Husat Bai Kamapim Gutaim Long Graun?

OL MAN i no inap kamapim gutaim, olsem na gutaim bai kamap, o nogat? Yes, gutaim bai kamap. Tru Satan i gat strong winim yumi, na em i namba wan man i go pas long pasim gutaim na bai i no ken kamap long graun, tasol i gat wanpela Man i winim strong bilong Satan em bai go pas long kamapim gutaim long graun. Baibel i stori long Satan, na em i stori tu long dispela Man i gat olgeta strong. Baibel i tok: “Em bai i stap king bilong yumi, na em bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim oltaim’ na ‘King bilong kamapim gutpela sindaun na bel isi.’ ” (Aisaia 9:​6, 7) King bilong kamapim gutpela sindaun na bel isi em i husat? Em Jisas tasol, em inap tru long mekim dispela wok. Olsem wanem em inap tru?

Bikpela Save Winim Man

Wanpela samting em i olsem, Jisas i no inap i dai olsem yumi ol man. Tru, em i bin stap long graun olsem wanpela man, na em i dai bilong mekim ofa, tasol em i kirap bek na go long heven olsem wanpela spirit na em i no inap i dai moa. Em i kamap King bilong kamapim gutpela sindaun na bel isi. Baibel i tok: “Wok king bilong en bai i no inap pinis.” (Luk 1:​32, 33) Jisas bai stap oltaim, olsem na bai i no gat wanpela man inap senisim em na kamap king na bagarapim gutpela wok bilong em. Bipo dispela samting i bin painim wanpela empera bilong India, em Asoka.

Narapela samting, em Jisas i no gat sin, em i gutpela olgeta. Em i bosim ol man long gutpela save na tingting i kam long Jehova na long stretpela lo. Profet Aisaia i tok: “Spirit bilong Bikpela bai i kam i stap long em na givim em gutpela save na tingting, na bai em i stap strongpela king na i gat gutpela tingting na save bilong bosim ol manmeri bilong en. Em bai i save long tingting bilong Bikpela. . . . Long taim em i harim kot, em i no inap skelim man long ol toktok em i harim na ol samting em i lukim long ai tasol. Nogat. Long stretpela pasin bilong skelim kot, em bai i harim wari bilong ol rabisman.” (Aisaia 11:​2-4) Long bipo i gat gutaim na bel isi long ples bilong ol waitskin, tasol ol i go long ol narapela kantri na pait wantaim lain bilong ol dispela ples. Jisas i no olsem. Taim em i bosim graun, bel isi na gutaim bai stap long olgeta hap.

Na Jisas i gat strong inap long kamapim bel isi na gutaim, olsem Aisaia i tok: “Spirit bilong [Jehova]” i stap long en, na em bai i gat “gutpela save na tingting, na bai em i stap strongpela king.” Long rot bilong dispela spirit Jehova i bin wokim olgeta samting long heven na graun na olgeta strongpela wok i gat stretpela pasin long en. Satan em namba wan birua bilong God, tasol em i no gat samting bilong pait na daunim strong bilong spirit bilong God.

Rot Bilong Kamapim Gutaim

Olsem wanem Jisas bai kamapim gutaim long graun? Ating bai yu kirap nogut long harim olsem em i kirap pinis long mekim ol samting bilong kamapim gutaim. Man i raitim hap bilong Kamapim Tok Hait long Baibel em i tok profet long God i givim wok king long Jisas long Kingdom bilong em long heven. (Kamapim Tok Hait 11:⁠5) Sapos yumi glasim gut ol tok profet bilong Baibel na skelim wantaim ol hevi i kamap long taim bilong yumi, kirap long yia 1914 i kam inap long nau, bai yumi save olsem Jisas i kamap King long heven long 1914. (Matyu 24:​3-42) Jisas i kamap king long heven, dispela em bikpela samting bilong kamapim bel isi long dispela graun.

Tasol sapos Krais em i kamap King long 1914 na em i kirap long kamapim gutaim long graun, bilong wanem Namba Wan Bikpela Pait i bin kamap long 1914? Bilong wanem i gat planti pait nogut tru i bin kamap long taim bilong yumi, winim long bipo? Long wanem, namba wan wok bilong King long heven, em bilong rausim Satan i kam daun long graun na em i no ken i go long heven gen. Wanem samting i bin kamap? Baibel i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (Kamapim Tok Hait 12:​7-12) I gat planti bikpela pait i bin kamap long taim bilong yumi na dispela i kamapim long ples klia olsem Satan i belhat nogut tru. Tasol belhat bilong Satan em i bilong “sotpela taim tasol.” Klostu nau bai ol hevi i pinis!

Paslain long em i pinisim ol hevi, King bilong kamapim gutpela sindaun na bel isi bai mekim sampela wok moa bilong kamapim gutaim. Namba wan samting em i mas mekim, em olgeta manmeri i mas save long laik bilong God long kamapim gutaim long rot bilong Krais. Jisas i tok profet long taim bilong yumi, na em i tok, “bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim.” (Matyu 24:14) Long truim dispela tok, ol Witnes Bilong Jehova long nau i autim gutnius bilong Kingdom long olgeta hap bilong graun.

Ol man i gat gutpela bel ol i mas lain long pasin bilong i stap bel isi wantaim ol narapela man. Baibel i tok: “Bai mi yet mi skulim ol pikinini bilong yu, na bai ol i gat gutpela sindaun tru.” (Aisaia 54:13) Long nau, planti milion manmeri ol i gat gutpela bel ol i lain long pasin bilong i stap bel isi wantaim ol narapela man.

