Yu Ting Wok Bilong Kamapim Bel Isi Inap Kamapim Bel Isi Long Graun?

Olgeta taim i gat woa i kamap long sampela hap bilong graun. Olsem na Yunaitet Nesen na ol narapela oganaisesen i putim ol wokman bilong ol long ol hap i gat ol hevi i kamap na bai ol i ken kamapim bel isi.a Ol i laik mekim ol samting na bai ol hevi i no ken kamap. Sekreteri jenerol bilong UN, António Guterres, em i tok: “Ol tim bilong Unaitet Nesen husat i gat wok bilong kamapim bel isi, ol i nambawan lain bilong yumi long kamapim bel isi long graun.”

Insait long ol yia i go pinis, ol wok bilong kamapim bel isi i kamapim sampela gutpela samting. Olsem, ol i lukautim ol manmeri nating, bringim ol refiuji i go long kantri bilong ol, bringim ol samting bilong helpim ol man i karim hevi, na wokim gen ol haus samting i bagarap. Tasol i gat ol sampela bikpela samting we i mekim na wok bilong kamapim bel isi i no kamapim stret ol samting ol man i hop long lukim. Yu ting i gat rot bilong kamapim bel isi tru long graun? Baibel i mekim wanem tok bilong bekim dispela askim?

Ol hatwok bilong kamapim bel isi na ol rot Baibel i kolim

Piksa bilong tupela man i foldim han na givim baksait long narapela narapela.

Hatwok: no gat pasin bilong bung wantaim. Taim i gat wok bilong kamapim bel isi, planti taim ol ami na ol manmeri nating bilong narapela narapela kantri i no save wok bung wantaim. Sampela taim ol dispela oganaisesen i hatwok long wok gut wantaim bikos ol i no save gut long ol narapela o ol i gat narapela narapela astingting.

Baibel i kolim rot bilong stretim: “God bilong heven bai kamapim wanpela kingdom we [bai] . . . pinisim olgeta dispela kingdom [ol gavman bilong ol man long graun], na em wanpela tasol bai stap oltaim oltaim.”—Daniel 2:44.

Klosut nau God bai pinisim olgeta woa na kamapim bel isi long olgeta hap bilong graun. (Buk Song 46:8, 9) Em bai rausim ol narapela gavman long graun na larim wanpela gavman tasol long bosim graun: Kingdom Bilong God. Taim dispela gutpela gavman i stap long heven na bosim graun na pinisim pasin bilong pait, orait bai i no gat wok moa long ol man i kamapim ol aganaisesen bilong kamapim bel isi.

Hatwok: Nogat inap samting na save na strong.Ol wok bilong kamapim bel isi i no gat inap manmeri, mani, o ol narapela samting, so dispela i givim hatwok long kamapim bel isi. Na tu, ol wokman bilong kamapim bel isi i mekim wok long ol hap we ol hevi i go nogut moa.

Baibel i kolim rot bilong stretim: “God bilong Bikpela bilong yumi Jisas Krais . . . bringim [Jisas] i go sindaun long rait han bilong em long heven. Na Krais i stap antap tru long olgeta gavman na namba na pawa.”—Efesus 1:17, 20, 21.

God i gat olgeta strong, Jehova,b i givim olgeta samting long Jisas, em man God i makim olsem King bilong Kingdom Bilong God. (Daniel 7:13, 14 c) God i givim bikpela strong, save, gutpela tingting, na pasin bilong kliagut long ol samting—winim tru ol gavman o ol oganaisesen bilong ol man. (Aisaia 11:2) Jisas i gat planti strongpela ensel i stap we em i ken yusim ol long mekim wok. (Revelesen 19:14) I no gat wanpela samting i hatwok long em i mekim.

Jisas bai yusim ol samting na strong God i givim em long pinisim pait na stretim ol samting na bai ol manmeri i stap aninit long wok bos bilong Kingdom Bilong God, ol bai i sindaun gut na i stap bel isi tru.—Aisaia 32:17, 18.

Hatwok: ol lo i pasim ol wokman bilong kamapim bel isi long mekim samting. Sampela taim i gat ol lo we i no klia o ol lo we i pasim ol wokman bilong kamapim bel isi long mekim samting. Kain ol lo inap pasim ol long lukautim ol narapela o mekim gut wok bilong ol.

