Ripot Long Wok Bilong Kingdom
‘Wanpela Mak i Litimapim Pasin Bilong Wok Gut Wantaim’
KLOSTU long hap saut bilong Spen i gat wanpela traipela maunten ston, nem bilong en Jibralta. Inap planti handet yia ol lain politik na ol gavman i bin tok pait long dispela maunten ston. Tasol i no longtaim i go pinis na narapela kain pasin i bin kamap long Jibralta. Dispela pasin yumi no lukim planti taim long nau—em pasin wanbel na wok gut wantaim.
Sapos yu lusim Jibralta na go 3-pela kilomita bai yu kamap long biktaun La Linia, long Spen. Long dispela taun planti handet volantia i bin amamas long givim taim na strong bilong ol long wokim wanpela Haus Kingdom bilong ol Witnes Bilong Jehova. Taim ol i wok strong long sanapim wanpela haus bilong lotuim Jehova, dispela wok bilong ol i bikpela tru na i olsem traipela maunten ston bilong Jibralta i kamap olsem liklik samting.
Sampela man bilong autim tok bilong Kingdom long dispela hap i salim tok olsem:
‘Long apinun long Fraide, Septemba 24, 1993, 900 volantia i amamas long kirapim wok. Long 7 klok, long apinun long Sande, wanpela nupela sain i sanap pinis bilong toksave olsem dispela haus em Haus Kingdom bilong ol Witnes Bilong Jehova, na nau ol bai mekim namba wan pablik-tok bilong ol long dispela gutpela haus.
‘Planti Witnes bilong Jibralta i brukim boda na go bilong helpim ol brata Spen bilong ol. Wanpela volantia bilong Jibralta yet i tok: “Ol lain politik i bruk, tasol mipela ol Witnes i stap lain brata tru long olgeta hap. Sampela yia i go pinis sampela bilong La Linia i bin kam helpim mipela long wokim Haus Kingdom bilong mipela yet long Jibralta. Olsem na nau mipela amamas long i go helpim ol, olsem bekim bilong en.”
‘Biktaun La Linia i givim nating graun long ol Witnes, long wanem, ol i lukim ol Witnes bilong tupela kongrigesen na planti handet wokman bilong hap bilong Andalusia, ol i kam na givim bel tru long dispela wok. Taim bikman bilong La Linia i raun na lukim wok ol i mekim, em i tok: “Bipo em pasin bilong gavman bilong Spen long givim graun long misin Katolik bilong wokim ol haus lotu bilong en. Gutpela mipela mekim olsem long ol narapela lotu tu. Mi kirap nogut long pasin bilong ol dispela volantia, ol i no tingim skin na laik bilong ol yet. Mi ting i gutpela mipela sambai long ol. Long nau olgeta man i bruk bruk, olsem na mobeta dispela kain pasin i stap.”
‘Bikman i tok Haus Kingdom bai stap olsem “wanpela mak i litimapim pasin bilong wok gut wantaim.” Tru tumas, i no stail o bikpela bilong dispela haus ol man i kirap nogut long en, nogat; ol i kirap nogut long ol volantia tasol i wokim dispela haus na ol i mekim insait long 48 aua tasol!’
Tru tumas, ol Witnes Bilong Jehova long La Linia na ol ples klostu, ol i bihainim tru tok bilong aposel Pol long Galesia 6:10, i tok: “Olsem na wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.”