Bel Isi i Kam Long God—Wanem Taim Bai i Kam?
“God, em i as bilong bel isi, liklik taim bai em i krungutim Seten i go aninit long lek bilong yupela”−ROM 16:20.
1, 2. (a) Wanpela saveman bilong lotu Hindu i tok wanem long pait na long pasin bilong i stap bel isi? (b) Husat ol i kisim bel isi i kam long God na ol i ken amamas?
WANPELA saveman bilong lotu Hindu, em Mohandas Gandhi, em i tok, “Sapos ol man i no lusim pasin longlong bilong resis long hipim planti samting bilong pait, bai bikpela bagarap tru i kamap, winim olgeta bagarap i bin kamap long bipo. Na maski wanpela lain i winim pait, tasol bai dispela lain i bagarap na i stap nogut tru.” Dispela tok em i mekim long yia 1938 i makim samting i mas kamap bihain.
2 Paslain long dispela taim, olsem long yia 1931, Gandhi i bin tokim nambawan gavman bilong Englan long India: “Taim lain bilong yu na lain bilong mi i wok wantaim long bihainim ol tok Krais i mekim long Maunten, long dispela taim bai yumi stretim pinis olgeta hevi bilong lain bilong mi na lain bilong yu na bilong olgeta lain bilong graun.” Olsem dispela saveman i tok, ol dispela tok bilong Jisas i makim rot bilong bel isi bilong oltaim i ken kamap. Taim Jisas i mekim ol dispela tok long Maunten, em i tok: “Ol man i save mekim dai ol kros na pait, em ol i ken amamas. Bai ol i kolim ol pikinini bilong God.” (Matyu 5:9) Planti “pikinini” ol i kisim pinis dispela bel isi i kam long God. Na bihain olgeta man i gat pasin daun bai ol i “sindaun gutpela tumas na amamas i stap.” Bai ol i stap bel isi tru. (Sam 37:11) Tasol olsem wanem yumi ken save, dispela samting bai kamap tru?
3 Long nau planti man i pret. Ol i no inap i stap bel isi tru, long wanem ol i save, bagarap inap painim olgeta manmeri i stap long dispela graun. Wanpela ripot bilong nau i tok: ‘Ol man i mekim pasin longlong tru−Namba Tu Pait Bilong Olgeta Hap i pinis na bihain ol i tromoi 3-4 trilion kina long wokim planti bom samting bilong nuklia na sapos ol i mekim wok long en bai olgeta manmeri i bagarap. . . . Ol bom nogut bilong nuklia ol i hipim i stap i gat bikpela strong tru inap long kilim i dai 58 bilion manmeri, o bilong kilim i dai olgeta man, em nau ol i stap laip, inap 12-pela taim.’a Na ol i resis yet long hipim planti bom moa. Ol i ting olsem sapos ol i holim planti samting bilong pait bai narapela lain i pret long kirapim pait long narapela lain. Dispela tingting i mekim na ol i stap bel isi liklik. Tasol ol i mekim pasin longlong tru na dispela bel isi i no kam long God.
4 Olgeta samting long dispela graun i go nogut. No gat wanpela taim bipo em i kain olsem dispela taim nau. Long nau planti man bilong wok politik ol i mekim ol pasin giaman, na ol man nogut i stil na bagarapim man, na i gat bikpela bikpela hevi long mani na long wok bisnis, na planti man tru i givim baksait long God, na i gat planti lotu tumas na ol man i longlong nabaut. Tru tumas, long nau “olgeta samting God i bin wokim, dispela olgeta i pilim pen olsem meri i laik karim pikinini. Na olgeta i krai nogut i stap.” Tasol God i tok promis olsem: Bai em i “tekewe olgeta [man em i bin wokim] long dispela kalabus bilong bagarap nau ol i stap long en,” na bai ol i stap gutpela tumas olsem ol pikinini bilong Em. (Rom 8:21, 22) Olgeta dispela manmeri i laikim tumas pasin bel isi na ol i lotuim God bilong Baibel, em Nambawan Bikpela Jehova, ol inap i stap gutpela tumas olsem. Bel isi tru, em bel isi bilong i stap oltaim, em bai mekim na bai ol inap i stap gutpela olsem. (Esikiel 37:26-28) Tasol wanem taim bai dispela bel isi i kam? Na em bai kamap olsem wanem?