Baibel i kolim rot bilong stretim: “God i givim [Jisas] namba long bosim olgeta samting long heven na long graun.”—Matyu 28:18.

God i givim klia instraksen long Jisas long kamapim bel isi long graun na em i givim em namba long mekim olsem. (Jon 5:22) Jisas bai mekim pasin i fea na em i no inap bihainim pasin korapsen. (Aisaia 11:3-5) Olsem na i stret Baibel i kolim Jisas olsem “Prins Bilong Bel Isi,” na Kingdom bilong em bai mekim “tretpela kot na stretpela pasin.”—Aisaia 9:6, 7.

Kingdom Bilong God tasol bai kamapim bel isi tru

Ol oganaisesen bilong ol man inap kamapim sampela gutpela samting na stopim pait i kamap long wanpela hap bilong graun. Tasol ol i no inap pinisim as tru bilong pait—pasin bilong heitim ol narapela we i stap long bel bilong ol man.

“Namba wan bikpela hevi em olsem i no gat bel isi stap bilong yumi ken laukautim.”—Dennis Jett, pastaim em ambasada bilong Amerika.

Kingdom Bilong God tasol em gavman we inap helpim ol manmeri long rausim pasin bilong heitim narapela long bel bilong ol. Olsem, tingim taim Jisas i stap long graun, em i skulim ol disaipel bilong em long wei bilong kamapim bel isi na laikim ol narapela long rot bilong toktok na pasin bilong em:

“Ol man bilong mekim i dai kros, ol i ken amamas.”—Matyu 5:9.

“Yu mas laikim ol arapela man olsem yu laikim yu yet.”—Mak 12:29-31.

“Putim bainat bilong yu i go bek long ples bilong en, long wanem, ol man i yusim bainat, ol bai dai long rot bilong bainat.”—Matyu 26:52.

“Taim ol i tok nogut long em, em i no bekim tok nogut long ol. Taim ol i givim pen long em, em i no tok long bagarapim ol, nogat.”—1 Pita 2:23.

Jisas i tok tu olsem ol manmeri i stap daun long Kingdom Bilong God, ol bai laikim ol narapela. Baibel i kamapim klia olsem ol man bilong heitim ol narapela bai i no stap aninit long Kingdom Bilong God:

“Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:34, 35.

“Olgeta man husat i heitim brata bilong ol, ol i kilman.”—1 Jon 3:15.

“Man i laikim God em i mas laikim brata bilong em tu.”—1 Jon 4:20, 21.

Jehova God, em man i wokim ol manmeri, em i save long gutpela rot—namabwan rot tru—bilong kamapim bel isi tru long graun olgeta. Kingdom bai kamapim bel isi tru, em samting ol man na ol oganaisesen bilong kamapim bel isi i wok strong long kamapim tasol ol i no inap.

a Yunaitet Nesen na ol narapela oganaisesen i yusim tu ol kain tok olsem “peacebuilding,” “peacemaking,” “peace support,” na “peace operations.”

b Jehova em nem bilong God. (Buk Song 83:18) Lukim atikol “Jehova Em i Husat?”

c Long Daniel 7:13, 14, “pikinini bilong man” i makim Jisas Krais.—Matyu 25:31; 26:63, 64.

Long nau tu Kingdom Bilong God i helpim ol man long i stap bel isi na sindaun gut wantaim

Long bihain, taim Kingdom bilong God i bosim graun olgeta, olgeta manmeri bai bihainim tok bilong God na i stap bel isi. (Aisaia 2:4; 11:9) Tasol Kingdom Bilong God i bosim heven pinis, na long nau dispela Kingdom i skulim planti milion manmeri long graun long i stap bel isi na i stap wanbel wantaim.

Watsim vidio Can Love Conquer Hatred? long lukim hau Baibel i helpim 2-pela man long rausim pasin bilong heitim narapela narapela maski ol Juda na ol Arab i heitim narapela narapela.

Watsim vidio Tupela Birua i Kamap Pren long lukim hau ol tok bilong Baibel i helpim wanpela raskol nogut na polis man i gat hatpela pasin long rausim pasin bilong heitim narapela narapela na tupela i kamap gutpela pren.