“Dispela Woa Em Woa Bilong Pinisim Olgeta Woa”
‘Mi tok promis long yupela, dispela em i laspela woa —em woa bilong pinisim olgeta woa.’ —WOODROW WILSON, PRESIDEN BILONG AMERIKA (1913-21).
EM TINGTING bilong wanpela bikman long taim Wol Woa 1 i pinis olsem 90 yia i go pinis. Dispela pait i bin kamap long olgeta hap em wanpela pait nogut tru—laip bilong planti man i bin lus—olsem na ol man i winim pait i gat bikpela laik long bilip olsem dispela pait i mas pinisim olgeta pait na kamapim gutaim tru. Tasol ol woa i no save pinisim ol hevi, na i no inap tru long pinisim ol hevi i save kamapim woa.
Inap 20 yia bihain long Presiden Wilson i mekim dispela promis, Wol Woa 2 i kamap. Dispela woa i bagarapim planti samting tru na kilim i dai planti manmeri moa, winim bilong Wol Woa 1. Ol nupela save ol man i bin kisim insait long dispela 20 yia i bin inapim ol long kilim i dai bikpela lain manmeri. Long pinis bilong Wol Woa 2, ol hetman bilong graun i luksave olsem woa inap kamap gen.
Long 1945, Jeneral Douglas MacArthur bilong Amerika i tok: “Woa i no stap moa olsem rot bilong pinisim ol hevi. Sapos yumi no kamapim narapela rot bilong stretim ol hevi, Armagedon bai kamap.”
Jeneral MacArthur i save pinis long samting 2-pela bom nuklia i bin mekim long Nagasaki na Hiroshima long laspela hap bilong Wol Woa 2. Bikpela bagarap tru i bin painim dispela tupela taun bilong Japan, na dispela i bin kirapim MacArthur long givim nupela mining long dispela tok “Armagedon.” Em i tok Armagedon i makim bikpela pait nuklia.
Ol man i pret yet olsem wanpela bikpela pait nuklia bai kamap. Long 1960 samting, ol bikpela gavman bilong graun i kamapim wanpela plen. Ol i tok, sapos olgeta wan wan gavman i gat planti bom, inap long bagarapim 25 pesen bilong ol manmeri long kantri i birua long ol, na 50 pesen bilong ol faktori, orait dispela bai mekim na ol kantri bai pret long kirapim pait. Tasol dispela plen bilong kirapim ol lain long sindaun gut wantaim i no mekim gut bel bilong ol man.
Long nau, ol man i wok yet long wokim planti bom nuklia, na ol pait i kamap namel long sampela kantri i wok yet long kilim i dai planti manmeri. I gat rot yet long pait nuklia inap kamap. Maski ol manmeri i laik bai i no gat woa moa, ol i no bilip olsem woa em i rot bilong pinisim olgeta woa.
Tasol Baibel i stori long wanpela pait i narakain olgeta na em bai pinisim olgeta woa. Nem bilong dispela pait em “Armagedon”—em dispela nem ol man i ting i makim wanpela pait nuklia. Tasol olsem wanem Armagedon inap pinisim woa? Stori i kamap bihain long dispela bai bekim dispela askim.
[Piksa Kredit Lain long pes 3]
DTRA Photo
[Piksa Kredit Lain long pes 4]
Nagasaki, Japan, 1945: USAF photo