Narapela Rot Bilong Kamapim Gutaim

Klostu nau em taim bilong narapela samting i mas kamap bilong kamapim gutaim. Em wanem samting? Planti man i save long dispela samting, tasol ol i no save long as tru bilong en. Baibel i kolim olsem “pait long dispela bikpela de bilong God I Gat Olgeta Strong,” olsem Armagedon. (Kamapim Tok Hait 16:​14, 16) Planti man i ting Armagedon em wanpela pait nuklia na em bai bagarapim sindaun bilong olgeta man long graun, tasol nogat. Armagedon em i wanpela wok bilong Jisas, King bilong kamapim gutpela sindaun na bel isi, na long dispela rot em bai inapim ol samting bilong kamapim gutaim.

Namba wan samting, em ol man i laik pasim rot bilong kamapim gutaim bai ol i pinis long Armagedon. Long Buk Song 37:10 Baibel i tok: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol.” Tru tumas, Jisas bai pinisim “ol man nogut”​—⁠olsem ol man i kamapim pait, man i mekim pasin nogut, man i mekim pretim narapela man, na ol man ol i no laik bilip long King bilong kamapim gutpela sindaun na bel isi; ol dispela kain man bai pinis long graun. I no stret ol i mas i stap laip long dispela graun.​—⁠Kamapim Tok Hait 19:​19-21.

Namba tu samting em olsem, truim bilong tok profet bilong Daniel bai kamap long Armagedon. Dispela tok profet i tok: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” (Daniel 2:44) Planti manmeri bilong wanpela lain i save bruk bruk, olsem na planti pait i kamap long dispela. Tasol dispela pasin bai pinis. Bihain bai i gat wanpela gavman i bosim olgeta hap bilong graun, na wanpela King bai bosim ol na ol man i ken bilip long em!

Wanem taim bai Armagedon i kam? Baibel i no tok stret long wanem taim Armagedon bai kam. Tasol ol hevi i kamap long nau i truim ol tok profet, na dispela i kamapim long ples klia olsem Armagedon i kam klostu tru. Baibel i tok klia long wanpela samting bai kamap klostu tru long Armagedon, olsem aposel Pol i tok: “Ol manmeri bai i tok olsem: ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol.” (1 Tesalonaika 5:⁠3) Taim dispela bagarap i kamap, Armagedon bai kamap, na kwiktaim bihain long en, man bilong pasim rot bilong kamapim gutaim em bai pinis. Baibel i tok, Satan i gat “sotpela taim tasol.” Dispela sotpela taim bai pinis liklik taim, na Satan bai kalabus, olsem na em i no ken givim hevi moa long ol man i stap long graun. (Kamapim Tok Hait 20:​1-3) Em gutpela tru!

Gutaim Bai Kamap long Olgeta Hap

Tingim dispela samting bai kamap long nupela taim. Man i raitim wanpela song long Buk Song i tok profet olsem: “Tasol ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.” (Buk Song 37:11) Ol dispela man i gat pasin daun bai wok yet long truim tok profet bilong Aisaia, i tok: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”​—⁠Aisaia 2:⁠4.

Em namba wan taim long olgeta manmeri bai kisim ol gutpela blesing long Jehova. Kirap long taim Adam i bin bikhet na i kam inap long nau, ol man i no bin kisim ol dispela gutpela blesing. Jehova bai truim tok promis bilong em olsem: “God yet bai i stap wantaim ol, na em bai . . . mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠Kamapim Tok Hait 21:​3, 4.

Wanpela Bilip i Gat As Bilong En

Husat bai go pas long ol man long kamapim gutaim? Em Jisas Krais, King bilong kamapim gutpela sindaun na bel isi. Olsem wanem? Yumi ken bilip long Krais bai kamapim gutaim? Sapos ol tok promis long Baibel i no stret, bai yumi no ken bilip long gutaim bai kamap, na ol man bai wok yet long pait na kilim i dai narapela. Tasol tok bilong Baibel i stret na yumi inap bilip tru long en, na Kingdom bilong God long han bilong Krais bai kamapim tru gutaim long graun. Taim ol Witnes Bilong Jehova i autim tok long haus bilong yu, mipela laik strongim yu long harim tok bilong ol. Orait, long taim bilong Armagedon, ating yu wanpela bilong ol dispela man i gat pasin daun na ol bai stap long graun, na bai yu amamas tru long wanem gutaim na bel isi i pulap tru long olgeta hap.

Ol tok long dispela magasin i stori long gutaim bai kamap, ol dispela tok i kam long Baibel. Long nau planti man ol i no bilip long tok bilong Baibel, olsem na ating yu laik save, bel isi na gutpela sindaun inap kamap long bihain o nogat? Ol Witnes Bilong Jehova i bilip olsem spirit holi bilong God i kamapim olgeta tok bilong Baibel olsem na ol i bilipim ol tok bilong Baibel i tok gutaim bai kamap long bihain. Long 1989 ol i wokim wanpela buk tok Inglis, nem bilong en The Bible​—⁠God’s Word or Man’s? na Wastaua bilong Disemba 1990 bai stori long sampela tok bilong dispela buk. Em bai kamapim sampela tok bilong Baibel long gutaim na bel isi, olsem na mipela laik bai yu kaunim ol dispela tok.

[Rait long pes 8]

Jisas tasol inap kamapim gutpela sindaun na bel isi long graun

[Rait long pes 9]

Long nau, ol i autim gutnius bilong Kingdom long olgeta hap bilong graun