Pasin Laikim na Stap Wanbel Ripot Bilong Miting

BIKPELA amamas i pulap long Haus Kibung Bilong Ol Witnes Bilong Jehova long Jersey City, New Jersey, Amerika. Long moningtaim, Oktoba 3, 2009, winim 5,000 ol i bung long namba 125 miting bilong olgeta yia, bilong Sosaiti Was Taua Bilong Pennsylvania. Long 3-pela haus Betel long Yunaitet Stets na long Kanada Betel tu, planti tausen moa ol i bung na harim na lukim program i kamap long rot bilong televisen. Olgeta wantaim, inap 13,235, em ol i stap wanbel long laikim tumas Jehova, ol i amamas long harim ol tok bilong dispela miting, longpela bilong en inap 3-pela aua.

Geoffrey Jackson bilong Gavening Bodi em i stap olsem siaman. Bilong kirapim program em i singautim wanpela lain bilong Betel i kam na ol i mekim sampela singsing i stap long nupela buk singsing bilong yumi. Kondakta bilong ol, David Splane, em tu i bilong Gavening Bodi, em i mekim sotpela tok long musik em i bikpela samting insait long lotu i tru. Em i singautim ol bratasista long odiens long singim 3-pela nupela singsing long miting; lain bilong mekim singsing ol i mekim pastaim, orait nau ol bratasista long odiens ol i singsing wantaim ol. Dispela pasin bilong kisim lain bilong mekim singsing, em i bilong dispela spesel miting tasol; em i no wanpela pasin ol miting bilong kongrigesen, kibung sekit, na kibung distrik i mas bihainim.

Ripot Bilong Sampela Brens

Sampela memba bilong ol Brens Komiti i bin kam long dispela miting ol i kamapim ripot bilong 5-pela brens. Kenneth Little i tok, liklik taim nau na Kanada bai kirap prinim klostu olgeta nius bilong Yunaitet Stets na Kanada, olsem na Kanada bai prinim planti moa, winim namba nau ol i prinim inap 10-pela taim. Bilong mekim dispela bikpela wok, wanpela nupela masin ol i kisim em bai wok inap 16 aua long olgeta de, olsem tupela lain wokman bai wok 8-pela 8-pela aua.

Reiner Thompson i kamapim ripot bilong wok bilong Kingdom long Ripablik Dominika, na Albert Olih i stori long wok bilong yumi long Naijiria. Emile Kritzinger bilong Mosambik i tok, ol i bin mekim nogut long ol Witnes Bilong Jehova inap planti yia long dispela hap, tasol long 1992 gavman i rejistaim ol Witnes. Long dispela 3-pela kantri olgeta, namba bilong ol pablisa i go bikpela tru. Viv Mouritz bilong brens ofis long Australia i stori long wok bilong yumi long Is Timor, em ol brata long Australia i lukautim.

Ol Komiti Bilong Gavening Bodi

Long 1976, olgeta wok bilong ol Witnes Bilong Jehova i kam aninit long 6-pela komiti bilong Gavening Bodi. Bihain, ol i makim sampela long lain bilong ol arapela sipsip long mekim wok olsem helpim bilong ol. Long nau i gat 23 ol i helpim ol dispela komiti long mekim wok. Ol i mekim inteviu long 6-pela helpim. Bungim olgeta yia bilong ol wantaim long mekim fultaim sevis, em 341 yia​—em olsem 57 yia long olgeta wan wan.

Don Adams, em i bin kam long Betel long 1943, em i tok, insait long Komiti Bilong Ol Kodineta i gat ol kodineta bilong 5-pela narapela komiti, na wok bilong en i bilong helpim dispela 5-pela komiti long wok gut na mekim wok i ron gut. Dispela komiti i save lukautim wok bilong helpim ol Witnes Bilong Jehova long olgeta hap long taim ol bikpela hevi i kamap, olsem ol man i mekim nogut long ol, o ol i mas sanap long kot, o ol bikpela bagarap i kamap, na ol kain samting olsem.

Dan Molchan i stori long wok bilong Komiti Bilong Lukautim Ol Wokman, dispela komiti i lukautim 19,851 bratasista long ol Betel i stap long olgeta hap bambai ol i ken i stap gut long ol samting bilong spirit na bilong skin. David Sinclair i stori long wok bilong Komiti Bilong Wokim Ol Buk Samting, i save lukautim wok bilong baim ol samting bilong ol brens na ol masin samting, bilong wokim ol buk na nius samting. Robert Wallen em i wok long Betel klostu 60 yia pinis, na em i stori long Komiti Bilong Wok Autim Tok, i save lukautim wok bilong lain bilong Jehova long autim tok na ol wok insait long ol kongrigesen. William Malenfant i toktok long bikpela wok em Komiti Bilong Wok Tisa i mekim bilong redim program bilong ol kibung distrik. Orait las bilong ol, em John Wischuk, em i stori long wok bilong Komiti Bilong Raitim Tok, i save lukautim wok bilong raitim na stretim gut ol tok bai kamap long ol buk na nius samting bilong yumi.a

Yiateks Bilong 2010 i Tok Long Pasin Laikim

Narapela 3-pela tok i kamap, em ol brata bilong Gavening Bodi i mekim. Bilong kirapim tok, Gerrit Lösch i askim olsem: “Yu laik bai ol narapela i laikim yu?” Pasin bilong yumi ol man bilong graun, em yumi mas i gat sampela i laikim yumi, na dispela pasin i save mekim gut bel bilong yumi. Pasin laikim i as na yumi stap laip, long wanem, pasin laikim i bin kirapim Jehova long wokim yumi. Namba wan as na yumi save autim tok na skulim ol man, em yumi save laikim tumas Jehova.

