Baibel i Tok Wanem Long Nuklia Woa?

Yumi stap long taim we toktok bilong nuklia woa i pretim ol man bikos ol strongpela kantri long graun i holim yet ol nuklia bom o ol i wok long wokim planti moa. I stret ol man i wari na tingting planti olsem nogut nuklia woa i kamap bikos nau i gat planti nuklia bom. Ol man i pret tu olsem sapos wanpela kantri i yusim wanpela liklik nuklia bom, dispela inap statim wanpela ful nuklia woa we bai bagarapim olgeta samting long graun. Nius Bulletin of the Atomic Scientists i tok yumi stap long haptaim we “nuklia woa inap kamap wantu tasol.”

Yu ting nuklia woa inap kamap? Sapos olsem, yu ting graun bai stap gut yet? Na hau bai yumi karim hevi bilong tingting planti long nuklia woa? Baibel i tok wanem?

Long dispela atikol

• Baibel i stori long nuklia woa?

• God bai larim nuklia woa i kamap?

• Graun bai stap gut yet?

• Hau bai yu karim hevi bilong “tingting planti long nuklia woa”?

• Baibel i tok profet long nuklia Armagedon?

• Baibel i tok wanem long pinis bilong woa?

• Yu ting tok bilong buk Revelesen long Baibel i makim nuklia woa?

Baibel i stori long nuklia woa?

Baibel i no tok stret olsem bai i gat nuklia woa. Tasol toktok bilong yusim nuklia bom i kamap bikos long pasin na ol samting i kamap long graun olsem Baibel i tok profet long en.

Tingim ol samting i kamap long nau na skelim wantaim ol dispela ves bilong Baibel:

Ol ves bilong Baibel: Ol disaipel i askim Jisas: “Wanem sain bai kamap bilong soim olsem yu kam i stap na pinis bilong dispela taim i kamap pinis?” Jisas i bekim tok olsem: “Wanpela kantri bai pait long narapela kantri na wanpela kingdom bai pait long narapela kingdom.”​—Matyu 24:3, 7.

Ol samting i kamap: Ol kantri, dispela i makim tu ol kantri i gat ol nuklia bom, i save pait.

“I gat planti pait tru i kamap long graun insait long sampela yia nau: namba bilong pait i kamap long graun i go antap tru.”​—The Armed Conflict Location & Event Data Project.

Ves bilong Baibel: “Long taim bilong pinis, king bilong saut bai insait wantaim [king bilong not] na ol bai subim narapela narapela.”​—Daniel 11:40.

Ol samting i kamap: Ol kantri i birua long narapela narapela na ol kantri we i sapotim ol, ol i resis long husat bilong ol bai kamap strong moa, na dispela i stret long tok profet bilong Baibel. Maski ol kantri i gat planti nuklia bom i no pait stret long narapela narapela, tasol ol i wokim planti nuklia bom na mekim i kamap strong moa.

“Yumi wok long lukim ol kantri i kros pait long narapela narapela insait long 10-pela yia i go pinis, na tu, sampela bilong ol strongpela kantri long graun i sapotim ol.”​—The Uppsala Conflict Data Program.

Ol ves bilong Baibel: “Tasol yu mas save olsem, long taim bilong las de, taim nogut bai kamap na dispela bai givim hatwok long ol man. Ol man bai . . . i no laik kamap wanbel, ol bai bagarapim gutnem bilong ol arapela, ol bai i no gat pasin bilong bosim bel, ol bai kamap wail olgeta.”​—2 Timoti 3:1-3.

Ol samting i kamap: Wankain olsem planti manmeri long nau, ol lida bilong ol kantri i no laik wanbel long ol samting. Ol i no laik bihainim pasin isi long stretim hevi, nogat. Ol i traim long pretim ol narapela o fosim ol narapela bilong stretim hevi. Dispela kain pasin i mekim na em isi moa long ol i kirapim nuklia woa.

“Sapos i no gat wei bilong strongim pasin bilong wok bung wantaim, pait bai i go bikpela moa.”​—S. Saran na J. Harman, World Economic Forum.

God bai larim nuklia woa i kamap?

Baibel i no mekim dispela tok. Tasol em i tok olsem “ol manmeri bai lukim ol samting i mekim ol i pret,” o ol samting i kamap bai pretim ol, long taim bilong yumi. (Luk 21:11) Eksampel bilong ol dispela samting em ol atomik bom ol i dropim long Wol Woa 2. Baibel i kamapim klia wai na God i larim ol woa i kamap. Sapos yu laik kisim sampela save moa long dispela, watsim vidio Bilong Wanem God i Larim Pen na Hevi i Stap?

