Pait Nuklia i No Inap Kamap!
GOD i no laik bai ol man i pret nogut oltaim. Em i “as bilong pasin tru bilong amamas,” olsem na em i laik bai ol man i stap bel isi na i stap gutpela, olsem i stap amamas. (1 Timoti 1:11) Tasol i gat ol samting nogut bilong nuklia na ol i no inap i stap olsem.
“Gutpela Taim” i Giaman
Yumi save, planti samting i stap yet em inap kamapim pait nuklia. Tasol maski i gat ol hevi bilong wok politik, na wok bisnis, na ol man i no sindaun gut, planti lain i ting, gutpela taim bai kamap. Kirap long yia 1986, em Yunaitet Nesen i makim olsem Intenesenel Yia Bilong Gutaim, ol man i bin wok long mekim ol samting bilong abrusim pait nuklia.
Insait long 10-pela yia i go pinis, wanpela nius (The Bulletin of the Atomic Scientists) i surikim han bilong klok bilong las de i lusim 3-pela minit paslain long 12 klok biknait na i go bek long 10-pela minit paslain—em pasin bilong ol long makim taim ol i ting pait nuklia bai kamap. Na long yia 1989, wanpela lain (Stockholm International Peace Research Institute) ol i tok, “nau, winim olgeta narapela yia bihain long Namba 2 Pait Bilong Olgeta Hap, i gat as na yumi ken ting, bai ol man inap stretim ol kros, na pait i no ken kamap.”
Na ol i givim strong long Yunaitet Nesen bilong stretim hevi long narapela narapela kantri. Tru, wok bilong en i no kamap gutpela olgeta, tasol i gutpela liklik, olsem na planti man i ting gutpela taim bai kamap. Na ating bihain bai sampela wok moa i kamap gutpela. Na bai ol man i strong moa long tok, “Nau em i gutpela taim tru. Yumi stap gut.” Na ating planti man bai bilipim.
Tasol lukaut! “Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol, olsem pen i save kamap long meri i laik karim pikinini. Na ol bai i no inap abrusim dispela samting.” Olsem na taim ol i mekim dispela tok, em i taim bilong God bilong “bagarapim ol man i bin bagarapim graun [long nuklia o narapela samting].”—1 Tesalonaika 5:3, 4; KTH 11:18.
Baibel i no tok, ol lain man bai kamapim tru “gutpela taim,” tasol ol bai toktok long en long narapela kain pasin, olsem ol i bilip tru em bai kamap. Bai i olsem rot i op moa yet na klostu tru bai gutpela taim i kamap. Maski ol samting em inap kamapim pait nuklia em i stap yet, bai ol lain man i giamanim bel bilong ol na ting, gutpela taim i kamap. Tasol em i no kamap tru.
Tasol dispela i no ken giamanim ol Kristen tru. Ol i wetim gutpela taim i winim tru gutpela taim ol man inap kamapim!
Gutpela Taim i Kamap Tru
Song 4:8 i tok, gutpela taim tru inap kamap long wanpela rot tasol, em rot God Jehova i makim: “Bikpela, yu tasol yu save lukautim mi na mi stap gut. Mi no save pret long wanpela samting.” Sapos tok long gutpela taim i kamap long narapela rot, i no long rot bilong Kingdom bilong God, dispela em i giaman tasol. Em i no inap helpim yumi oltaim oltaim.
Kingdom bilong God, em Krais i bosim, em i no ken mekim hap wok tasol. Dispela gavman bilong God i no ken mekim tasol na bai i no gat planti bom nuklia, nogat; em bai pinisim tru olgeta bom nuklia na olgeta narapela samting bilong pait. Song 46:9 i tok promis olsem: “Em i save mekim i dai pait long olgeta hap graun. Em i save brukim olgeta banara na spia, na i save kukim ol hap plang long paia.”
Na ol traipela masin bilong wokim nuklia em ol i no wok gut, na ol pipia bilong nuklia, olgeta bai pinis. Sapos nogat, bai dispela tok i no stret: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.” God i no save giaman, olsem na yumi ken bilipim tok bilong em.—Maika 4:4; Taitus 1:2.
Yu laik i stap long kain gutpela taim olsem na bai yu no pret moa long pait nuklia? Yu inap i stap long en, long wanem, Baibel i makim ol samting yu mas mekim. Sapos yu kisim save long ol dispela tok na yu bihainim, bihain bai yu inap amamas na tok: “Gutpela tru! Tru tru pait nuklia i no inap kamap!”
[Piksa long pes 7]
Gutaim bai stap long nupela taim God bai kamapim; no gat ol samting nogut bilong nuklia
[Kredit Lain]
M. Thonig/H. Armstrong Roberts
[Piksa Kredit Lain long pes 6]
U.S. National Archives photo