Olgeta Man i Mas Bilip Long Tok Bilong God!
1 Planti milion manmeri i wok long stadi long Baibel wantaim ol Witnes Bilong Jehova. Bilong helpim ol long kisim laip oltaim ol i mas larim tok bilong God i “sutim bel” bilong ol, olsem i bin sutim bel bilong ol dispela 3,000 manmeri i bin tanim bel na kisim baptais long de Pentikos long yia 33 C.E. (Ap 2:41) Dispela i givim wanem wok long yumi long nau?
2 Yumi mas helpim ol Baibel-stadi bilong yumi long kisim pasin bilong givim bel long Jehova. (1 Ti 4:7-10) Bilong helpim yumi long mekim olsem, pepa yumi kisim wantaim Wok Kingdom bilong Jun 1996, paragraf 20, i tok: “Taim yu stadi wantaim em, wok long painim rot bilong helpim em long pilim tru ol gutpela pasin bilong Jehova. Kamapim bel bilong yu olsem yu yet yu gat wanem tingting long God. Helpim sumatin long go klostu long Jehova olsem gutpela pren bilong em.”
3 Bikpela Wok Bilong Yumi: Planti manmeri, em lotu giaman i paulim ol, ol i amamas long bihainim wanpela lotu em i no strong long ol i mas lusim bikpela hap taim na strong bilong ol na senisim pasin bilong ol. (2 Ti 3:5) Bikpela wok bilong yumi em long helpim ol Baibel-stadi long save, bilong lotu tru long God, ol i no ken harim tasol tok bilong God, nogat; ol i mas mekim sampela samting moa. Ol i mas bihainim ol tok ol i kisim save long en. (Je 1:22-25) Sapos ol i bihainim sampela pasin God i no laikim, ol i mas save olsem ol i gat wok long “senisim” na bihainim pasin em i save laikim. (Ap 3:19) Bilong kisim laip oltaim, ol i mas “taitim bun tru” na sanap strong long tok i tru.—Lu 13:24, 25.
4 Taim yutupela i stori long ol stretpela pasin Kristen yumi mas bihainim, askim Baibel-stadi em i gat wanem tingting long ol dispela pasin, na em i mas mekim wanem sapos em i save em i mas senisim wanpela pasin bilong em. Stiaim tingting bilong em i kam long dispela oganaisesen i wok long skulim em long tok i tru, na strongim em long kam long ol miting bilong kongrigesen long olgeta taim.—Hi 10:25.
5 Yumi mas tingting long skulim ol Baibel-stadi bilong yumi na putim tok i go daun long bel bilong ol. Bai yumi amamas taim yumi kirapim ol nupela long bilip long tok bilong God na kisim baptais!—1 Te 2:13.