Graun bai stap gut yet?

Yes. Maski ol man i yusim gen nuklia bom, God i no inap larim ol man i yusim ol dispela samting inap long graun na olgeta samting i stap long en i bagarap. Baibel i tok olsem i no gat wanpela samting bai kamap na bagarapim graun olgeta na ol man bai stap oltaim long en.

Sampela man i ting olsem, long bihain, wan wan man tasol bai stragol long stap laip long graun em nuklia bom i bagarapim. Tasol Baibel i tok ol samting i bagarap long graun long taim bilong woa bai kamap gutpela gen.

Krieta bilong yumi i wokim graun long wei we graun i ken stretim em yet. Tasol God bai yusim strong bilong em long stretim gen ol samting long graun i bagarap; graun bai stap oltaim olsem naispela ples tru bilong ol manmeri i ken i stap long en.​—Buk Song 37:11, 29; Revelesen 21:5.

Hau bai yu karim hevi bilong “tingting planti long nuklia woa”?

Ating sampela manmeri i karim hevi bilong “tingting planti long nuklia woa,” em ol i kolim olsem “pret bilong nuklia woa na hevi bilong en.” Ol tok promis bilong Baibel inap helpim ol manmeri i gat dispela hevi long daunim pasin bilong pret. Hau?

Baibel i stori long gutpela samting bai kamap long graun long bihain na ol manmeri husat bai stap long en. Taim yumi kisim sampela save moa long ol dispela tok promis, dispela bai stap olsem “anka bilong laip bilong yumi,” na yumi no tingting planti na pret. (Hibru 6:19) Yumi ken daunim tu pasin bilong tingting planti na pret taim yumi tingim tasol ol samting bilong wan wan de, na yumi no lusim bikpela haptaim long tingting planti long wanem samting bai kamap bihain. Olsem Jisas i tok, “hevi bilong wanpela de em inap long dispela de tasol.”​—Matyu 6:34.

Yes, em i bikpela samting long yumi wan wan i lukautim yumi yet na bai yumi no tingting planti na yumi stap bel isi. Yumi ken mekim olsem taim yumi no lusim bikpela taim long lukim, ritim, o harim ol samting we i mekim yumi pret na tingting planti, olsem ol stori, tok bilong samting bai kamap bihain, na tingting ol man i kamapim long ol nupela infomesen bilong ol nuklia bom. Dispela i no makim olsem yumi no bilip olsem i gat hevi bilong nuklia bom i stap, nogat. Em makim olsem yumi mekim ol samting bilong lukautim tingting bilong yumi na bai yumi no tingting tumas long ol samting we yumi no inap kontrolim o ol samting we i no inap kamap.

Yusim taim bilong yu long tingim ol gutpela samting long laip bilong yu na i no ol nius nogut.

Taim yu kisim sampela save moa long ol tok promis bilong God, dispela bai givim yu hop, amamas, na bel isi.

Baibel i tok profet long nuklia Armagedon?

Sampela man i ting Armagedon i makim nuklia woa bai kamap long graun olgeta. Olsem na ol i tingim bikpela bagarap tru em dispela kain woa bai kamapim.

Tasol Baibel i yusim dispela tok “Armagedon” bilong makim pait we bai kamap namel long “ol king bilong olgeta hap graun,” o ol gavman bilong ol man long graun, na God.a (Revelesen 16:14, 16) Armagedon em i no wanpela bikpela bagarap we bai kamap kwiktaim na ol pipia bilong nuklia bom bai stap nabaut long graun, nogat. Long Armagedon, God bai bagarapim tasol ol man nogut, na dispela bai kamapim gutpela sindaun na bel isi tru.​—Buk Song 37:9, 10; Aisaia 32:17, 18; Matyu 6:10.

Baibel i tok wanem long pinis bilong woa?

God Jehovab bai soim strong bilong em long ol kantri i save pait taim em i stopim ol long pait na bagarapim ol samting bilong pait ol i gat. God bai yusim Kingdom bilong em long mekim olsem, em wanpela gavman long heven we bai bosim graun na ol samting i kamap long graun.​—Daniel 2:44.

Kingdom Bilong God bai skulim ol manmeri long rot bilong i stap bel isi na i stap wanbel wantaim. Wanpela gavman tasol bai bosim graun olgeta, olsem na kros pait bai i no stap moa; ol man bai i no skul moa long pait! (Maika 4:1-3) Wanem samting bai kamap? “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”​—Maika 4:4, Buk Baibel.