Tok Bilong Baibel Long Gutaim
Planti man i ting ol kantri long olgeta hap bilong graun i wok long kamap wanbel nau, olsem na gutaim tru inap kamap. Ol i laik tru bai dispela samting i kamap. Tasol Baibel i makim olsem dispela gutaim bai giaman tasol na i no gutaim tru.
OL KRISTEN i gat bikpela tingting long gutaim, long wanem spirit holi i bin kirapim aposel Pol long raitim tok long wanpela kongrigesen Kristen bilong pastaim, olsem: “Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol, olsem pen i save kamap long meri i laik karim pikinini. Na ol bai i no inap abrusim dispela samting.” Dispela tok i stap long 1 Tesalonaika 5:3. Dispela tok bilong Baibel i kamapim sampela bikpela askim.
Ol i Tok long “Gutpela Taim Tru”—na Bihain Bai Wanem Samting i Kamap?
Sapos yu kaunim ol narapela tok klostu long tok bilong Pol long 1 Tesalonaika 5:3, bai yu save i no ol Kristen, em tingting bilong ol i klia, ol i tok, “Nau em i gutpela taim tru.” Nogat. Ol man i olsem i slip na ol i no save long as bilong ol samting i kamap, em ol i mekim dispela tok. Bagarap inap painim ol, tasol ol i no save, long wanem ol i ting gutpela taim i laik kamap. Tasol Pol i tokim ol Kristen: “Ol brata, mipela i no inap raitim tok bilong tokim yupela long wanem de na wanem taim dispela ol samting bai i kamap.” (1 Tesalonaika 5:1) Tru tumas, yumi save long ol de na ol taim God i bin makim na yumi mas tingim gut. Bilong wanem yumi mas tingim gut? Long wanem Pol i tok, “De bilong Bikpela,” em dispela taim bilong bikpela bagarap, em bai kamap wantu tasol “olsem stilman i kam long nait.”—1 Tesalonaika 5:2.
Orait, olsem wanem long dispela tok bilong gutaim? Yumi save, i no olsem ol bai tok tasol olsem ol i kamapim pinis gutaim. Inap planti yia pinis ol i bin tok long kamapim gutaim na ol i bin mekim ol pait tu wantaim. Olsem na dispela tok bilong Pol i makim olsem wanpela taim bai kamap na bai i olsem ol lain man i kamapim pinis gutaim. Tasol dispela gutaim bai giaman tasol na i no gutpela taim tru. Pol i tok, dispela gutaim bai kamap na bihain, wantu tasol bai bikpela bagarap i kamap, olsem na yumi save em i no gutaim tru.
Jisas tu i bin toktok long dispela bikpela bagarap em i mas kamap wantu tasol. Em i kolim olsem taim bilong “bikpela hevi tru.” Na em i tok, “Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” Sampela handet yia paslain long Jisas, profet Daniel i bin stori long dispela bagarap na em i tok, “bikpela hevi tru bai i kamap. Bipo kain hevi olsem i no bin kamap long wanpela kantri bilong graun.”—Matyu 24:21; Daniel 12:1.
Dispela bikpela bagarap em taim bilong “bikpela hevi tru,” na Baibel i tok, long dispela taim olgeta samting bilong dispela graun bilong Satan bai bagarap na pinis olgeta. Olsem na taim ol man i tok, “Nau em i gutpela taim tru,” God i no ken amamas long dispela—ol bai tok olsem pastaim, na bihain, wantu tasol bikpela bagarap bai kamap!—Lukim Sefanaia 3:8.
Sampela Tok i Makim De na Taim
Orait, olsem wanem long ol senis i wok long kamap long nau na ol lain man long olgeta hap bilong graun i wok long kamap wanbel? Ating dispela i truim tok profet bilong Pol? Planti taim dispela nius Wastaua i bin tokaut olsem ol samting i bin kamap long graun long yia 1914 na bihain long en i truim ol tok profet i makim taim bilong Jisas i kam bek olsem King bilong Kingdom long heven. (Matyu, sapta 24, 25; 2 Timoti 3:1-5; Kamapim Tok Hait 6:1-8) Jisas i tok, ol manmeri i lukim dispela taim i kirap, sampela bai i stap yet na bai ol i lukim De bilong Jehova i kamap na wantu tasol bai bagarap i painim ol man nogut.—Luk 21:29-33.
