Lotu, planti famili i save bihainim wankain pasin olsem i save kamap long ol miting. Ol i brukim ol hap ol bai stadi long en na bihainim narapela narapela rot bilong mekim. Olsem: Ating famili olgeta bai ritim Baibel wantaim, o redim sampela hap bilong ol miting, o mekim traim pasin bilong autim tok. Pes 6 i kamapim sampela gutpela rot ol famili i ken bihainim.
7. Ol papamama i mas wok strong long mekim wanem long taim bilong famili lotu?
7 Ol Papamama i Mas Wok Strong Long Mekim Wanem? Sapos i gat pasin laikim na bel isi insait long Famili Lotu, dispela bai helpim olgeta insait long famili long lainim gut ol samting bilong spirit. Sampela taim sapos i no gat ren, orait yupela i ken mekim Famili Lotu ausait long haus. Yupela i ken kisim liklik malolo namel long taim bilong Famili Lotu. Sampela famili i save kisim sampela kol dring na bisket samting bihain long taim Famili Lotu bilong ol i pinis. Long taim bilong Famili Lotu, em i no taim bilong ol papamama long krosim o stretim ol pikinini, nogat. Ol i ken yusim sampela hap taim bilong Famili Lotu long toktok wantaim ol pikinini long wanpela pasin kranki ol i lukim ol pikinini i wok long bihainim. Tasol sapos wanpela pikinini i bin mekim rong, orait i gutpela moa sapos papamama i toktok wantaim em long narapela taim, na ol i no ken stretim em long ai bilong ol narapela pikinini, nogut dispela i semim em. Famili Lotu i mas stap olsem taim bilong amamas, na dispela bai kamapim klia pasin bilong God yumi lotuim, em i God bilong amamas.—1 Tim. 1:11.
8, 9. Ol het bilong famili i ken mekim wanem?
8 Het Bilong Famili i Ken Mekim Wanem? Famili olgeta bai kisim bikpela helpim sapos het bilong famili i redi gut paslain long olgeta wan wan Famili Lotu i kamap. Em i mekim olsem long rot bilong skelim wanem ol samting famili bai stadi long en na wanem pasin ol i ken bihainim bilong mekim stadi. (Snd. 21:5) I gutpela sapos papa i kisim tingting bilong mama long dispela samting. (Snd. 15:22) Long sampela taim ating i gutpela long yupela ol het bilong famili i kisim tu tingting bilong ol pikinini long dispela samting. Sapos yupela i mekim olsem, yupela bai kisim gut save long ol samting ol pikinini i laikim na ol samting ol i tingting planti long en.
9 Long olgeta wik, bai i no gat wok long het bilong famili i lusim bikpela hap taim tru long redim ol samting bai kamap long Famili Lotu. Long wanem, i gat sampela samting insait long Famili Lotu em ol i save mekim long olgeta wik, olsem na i no gat wok long het bilong famili i redim nupela sediul long olgeta taim. Bihain long Famili Lotu i pinis, taim papa i tingting yet long ol samting em inap helpim famili long en, ating dispela em i gutpela taim bilong papa i ken redim ol samting bilong neks Famili Lotu. Sampela het bilong famili i save wokim lista bilong samting famili bai mekim long taim bilong Famili Lotu na ol i save putim lista long wanpela hap we famili i ken lukim, kain olsem long dua bilong frits. Dispela i mekim na famili bai amamas long wetim neks Famili Lotu, na tu, dispela i opim rot long famili i ken redi long neks Famili Lotu.
10. Olsem wanem ol brata na sista i stap ol yet o ol tasol i insait long tok i tru, ol inap mekim Famili Lotu bilong ol?
10 Olsem Wanem Sapos Mi Wanpela Tasol? Ol brata na sista husat i stap ol yet o ol tasol i insait long tok i tru, ol i ken mekim stadi bilong ol yet long taim bilong Famili Lotu. Bilong stadi i ken helpim ol gut, ol i ken ritim Baibel, redim ol miting, na ritim ol Wastaua na Kirap! Sampela pablisa i save mekim sampela moa stadi bilong ol yet. Sampela taim, ol inap singautim narapela pablisa o wanpela famili long bung wantaim ol na stori long sampela tok bilong Baibel we inap strongim olgeta.
11, 12. Wanem sampela gutpela samting i kamap long pasin bilong mekim Famili Lotu long olgeta taim?
11 Pasin Bilong Mekim Famili Lotu Long Olgeta Taim Inap Helpim Famili Olsem Wanem? Ol bratasista em ol i givim bel olgeta long insait long lotu i tru ol i save i go klostu moa long Jehova. Na tu, taim ol famili i mekim famili lotu wantaim, dispela i save strongim pasin bilong ol long pas gut wantaim. Tupela marit i raitim pas na stori long ol blesing tupela i kisim, na ol i tok: “Mitupela i painia na mitupela i no gat pikinini. Mitupela i save amamas tru long wetim taim bilong mekim Famili Lotu. Mitupela i pilim olsem mitupela i pas gut moa wantaim, na tu, mitupela i go klostu moa long Papa bilong yumi long heven. Long olgeta moning long de bilong mekim Famili Lotu, taim mipela i kirap, mitupela wantaim i save tok: ‘Nau nait bai yumi mekim wanem? Famili Lotu!’ ”
12 Pasin bilong mekim famili lotu i helpim tu ol famili em ol i gat planti wok. Wanpela mama wanpis husat i mekim bikpela long tupela pikinini man bilong em na em i mekim wok painia oltaim tu, em i tok: “Long pastaim, mipela i no save mekim tumas famili stadi. Mipela i save mekim wan wan taim tasol, long wanem, mi save taiet. Mi no save long olsem wanem bai mi mekim olgeta samting wantaim. Olsem na mi raitim dispela pas bilong tok tenkyu tru long Famili Lotu. Nau mipela i save mekim famili stadi long olgeta taim na dispela i bin helpim tru mipela.”