Tingting Bilong God “long De na long Taim”
5 Aposel Pol i mekim isi bel bilong ol Kristen long Tesalonaika; em i helpim ol long save taim bilong kirap bek em i samting bilong taim “Bikpela [Jisas] i kam bek.” Na bihain em i tok: “Ol brata, mipela i no gat wok long raitim pas na tokim yupela long de na long taim bilong dispela samting.”−1 Tesalonaika 4:15; 5:1.
6 Olsem wanem? Ating dispela tok bilong aposel i makim olsem ‘de na taim’ i no bikpela samting long God? Nogat tru! (Eklisiastis 3:1) Baibel i tok “taim inap pinis, orait God i salim Pikinini bilong en i kam.” Taim 69 “wik” o 483 yia i pinis, long taim stret olsem God i bin makim, Jisas i kam long graun. Na Jisas i mekim wok bilong em long graun inap tripela yia hap−kirap long 29 C.E. i go inap long 33 C.E.−olsem ol profet bilong God i makim pinis. (Galesia 4:4; Danyel 9:24-27) Stret tru long pinis bilong taim bilong “ol man bilong ol arapela lain,” long yia 1914, God i putim Jisas i stap King long “Jerusalem i stap long heven.” (Luk 21:24; Hibru 12:22; Esikiel 21:27; Danyel 4:31, 32) Na taim bilong “bikpela hevi tru” bai kamap long “dispela de na dispela aua” Jehova i makim pinis. “Em i no ken i kam bihaintaim.”−Matyu 24:21, 36; Habakak 2:3, NW.
7.Tasol long dispela taim i no gat wok long Pol i raitim sampela tok “long de na long taim,” long wanem ol dispela Kristen long Tesalonaika i bilip tru olsem ol i stap long “taim” bilong pinis bilong pasin na lo samting bilong ol Juda. Dispela pasin i pinis 20 yia bihain, olsem long yia 70 C.E. Ol dispela Kristen i soim gutpela pasin long olgeta bilipman, long wanem ol i wok strong tru na ‘spirit holi i kirapim ol na ol i amamas.’ (1 Tesalonaika 1:4-7) Olsem tasol ol Witnes Bilong Jehova long nau i bilip tru olsem ol pait bilong olgeta hap na ol narapela hevi i bin kamap long graun kirap long yia 1914, ol dispela samting i olsem “mak” bilong Jisas i kam bek pinis na em i stap king pinis long Kingdom bilong heven.−Matyu 24:3-8; 25:31.
8 Bihain aposel i strongim ol brata Kristen bilong em, em i tok: “Yupela yet i save pinis, De bilong Bikpela bai i kamap olsem stilman long nait.” (1 Tesalonaika 5:2) Tru, yumi no save wanem de stret o wanem aua stret dispela De bai i kam, tasol dispela De bilong givim strafe long ol man nogut i wok long i kam klostu klostu. Wantu bai em i kam, long taim stret olsem God i makim pinis. Olsem na yumi mas was i stap na mekim wok.−Luk 21:34-36.