Aposel Pol i helpim yumi long save long taim bilong dispela samting i mas kamap. Wanpela Baibel (The New English Bible) i tanim tok bilong Pol long 1 Tesalonaika 5:3 olsem: “Bai ol i tok, ‘Nau em i gutpela taim tru,’ na taim ol i toktok yet, wantu bai bagarap i painim ol.” Tok bilong dispela Baibel i soim yumi olsem “taim ol i toktok yet” dispela bikpela bagarap o bikpela hevi tru i mas kamap. Em bai kamap olsem stilman i save kam—long taim ol i no ting em bai kamap. Planti man bai wok long tingim dispela gutaim tru ol i bin wetim i kamap, na long dispela taim wantu tasol, bai dispela bagarap i painim ol. Tru, long nau ol man i tok ol i ting bai gutpela taim tru i kamap, tasol dispela i truim tok bilong Pol long 1 Tesalonaika 5:3 o nogat, em yumi no save tru. Na wanem kain tok bilong gutaim i mas kamap na i no kamap yet, em tu yumi no save. Tasol long nau planti man i wok long tok olsem ‘Nau bai gutaim i kamap,’ na dispela i kirapim tingting bilong yumi ol Kristen na yumi save, long olgeta taim yumi was i stap.
Ol Strongpela Gavman “i Pait”
Taim profet Daniel i stori long “bikpela hevi tru,” em tu i makim taim bilong dispela bagarap i mas kamap. Em i stori long tupela bikpela gavman, olsem tupela king, em ‘king bilong not’ na ‘king bilong saut,’ na em i tok inap longtaim dispela tupela king bai birua birua, na taim dispela i pinis, orait, bai taim bilong bikpela hevi tru i kamap. (Daniel 11:5-43) Bihain long Namba 2 Pait Bilong Olgeta Hap, ‘king bilong saut’ i makim wanpela strongpela gavman i orait long ol man i ken mekim wok bisnis bilong ol yet na gavman i no ken bosim, na ‘king bilong not’ i makim strongpela gavman komyunis.
Daniel i tok, dispela tupela strongpela gavman bai i stap birua, na bai tupela “i pait” olsem tupela man i pait bilong traim strong bilong ol, bai narapela inap winim narapela o nogat. Dispela tupela gavman i bin mekim olsem inap 45 yia pinis. Tasol long dispela taim nau i olsem tupela i no strong moa long mekim. Olsem na long Me 1990, Minista bilong Foren-Afeas long Rasia i tok, pasin birua i bin i stap namel long dispela tupela gavman i pinis. Long Jun, nius Time i stori long gavman bilong Amerika na bilong Rasia i bung na toktok wantaim na nius i tok: “Sapos sampela yia bipo ol i bin pasim tok long ol i no ken wokim planti samting bilong pait na ol i no ken traim pairapim ol bom nuklia, bai yumi kirap nogut tru. Tasol nau ol i wanbel long planti samting, na yumi no kirap nogut tumas long dispela tok ol i pasim.”
Pasin pren i kamap namel long dispela tupela strongpela gavman long nau, em bai pinis kwik o i stap longtaim? Em yumi no save nau. Bihain bai yumi save. Tasol yumi save tru long wanpela samting, em olsem: Dispela hap taim Jisas i bin stori long en i laik pinis nau. Ol samting i wok long kamap long graun i makim olsem ol samting aposel Pol na profet Daniel i bin tok profet long en i klostu pinis. Tru, ol misin ol i kolim Kristen i bin helpim wok na ol senis i bin kamap long sampela gavman long nau, tasol dispela i no inap kamapim gutpela taim tru bilong i stap oltaim. Olgeta samting i kamap i makim olsem bagarap i laik kamap na em bai painim ol lain bilong dispela graun.
[Ol Piksa long pes 6]
Pasin pren i kamap namel long dispela tupela strongpela gavman long nau, em bai stap longtaim o nogat? Bihain bai yumi save
[Kredit Lain]
USSR Mission to the UN