Gutaim Tru i Winim Gutaim Ol Man i Kamapim

Ol man i no inap kamapim gutaim tru. Bilong wanem ol i no inap kamapim? Long wanem, ol i gat hap asua tasol long pasin birua i stap long graun. Em asua tru bilong Satan na gutaim tru i no inap kamap long graun. Baibel i tok Satan “em i man bilong giamanim olgeta manmeri bilong graun.”​—⁠Kamapim Tok Hait 12⁠:⁠9.

BAIBEL i tok: “Dispela graun olgeta em i stap aninit long strong bilong Satan.” (1 Jon 5⁠:19) Olsem na bilong kamapim gutpela taim tru, ol i mas rausim Satan pastaim na pinisim pasin bilong dispela graun em Satan i bin kamapim na em i bosim. (Lukim Aisaia 48⁠:22; Rom 16⁠:​20.) Ol man i no inap mekim dispela samting.

Orait gutaim tru inap kamap olsem wanem? Wanpela Man, em strong bilong em i winim strong bilong Satan, em i mas kamapim. God I Gat Olgeta Strong i makim taim bilong Satan i mas pinis long bosim ol manmeri bilong graun. Na long taim stret olsem God i makim pinis, ‘bagarap’ bai painim ol dispela manmeri i stap aninit long strong bilong Satan. (1 Tesalonaika 5⁠:​3-7) Olgeta samting i kamap long graun long nau i makim olsem klostu nau na dispela samting bai kamap.

Stap Gutpela long Nau!

Tasol olsem wanem long nau? Long nau tu yumi inap i stap bel isi na stap gutpela long sampela samting. Olsem wanem yumi inap i stap olsem? Yumi no ken insait long ol wok politik, olsem ol hetman bilong lotu i bin mekim. Yumi mas bihainim ol lo bilong God.

Tasol sapos yumi mekim olsem, tru yumi inap i stap bel isi na i stap gutpela? Yumi inap. Ol Witnes Bilong Jehova i bin mekim traim na ol i save pinis. Ol i bihainim ol lo bilong God long Baibel, na dispela samting i bin helpim ol long pas gut wantaim olsem wanpela lain long olgeta hap bilong graun na ol i stap wanbel tru, maski ol i bilong narapela narapela skin na lain na tok ples.​—⁠Buk Song 133⁠:⁠1.

Ol i bihainim lo bilong God na i olsem ol i bin ‘wokim bainat i kamap ain bilong brukim graun, na ol i no lain moa long pait.’ (Aisaia 2⁠:​2-4) Ol i save, God i laikim yumi tru, na ol i save ol wanlotu bilong ol i tingim ol, olsem na bel na tingting bilong ol i stap gut tru. (Rom 8⁠:​28, 35-39; Filipai 4⁠:⁠7) Sapos yu pilim olsem tok bilong mipela i no stret, orait mipela i laik bai yu go long wanpela Haus Kingdom bilong ol Witnes na bai yu yet yu lukim dispela samting.

Gutaim Tru long Olgeta Hap Graun

Tasol dispela samting i no makim olsem gutaim tru i kamap pinis, olsem Baibel i tok promis long en. Nogat! Dispela i makim tasol gutpela pasin inap kamap sapos olgeta manmeri i bihainim ol lo bilong God. Tasol klostu nau bai gutaim i kamap tru.

Aposel Pol i tok: “Ol manmeri [i no mekim wok bilong God] bai i tok olsem, ‘Nau em i gutpela taim tru. Yumi stap gut,’ [ol bai ting ol i kamapim pinis gutaim long strong bilong ol yet] na wantu tasol samting bilong bagarapim ol bai i kamap long ol.” (1 Tesalonaika 5⁠:⁠3) God bai skelim ol samting na tok, Satan i bin giamanim ol manmeri inap pinis. Na nau bai God i kirap rausim Satan na pasin nogut bilong dispela graun em i bosim. Long dispela taim bai truim bilong tok profet bilong Daniel i kamap, em Daniel i tok: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”​—⁠Daniel 2⁠:⁠44.

Dispela wok God i laik mekim, yu ting em wok nogut? Nogat tru. Ol man em God i skelim ol pinis na lo bilong em i makim olsem i stret ol i mas bagarap, ol tasol bai bagarap. Olsem wanem? Yu ting Man bilong wokim yumi em inap mekim stretpela kot na skelim gut husat i mas bagarap na husat i no ken bagarap? Tru tumas, em inap mekim! Em i skelim ol pinis na wanem samting bai kamap? Baibel i tok: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.” (Sindaun 2⁠:​21, 22) Olsem wanem? Sampela bai bel hevi taim ol man nogut i kisim bagarap na i lus olgeta?

Taim God i rausim pinis ol man bilong bagarapim gutaim na Kingdom bilong God i bosim graun, olgeta manmeri bai i stap gutpela na i stap bel isi tru. “Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” (Aisaia 11⁠:⁠9) Olsem wanem? Yu bilipim dispela tok promis i stap long Baibel? Yu bilip tru olsem klostu nau na ol dispela samting bai kamap? Sapos yu gat tupela tingting long dispela samting, gutpela sapos yu skelim gut ol tok bilong Baibel long dispela samting. God tasol inap helpim ol manmeri long kisim dispela samting ol i laik tru long kisim, em ol i laik i stap bel isi tru na i stap gutpela.

[Ol Piksa long pes 8]

Lain bilong Jehova ol i stap bel isi tru long nau, na ol i stap gutpela long sampela samting