Olsem Wanem Gavening Bodi i Lukautim Ol Wok?
LAIN Gavening Bodi Bilong Ol Witnes Bilong Jehova, em ol man i dediket pinis long God na em i bin makim ol long holi spirit. Ol i olsem mausman bilong lain wokboi i gat gutpela tingting, em ol i gat wok bilong givim kaikai bilong spirit, soim rot, na strongim wok bilong autim tok bilong Kingdom long olgeta hap bilong graun.—Mt. 24:14, 45-47.
Lain Gavening Bodi i save mekim miting bilong ol long Trinde long olgeta wik. Dispela i helpim ol dispela brata long wok gut wantaim long pasin wanbel. (Sng. 133:1) Ol memba bilong Gavening Bodi i mekim wok insait long ol narapela narapela komiti tu. Bilong lukautim ol wok bilong Kingdom, wan wan komiti i gat wok bilong en, olsem:
◼ KOMITI BILONG OL KODINETA: Insait long dispela komiti i gat kodineta bilong ol narapela komiti bilong Gavening Bodi na wanpela seketeri, em tu i memba bilong Gavening Bodi. Wok bilong dispela komiti em bilong stretim gut ol samting na bai olgeta komiti i wok gut na i no gat hevi. Em i lukautim tu wok bilong helpim ol Witnes Bilong Jehova long olgeta hap long taim bilong bikpela hevi, pasin birua, bikpela bagarap bilong ren na win samting, na ol narapela samting em ol i mas stretim hariap.
◼ KOMITI BILONG LUKAUTIM OL WOKMAN: Ol brata long dispela komiti i gat wok bilong lukautim ol famili Betel long olgeta hap bilong graun na lukautim ol tu long ol samting bilong spirit. Dispela komiti i save lukautim wok bilong makim na singautim ol nupela memba bilong famili Betel, na i bekim ol askim i kamap long wok bilong ol long Betel.
◼ KOMITI BILONG WOKIM OL BUK SAMTING: Dispela komiti i lukautim wok bilong wokim na prinim ol buk na nius bilong Baibel, na salim i go long olgeta hap bilong graun. Em i save lukautim wok bilong ol faktori bilong prinim ol buk na nius na ol haus samting bilong ol koporesen em ol Witnes Bilong Jehova i mekim wok long en. Dispela komiti i stretim rot bilong yusim gut mani em ol man i givim bilong helpim wok bilong Kingdom long olgeta hap bilong graun.
◼ KOMITI BILONG WOK AUTIM TOK: Ol lain insait long dispela komiti i save lukautim wok autim tok na stretim ol wok bilong ol kongrigesen, ol painia, ol elda, na ol wasman raun. Em i lukautim wok bilong redim Wok Kingdom Bilong Yumi na singautim ol sumatin long Skul Gileat na Ministerial Trening Skul, na bihain makim hap ol bai i go na mekim wok long en.
◼ KOMITI BILONG WOK TISA: Dispela komiti i lukautim wok bilong redim ol tok bilong ol kibung na ol miting bilong kongrigesen. Em i lukautim wok bilong redim ol gutpela tok bilong Baibel bilong helpim famili Betel, na em i lukautim wok bilong ol narapela skul, olsem Skul Gileat na Skul Bilong Wok Painia, na tu, wok bilong kamapim ol DVD na vidio samting.
◼ KOMITI BILONG RAITIM TOK: Wok bilong dispela komiti em bilong lukautim wok bilong kamapim kaikai bilong spirit long rot bilong ol buk na nius na tilim long ol wanbilip na long ol narapela man. Dispela komiti i save bekim ol askim ol man i mekim long ol tok bilong Baibel, na skelim na orait long ol tok bilong drama na ol autlain bilong ol tok. Na em i lukautim tu wok bilong tanim tok long olgeta hap bilong graun.
Aposel Pol i tok kongrigesen bilong ol Kristen God i makim i olsem bodi bilong man, na i kamapim klia olsem wok bilong olgeta wan wan i bikpela samting, na narapela i mas helpim na laikim narapela, na wanbel wantaim long mekim wok God i givim ol. (Ro. 12:4, 5; 1 Ko. 12:12-31) Het bilong ol, Jisas Krais, i save givim ol samting ol i mas i gat bilong ol i ken wok gut wantaim, stretim ol wok, na kisim ol tok bilong Baibel bilong strongim ol. (Ef. 4:15, 16; Kl. 2:19) Long dispela rot, Gavening Bodi i go pas na lukautim ol wok na Jehova i stiaim ol long rot bilong holi spirit.