Strongpela Singaut long Gutaim
9 “Em i gutaim nau, yumi stap gut.” Long ves 3 Pol i tokim yumi long wanpela tok ol man bai mekim taim Krais i “kam bek” pinis na i stap king. (1 Tesalonaika 5:3) Olsem wanem? Klostu nau bai yumi harim dispela singaut? Husat i mekim dispela singaut long gutaim? I no ol disaipel bilong Krais. Nogat. Long wanem Jisas i tok, ol disaipel bilong em na Kingdom bilong em “i no bilong dispela graun.” (Jon 15:19; 17:14, 16; 18:36) Ol man i mekim dispela tok o singaut ol i man bilong dispela graun na ol i birua long Kingdom bilong God i laik i kam. Ol i bilong dispela graun em Seten i stap “het” bilong en. (1 Jon 5:19) Olsem ol hetman bilong gavman na bilong lotu long taim bilong Jeremaia, ol dispela man tu bai autim tok i “kamap long tingting bilong bel bilong ol yet.” Bai ol i tok, “Gutaim bai kamap na bai yupela i stap bel isi,” na ol i kranki na ol i tok, God i as bilong dispela gutaim na bel isi. Tok bilong ol i giaman tru!−Jeremaia 23:16, 17, 19, 20, NW
10 I gat sampela samting i kamap pastaim na bihain bai ol i tok, “Em i gutaim nau, yumi stap gut.” Long 1920, bihain long Bikpela Pait, em Namba Wan Pait Bilong Olgeta Hap, ol i kamapim dispela oganaisesen ol i kolim Lig ov Nesen. Wok bilong dispela oganaisesen em bilong pinisim pait long graun inap long olgeta taim bihain. Tasol Namba Tu Pait Bilong Olgeta Hap i kirap na i olsem Lig ov Nesen i go daun insait long wanpela hul i no gat as. Tasol long Oktoba 24, 1945 ol i kirapim bek dispela oganaisesen na ol i kolim Yunaitet Nesen. (Skelim tok bilong Revelesen 17:8.) Nambawan wok bilong en em bilong “kalapim gutaim na helpim olgeta manmeri long i stap gutpela na i stap bel isi.” Ol man i kamapim dispela oganaisesen i tok, ol i tingting strong ‘long helpim ol lain i kalap bihain bambai pait i no ken bagarapim ol.’ Olsem wanem? Wok bilong Yunaitet Nesen i kamap gutpela? Yu ting ol i bin kamapim gutaim long graun na helpim olgeta manmeri long i stap gutpela na i stap bel isi?
11 Tru, ol man i kamapim Yunaitet Nesen ol i laik mekim gutpela wok, tasol dispela oganaisesen, olsem Lig ov Nesen long pastaim, i no inap mekim dispela wok ol i laik bai em i mekim. Ol lain man i hipim planti bom nogut bilong nuklia na i olsem ol i sindaun antap long wanpela bikpela dram dainamait i laik pairap. Long Epril 1986 wanpela faktori long Rasia (long Chernobyl), em bilong wokim nuklia, em i bagarap na win i karim marasin nogut bilong nuklia i go nabaut long planti hap bilong Yurop. Olsem na yumi save, maski ol i mekim wok long nuklia bilong helpim ol man, tasol em i gat bikpela strong na em inap bagarapim ol man. Ol wansolwara bilong yumi i strong long ol bikpela gavman i no ken mekim wok long ol samting bilong nuklia long hap bilong ol o karim i kam long hap bilong ol. Tasol sapos pait i kirap na ol lain man i mekim wok long ol bom nuklia bilong ol, bai i no gat wanpela man em inap abrusim bagarap; bagarap bai painim olgeta manmeri long olgeta hap bilong graun.
Gutaim Inap Kamap o Nogat?
12 Yunaitet Nesen i save hevi i go bikpela, olsem na ol i makim yia 1986 i olsem Yia Bilong Gutaim long olgeta hap. Ol lain man i gat kain kain tingting long dispela samting. Planti ol i helpim dispela wok Yunaitet Nesen i mekim, tasol ol i save, pait nuklia inap kamap na bai i no gat gutaim na ol man i no inap i stap gutpela. Na i gat planti pait i stap yet long ol narapela narapela hap bilong graun. Bihain long Namba Tu Bikpela Pait i gat 150 samting liklik pait i bin kamap long graun. Winim 30,000,000 manmeri i dai long ol dispela pait. Yu ting i gat wanpela lain i bihainim tru tok bilong Aisaia 2:4, em ol i raitim long wanpela banis long hap bilong Yunaitet Nesen?
