Long Olgeta Hap Bilong Graun Ol Man i Bung Bilong Tingim Indai Bilong Krais
1 Jehova i bin givim yumi planti gutpela presen. Baibel i tok, olgeta gutpela pasin em i mekim long yumi na pasin bilong em long laikim yumi, ol i gutpela “presen God i bin givim yumi.” Tru tumas, “marimari bilong God” em wanpela gutpela samting tru na taim yumi laik stori long en yumi hatwok tru.—2 Ko 9:14, 15.
2 Nambawan Gutpela Presen: Krais Jisas, Man bilong baim bek ol manmeri, em i nambawan gutpela presen tru i winim olgeta narapela presen. Jehova i laikim tumas olgeta manmeri bilong graun, olsem na em i givim dispela wanpela Pikinini tasol long yumi. (Jo 3:16) Em i givim nating dispela gutpela blesing long yumi, olsem na i stret ol man bilong olgeta hap bilong graun ol i mas tingim dispela samting. Bai yumi tingim dispela samting long wanem taim na olsem wanem bai yumi tingim? Long apinun long Fonde, Epril 1, 1999, ol Kristen long olgeta hap bilong graun bai mekim Kaikai Bilong Bikpela, olsem mekim Memorial bilong tingim dispela bikpela ofa tru i winim olgeta narapela ofa.—1 Ko 11:20, 23-26.
3 “Taim yumi stap yet olsem ol manmeri bilong mekim sin,” Krais i bin dai bilong kisim bek yumi, na long rot bilong kam long Memorial bilong tingim indai bilong em na long rot bilong singautim ol narapela long kam bung wantaim yumi, yumi kamapim bel bilong yumi olsem yumi tenkyu long dispela samting.—Ro 5:8.
4 Wanpela Bikpela Bung Tru: Bung bilong tingim indai bilong Jisas i kamapim klia olsem, Jisas i bin stap gut long wok King bilong God. Na tu, dispela bung i save helpim yumi long tingim olsem sapos yumi bilip long ofa bilong Jisas, bai yumi inap stap gut long ai bilong Jehova, na long dispela rot God inap kisim bek yumi. (Ap 4:12) Tru tumas, dispela em i wanpela bikpela bung tru!
5 Yumi laikim tru ol narapela na yumi kamapim klia dispela samting taim yumi singautim ol long kam bung wantaim yumi bilong mekim Kaikai Bilong Bikpela. Ofa bilong Krais inap helpim planti milion manmeri em ol i kisim save long dispela gutpela samting tru. (Fl 3:8) Ol manmeri i bilip long ofa bilong Krais, ol inap bilip tru olsem ol inap kisim laip oltaim.—Jo 17:3.
6 Taim bilong Memorial em wanpela gutpela taim tru bilong kamapim klia olsem yumi pilim tru dispela bikpela pasin marimari bilong God. Em wanpela gutpela taim tru bilong yumi ken givim bel tru long autim gutnius bilong Kingdom bilong God. Ol man i beten na tingim gut dispela gutpela presen God i bin givim yumi na stretim rot bilong kam long bung bilong mekim Kaikai Bilong Bikpela long dispela yia, ol bai kisim planti blesing!