13. Wanem samting bai kamapim klia olsem Famili Lotu i helpim tru famili bilong yu o nogat?
13 Wankain olsem Sabat, Famili Lotu em wanpela presen i kam long Papa bilong yumi long heven na inap helpim ol famili. (Jems 1:17) Pasin ol famili long Israel i mekim bilong tingim Sabat, i makim olsem Sabat i bin helpim ol long pas gut moa wantaim Jehova o nogat. Olsem tasol, ol samting yumi mekim long taim bilong Famili Lotu bai makim olsem Famili Lotu i helpim gut famili bilong yumi o nogat. (2 Kor. 9:6; Gal. 6:7, 8; Kol. 3:23, 24) Sapos famili bilong yu i bihainim gut pasin bilong mekim Famili Lotu, famili bilong yu inap mekim wankain tok olsem man bilong raitim song, em i tok: “Tasol mi, mi stap klostu long yu na dispela i gutpela tru. God, Bikpela, yu banis tru bilong mi.”—Sng. 73:28.
[Rait long pes 5]
Famili Lotu i mas stap olsem taim bilong amamas, na dispela bai kamapim klia pasin bilong God yumi lotuim, em i God bilong amamas
[Blok long pes 6]
HOLIM
Sampela Samting Yu Ken Mekim Insait Long Famili Lotu
Baibel:
• Famili olgeta i ken ritim wanpela hap bilong Baibel ritim bilong wik. Sapos sampela sapta bilong Baibel ritim i gat tok bilong man bilong ritim stori, na tok bilong tupela o tripela man, orait wanpela i ken kamap olsem man bilong ritim stori na ol narapela i ken kamap olsem ol man insait long dispela stori na ritim tok ol i mekim.
• Mekim drama bilong wanpela hap bilong stori bilong Baibel em yupela i ritim.
• Makim olgeta wan wan insait long famili long ritim wanpela sapta bilong Baibel sampela de paslain long Famili Lotu. Na ol i ken raitim wanpela o tupela askim ol i gat long dispela sapta ol i ritim. Orait bihain yupela famili i ken mekim wok painimaut wantaim long ol dispela askim.
• Long olgeta wik wokim wanpela kat i gat wanpela skripsa bilong Baibel long en na soim long famili bilong ol i ken tingim dispela skripsa na stori gut long en. Bungim gut ol dispela kat na mekim riviu long en long olgeta wik bambai yupela i ken save hamas skripsa yupela inap tingim.
• Pilaim wanpela kaset bilong Baibel ritim na yupela i ken bihainim long Baibel bilong yupela yet.
Ol Miting:
• Yupela i ken redim wanpela hap bilong miting wantaim.
• Mekim traim ol singsing bilong Kingdom bai kamap long miting.
• Sapos wanpela long famili i gat tok long Skul Tiokratik o soim long hap bilong Miting Bilong Wok, orait yupela i ken stori wantaim long rot bilong mekim dispela tok o soim, o em i ken mekim traim dispela tok o soim long ai bilong famili.
Samting Famili i Ken Mekim:
• Yupela i ken skelim ol tok i stap long buk Askim Bilong Ol Yangpela o buk Kisim Skul Long Bikpela Tisa.
• Mekim soim long olsem wanem ol pikinini inap sakim wanpela hevi o traim we inap painim ol long skul.
• Papamama i ken kisim ples bilong pikinini, na pikinini i kisim ples bilong papamama. Pikinini i ken mekim wok painimaut long wanpela tok na em i ken toktok gut wantaim papamama long en.
Autim Tok:
• Mekim traim pasin bilong autim tok bilong redi long autim tok long wiken.
• Famili i ken toktok wantaim long ol mak ol i laik winim bambai ol i ken mekim bikpela wok moa bilong autim tok long taim bilong Memorial o long taim bilong holide.
• Famili i ken lusim sampela minit bambai olgeta wan wan i ken mekim wok painimaut long olsem wanem ol i ken bekim ol askim ol man i save kamapim long taim bilong autim tok, na bihain ol i ken mekim traim soim long dispela samting.
Sampela Samting Moa Ol Famili i Ken Mekim:
• Famili olgeta i ken ritim ol nupela magasin wantaim.
• Sampela de paslain long Famili Lotu, makim wan wan insait long famili long ritim wanpela stori insait long ol nupela magasin em ol i laikim, na ol i ken stori long en.
• Sampela taim yupela i ken singautim wanpela pablisa o tupela marit long bung wantaim yupela long Famili Lotu bilong yupela, na ating yupela i ken askim ol long stori long sampela gutpela ekspiriens bilong ol long wok autim tok o olsem wanem ol i bin kisim tok i tru.
• Lukim wanpela vidio bilong Sosaiti na stori long en.
• Yupela i ken stori long hap “Ol Yangpela i Laik Save” o long hap “Famili i Skelim Wantaim” i stap long Kirap!
• Yupela i ken stori long hap “Skulim Ol Pikinini Bilong Yu” o long hap “Bilong Ol Yangpela” long Wastaua.
• Yupela i ken ritim wanpela hap bilong Yearbook o wanpela nupela buk em yupela i bin kisim long kibung distrik na stori wantaim long en.
• Bihain long yupela i go pinis long wanpela kibung, mekim riviu long ol bikpela tok bilong kibung.
• Famili i ken lukim ol samting Jehova i wokim, na ol i ken stori long olsem wanem ol dispela samting i skulim ol long Jehova.
• Famili olgeta i ken wok wantaim long wanpela projek, olsem wokim wanpela mep o sat samting.