13 O1 lotu i strong long helpim dispela Yia Bilong Gutaim bilong Yunaitet Nesen. Pop John Paul Namba 2 i makim Janueri 1, 1986 i olsem de bilong olgeta manmeri long olgeta hap ol i mas tingim gutaim, na em i kirapim ol bikman bilong gavman long i go pas long mekim ol wok bilong kamapim gutaim long olgeta hap bilong graun. Na em i singautim olgeta lotu i go bung long Asisi, long Itali, bilong mekim beten insait long dispela Yia Bilong Gutaim. Asbisop bilong Kanteberi, em i hetman bilong Sios Bilong Englan, na sampela lain bilong lotu Buda, ol i amamas long dispela samting. Kaunsil Bilong Ol Sios Bilong Olgeta Hap i mekim wanpela tokaut long dispela Yia Bilong Gutaim na ol i tok, nau tasol ol lain man i mas kirap lusim ol samting bilong pait ol i wokim long nuklia.
14 Tasol “God, em i as bilong bel isi,” em i gat wanem laik long wok bilong kamapim ‘gutaim bambai ol man i ken i stap gut’? Olsem wanem? Baibel, em Tok profet bilong God, i tok ol man o ol lain bilong dispela graun, em ol i gat sin, ol inap kamapim gutaim na helpim olgeta manmeri long i stap gutpela na i stap bel isi? Nogat tru! Bilong “mekim tru” dispela wok, Jehova yet i mas mekim long pasin i stret wantaim stretpela pasin bilong em na bilong litimapim nem bilong em.−Aisaia 55:11, NW, 61:11.
Bagarap i Laik Painim Ol Kwiktaim
15 Aposel Pol i tokim yumi long ol samting i laik kamap. Em i tok: “Bai ol i tok, ‘Em i gutaim nau, yumi stap gut.’ Long dispela taim tasol samting bilong bagarapim ol bai i kamap kwiktaim long ol, olsem pen i save kamap long meri i laik karim pikinini. Na ol i no inap abrusim dispela samting.”−1 Tesalonaika 5:3.
16 Taim yumi kaunim dispela tok pastaim, ating yumi kirap nogut long en. Tasol Baibel i kamapim gut as bilong en. Pasin bilong ol lain man long nau i no olsem pasin bilong God. (Aisaia 55:8, 9) God i larim ol kain kain gavman bilong ol man i stap bilong stretim bikpela tok Seten i bin kamapim inap olsem 6,000 yia bipo. Seten i pulim namba wan tumbuna papamama bilong yumi long mekim pasin bikhet long God na em i tok, i no gat wok long God i bosim ol man; ol i ken bosim ol yet.−Jenesis 3:4, 5.
17 Bihain, inap sampela tausen yia, God i bin larim ol man i kamapim kain kain gavman hia long graun. Maski ol dispela gavman i stap inap liklik taim tasol o ol i stap inap planti handet yia, tasol i no gat wanpela i bin kamapim gutaim tru long olgeta hap bilong graun na helpim olgeta manmeri long i stap gutpela na i stap bel isi. Maski i gat wanem kain gavman, tasol pait na pasin nogut na pret na i dai i wok yet long bagarapim ol man. Long bipo yet “man i bin bosim man na mekim nogut long em.” (Eklisiastis 8:9, NW ) Na i wankain tasol long nau. Ol man i save long dispela tok i bin kamap, nau ol inap mekim tok wankain olsem profet bilong God long bipo, em i tok: “O Jehova, mi save tru, ol man bilong graun ol i no inap bosim wokabaut bilong ol. I no wok bilong man long bosim wokabaut bilong em.”−Jeremaia 10:23, NW.
18 Taim bilong stretim dispela bikpela tok em i klostu pinis. Gavman bilong God tasol inap kamapim gutaim tru na helpim olgeta manmeri long i stap gutpela na i stap bel isi. Tasol taim ol lain man i tok, “Em i gutaim nau, yumi stap gut,” ol i no laik bai gavman bilong God i bosim ol. Nogat. Ol i laik bosim yet graun long laik bilong ol yet. Tasol taim pinis! Ol lain man i save, kwiktaim ol i mas mekim sampela samting, nogut pait nuklia i kamap na bagarapim dispela graun na olgeta manmeri i stap long en. Olsem na ol bai mekim ol samting olsem Jeremaia i tok profet long en, em i tok: “O1 i no tingim tumas pasin nogut lain bilong mi i mekim na ol i tok, ‘Gutaim i kamap! Gutaim i kamap!’ tasol i no gat gutaim.” Tok bilong ol bai lus nating tasol!−Jeremaia 6:14, NW; 8:11, 15.
