Yunaitet Nesen—Inap Bosim Olgeta Lain Man?
LONG nau Yunaitet Nesen i kisim gen biknem. Long planti milion man sotpela nem “YN” (Yunaitet Nesen) i makim wanpela lain i mekim bikpela wok long taim nogut. Ol man i tingim ol soldia i pasim blupela hat na ol i hariap i go long ol hap i gat pait samting, na helpim ol man long sindaun gut. O ol i kisim kaikai i go long ol refyuji Afrika ol i gat bikpela hangre. Na ol man na meri i no tingim skin na laik bilong ol yet, ol i wok strong bilong kamapim nupela taim.
Insait long 9-pela mun nius The Washington Post i skelim wok bilong YN na nius International Herald Tribune i kamapim tok bilong en olsem: Maski long ai bilong ol man YN i gat biknem, ‘ol samting bilong en i no wok gut. Na ol man i mekim nabaut long en, olsem na em i sot long sampela samting.’ Ol i bin skelim ol ripot i gat planti tausen pes na ol i givim sampela askim long ol man i wok long YN o bipo ol i bin wok long en, na ol i kisim save olsem:
Helpim Ol Afrika: Planti hevi i painim Afrika olsem pait, na bikpela hangre, na ol bikpela sik, na ol man i stap rabis. Olsem na YN i bin helpim planti man long stap laip, long wanem, ol i bin givim planti bilion kina bilong helpim ol.
Tasol planti tausen man i bin dai na planti milion kina i lus nating, long wanem, ol man i no bin tingting gut, o bosim gut mani, na sampela taim ol i bin mekim pasin giaman na paulim mani samting. Long olgeta de planti man i dai long Somalia, long wanem, i gat bikpela hangre. YN i bin salim mani na kaikai samting bilong helpim ol. Tasol tok bilong Aryeh Neier bilong lain Human Rights Watch i bin kamapim tok long nius Tribune olsem: ‘Yunaitet Nesen na ol lain bilong en i no bin tingting gut na mekim gut wok bilong ol; i olsem ol i no helpim liklik ol Somalia i gat bikpela hevi.’
Na ripot i tok, sampela man i save mekim wok bilong YN i paulim mani na kaikai bilong helpim ol man. Ol i no salim kaikai i go long ples tru bilong en, na long pasin giaman ol i kisim kaikai samting, na mekim hait ol wok nogut bilong ol. YN i salim sampela man bilong painim as bilong ol dispela pasin nogut, na ol i kisim save olsem, dispela hevi i stap long 7-pela kantri long Afrika.
Pasin Sekan: Namba wan wok bilong YN i bilong helpim ol man long stap wanbel. YN i kamap long 1945, na kirap long dispela taim inap long nau, winim 100 bikpela pait i bin kamap, na 20 milion manmeri i dai long ol pait. Kirap long 1987, YN i wok long kamapim pasin sekan long 13-pela hap. Dispela i winim olgeta wok bilong YN kirap long taim ol i kamapim na i kam inap long 1987.
Sampela i tok, maski YN i tromoi bikpela mani bilong salim ami bilong helpim ol man, pait i moa nogut. Tasol sampela i gat tok long dispela, long wanem, ami bilong en i stap planti yia long sampela hap na pinisim planti handet milion kina. Tasol ol gavman long ol dispela hap i stap birua yet na i no stretim hevi. Bilong mekim gut long ol soldia bilong en long Kambodia, YN i save tromoi wan milion kina bilong baim televisen na video, na 600,000 kina bilong baim sabskripsen bilong ol nius samting.
Stretim Wok: Planti i tok YN i mas stretim wok bilong en, tasol ol i no wanbel long wanem wanem ol samting ol i mas stretim. Ol kantri i stap rabis i laik bai wok bisnis bilong ol yet na wok bilong helpim sindaun bilong ol man long kantri bilong ol i go bikpela, na YN i mas larim ol long insait moa long wok bilong YN. Ol kantri i gat planti wok bisnis i no laik tromoi bikpela mani bilong helpim ol kantri i stap rabis. Ol i laik bai pasin giaman bilong paulim mani samting na pasin bilong lusim nating mani i pinis.
Wanpela bikman bilong YN i tok: ‘Bilong stretim wok mipela i mas mekim sampela samting mipela i no inap mekim—klinim dispela oganaisesen, olsem stretim. Inap 45 yia ol samting i pasim dispela oganaisesen long mekim gut wok bilong en.’
Ol Kristen i save i mas i gat wanpela lain tasol i bosim olgeta man, na ol i save Yunaitet Nesen i no inap mekim. Ol Kristen i save tingim Kingdom bilong God, em dispela gavman Jisas i tokim ol disaipel bilong em long beten long en.—Matyu 6:10.