Pinis Tok Profet i Makim
19 Aposel Pol i tok: “samting bilong bagarapim ol bai i kamap kwiktaim long ol.” Na Aisaia, em wanpela profet bilong God, em i tok: “Harim! Ol bikman bilong ol i singaut long rot; ol man bilong bringim tok bilong gutaim bai ol i krai nogut.” (Aisaia 33:7, NW ) Planti taim Baibel i tok, wantu tasol bai strafe bilong Jehova i painim ol lain nogut na ol man nogut, long wanpela taim ol i no bin tingim−tru tumas, dispela De bilong Jehova bai kamap “olsem stilman long nait.” (1 Tesalonaika 5:2, 3; Jeremaia 25:32, 33; Sefanaia 1:14-18; 2 Pita 3:10) Taim bai kamap na bai ol man bilong dispela graun i tokaut strong olsem gutaim i kamap na ol i stap gutpela. Long dispela taim wantu tasol bai “De bilong Bikpela” i kamap na bai ol man i pret. Tasol lain bilong God bai ol i stap gut long ples hait Jehova i putim, long wanem ol i save pinis dispela tok olsem “Em i gutaim nau, yumi stap gut,” em i giaman tasol.−Sam 37:39, 40; 46:1, 2; Joel 3:16.
20 Baibel, em Tok bilong God, i makim wok bilong Lig ov Nesen na senis bilong en, em Yunaitet Nesen, em i olsem wok bilong wanpela “retpela wel abus” i gat 7-pela het (dispela i makim ol bikpela gavman em i kamap long en) na 10-pela kom (dispela i makim ol gavman nau ol i helpim em). Baibel i makim olsem dispela “wel abus” em i wanpela “wel abus” politik, olsem “laion” i makim Englan na “bea” i makim Rasia. Wanpela meri i sindaun antap long dispela “wel abus.” Dispela meri em i “Bikpela taun Babilon, em mama tru bilong olgeta pamukmeri, na bilong olgeta pasin nogut tru long graun.” (Revelesen 17:3-8) Dispela tok i kamapim gut tingting bilong Jehova long lotu giaman i no bilong em o bilong stretpela Kingdom bilong em. Dispela “meri” i mekim pasin pamuk bilong spirit, long wanem em i insait long ol wok politik. Olsem: Em i insait long wok bilong Yunaitet Nesen long kamapim gutaim na bel isi long graun. Wanpela samting i mekim na dispela “meri” i no inap i stap bel isi em ol tok ol Witnes Bilong Jehova i autim long strafe bilong God bai painim ol man. Olsem na em i wok long kirapim ol gavman long tambuim wok Kristen bilong ol Witnes, na sampela ol i mekim olsem.−Sam 2:1-3.
21 “De bilong Bikpela” bai kam olsem wanem? Long nau ol man i stap olsem long nait i tudak tru na dispela De bai kam “olsem stilman”! Dispela samting bai kamap taim Jehova i stiaim ol lain bilong Yunaitet Nesen long biruaim lotu giaman na bagarapim. Bai ol i kamapim long ples klia tingting tru bilong ol long Bikpela Babilon, olsem ol i no laikim dispela “pamukmeri.” Bai ol i tekewe olgeta samting i haitim pasin bilong em na bai ol i bagarapim em olgeta. Wantu bai dispela bagarap i painim em, na bai ol pren politik bilong em i kirap na tok: “Sori, sori tumas long Babilon! Yu bikpela taun, na yu strongpela taun! Long wanpela aua tasol pe nogut bilong sin bilong yu em i kamap pinis long yu!” Tasol ol lain man wantaim ol ami bilong ol bai birua long lain bilong God tu na kirapim pait long ol. Na nau dispela King bilong olgeta king, em Krais Jisas, bai em i kirap na bagarapim olgeta dispela birua, na bai em i tromoi nambawan birua, em Seten, i go insait long hul i no gat as.−Revelesen 17:16, 17; 18:10; 19:11-21; 20:1-3; skelim wantaim tok bilong Esikiel 38:11, 16, 18-23.
22 Em nau, bai gutaim tru na bel isi tru i kamap aninit long Kingdom bilong God! (Sam 72:1, 7; Aisaia 9:6, 7) Gutpela tru, planti man nau ol i ‘was i stap na tingting bilong ol i klia’ bai ol i stap laip yet na lukim dispela samting i kamap. (1 Tesalonaika 5:4-6) “Planti tumas manmeri . . . ol i bilong olgeta lain man,” em ol i bilip long wok Jehova i mekim long rot bilong Krais bilong baim bek ol, bai ol i abrusim bagarap long taim bilong “bikpela hevi tru” na bai ol i stap bel isi oltaim oltaim−bai ol i kisim dispela bel isi i kam long God. (Revelesen 7:9-17; 21:3, 4) Yu tu yu inap kisim!
[Futnot]
a Nius World Military and Social Expenditures 1985.
Bai Yu Bekim Wanem Tok?
◻ Bilong wanem ‘de na taim’ i bikpela samting long God na long yumi?
◻ Yumi mas ting olsem wanem long De bilong Jehova i wok long i kam klostu?
◻ Husat ol i mekim dispela tok o singaut bilong 1 Tesalonaika 5:3? Wanem taim ol i mekim?
◻ Ol i mekim dispela tok na nau wanem ol samting bai kamap?
3. Bilong wanem ol man i no inap i stap bel isi tru long nau?
4. (a) Olsem wanem long dispela graun long nau? (b) Tasol ol man i lotuim Jehova ol i bilip strong na wetim wanem gutpela samting i kamap?
5. Yumi tingim tok bilong 1 Tesalonaika 5:1 na yumi gat wanem askim?
6. Olsem wanem yumi save, ‘de na taim’ i bikpela samting long God?
7. Bilong wanem Pol i no gat wok long raitim pas long ol Tesalonaika “long de na long taim”?
8. Bilong wanem yumi mas was i stap na mekim wok?
9. (a) Wanem tok o singaut bai kamap? Olsem wanem yumi save i no ol disaipel bilong Krais i mekim dispela tok? (b) Husat ol i tok olsem? Olsem wanem ol i wankain olsem ol hetman i stap long taim bilong Jeremaia?
10. Wanem ol samting i kamap pastaim na ol samting nau i stap long graun i kamap?
11. Hevi i painim ol man long nau em bikpela olsem wanem?
12. Yunaitet Nesen i mekim wanem long yia 1986? Na ol lain man i ting olsem wanem long dispela wok bilong Yunaitet Nesen?
13. Ol hetman bilong ol lotu i mekim wanem na ol i helpim dispela wok?
14. Husat tasol inap mekim tru wok bilong kalapim gutaim?
15. Nau Pol i mekim wanem tok yumi kirap nogut long en?
16. Olsem wanem pasin bilong ol lain man i no olsem pasin bilong God?
17. Ol gavman ol man i bin kamapim, olsem wanem long wok bilong ol? Olsem na yumi save tru long wanem samting?
18. Tok bilong ol lain man olsem “Em i gutaim nau, yumi stap gut,” bilong wanem dispela tok bai lus nating tasol?
19. “De bilong Bikpela” bai kam olsem wanem?
20. (a) Yunaitet Nesen i wanem kain “wel abus”? (b) Jehova i ting olsem wanem long lotu giaman? Bilong wanem em i ting olsem?
21. (a) Bai ol i mekim wanem na nau bai ‘De bilong Jehova’ i kirap? (b) Na bihain bai wanem samting i kamap long dispela “De”?
22. (a) Ol manmeri nau ol i bilip, i gat wanem gutpela samting ol i ken wetim i kamap? (b) Olsem wanem yu ken kisim bel isi i kam long God?