Yumi no mekim pasin laikim long ol wantok tasol, nogat; yumi mekim long ol birua tu. (Mt. 5:​43-45) Brata bilong mekim tok i kirapim odiens long tingim ol hevi na pen Jisas i bin karim bilong helpim yumi​—ol i bin wipim em, tok bilas long em, spet long em, na sutim em long spia. Tasol maski em i kisim nogut olsem, em i beten long God i ken helpim ol soldia i bin nilim em long diwai. Yumi tingim dispela na yumi laikim em moa yet, a? Orait nau Brata Lösch i tokaut long yiateks bilong 2010: 1 Korin 13:​7, 8, Pasin Laikim Inap Karim Olgeta Hevi. Pasin Laikim i No Inap Pinis. Yumi gat rot long i stap oltaim oltaim na long laikim tru ol narapela na ol i laikim tru yumi, i go inap oltaim oltaim.

Yu Ronim Ka i No Gat Petrol?

Bilong kirapim tok bilong em, Samuel Herd i mekim wanpela tok piksa, olsem: Sapos wanpela pren i kam kisim yu long ka na yutupela bai raun inap 50 kilomita. Yu sindaun long fran, na bihain liklik yu lukim nil bilong makim petrol i stap long emti. Yu tokim pren olsem petrol i laik pinis. Em i tok, no ken wari; i gat 4 lita petrol i stap yet long tang. Tasol i no longtaim na petrol i pinis. Orait yu ting i gutpela long ronim ka yet taim petrol i laik pinis na yu save ensin bai dai long rot? Em i gutpela moa long pulimapim petrol long tang inap long em i pulap, a? Olsem dispela tok piksa i makim, oltaim yumi mas pulapim petrol long tang​—petrol i makim save bilong Jehova yumi kisim.

Olsem na yumi mas pulimapim petrol, na mekim long olgeta taim. I gat 4-pela rot bilong mekim olsem. Namba 1, em yumi mas stadi, ritim Baibel long olgeta de bilong kisim save long en. Yumi no ken ritim nating tasol​—yumi mas kliagut long ol tok yumi ritim. Namba 2, mekim Famili Lotu bilong yumi long nait yumi bin makim. Olsem wanem? Long olgeta wik, yumi save stop na pulimapim petrol, olsem stadi na kisim save, o yumi save putim liklik petrol tasol long tang? Namba 3, em yumi go long ol miting we yumi stadi long ol buk em Baibel i as bilong en. Namba 4, em yumi stap isi na tingim tingim long bel ol tok na pasin na lo bilong Jehova. Song 143:5 i tok: “Mi tingting gen long ol samting i bin kamap bipo. Na mi tingting long ol samting yu bin mekim na long ol gutpela wok bilong yu.”

“Ol Stretpela Manmeri Bai i Lait”

Brata John Barr i mekim namba 3 tok, em laspela tok, i stori long tok piksa bilong Jisas long wit na gras nogut. (Mt. 13:​24-30, 38, 43) Tok piksa hia i toktok long “taim bilong kisim kaikai,” na long dispela taim ol bai bungim “ol manmeri bilong kingdom,” na gras nogut ol i bungim long narapela hap bilong kukim long paia.

Brata Barr i kamapim klia olsem wok bilong bungim kaikai i no ken i go i go tasol, nogat, em bai pinis. Em i kolim tok bilong Matyu 24:34: “Taim ol manmeri bilong dispela taim i no i dai yet, dispela olgeta samting bai i kamap.” Tupela taim em i ritim dispela tok: “Yumi ken ting olsem Jisas i tok long ol Kristen God i bin makim em ol i stap long taim bilong las de. Sampela bilong ol i lukim kirap bilong taim bilong las de long 1914, na taim ol i stap laip yet, sampela arapela bilong dispela lain Kristen ol bai bon na ol bai lukim kirap bilong taim bilong bikpela hevi tru.” Olgeta dispela Kristen wantaim, maski ol i gat kain kain krismas, ol i bilong lain ‘ol manmeri bilong dispela taim.’ Tru, yumi no save “dispela taim” i makim hamas yia stret, tasol yumi ken belgut long save olsem, dispela lain Kristen i bin bon paslain long lain i lukim 1914 ol i dai, sampela bilong ol bai stap laip yet taim bikpela hevi tru i kirap!

“Ol manmeri bilong kingdom” ol i wetim taim bilong kisim prais bilong ol long heven, tasol yumi olgeta i mas i stap gut long Jehova, na yumi mas lait strong i go inap long pinis bilong dispela taim. Em i gutpela samting tru long yumi inap lukim wok bilong bungim “wit” nau long taim bilong yumi.

Ol i mekim laspela singsing na bihain long en, Brata Theodore Jaracz bilong Gavening Bodi i mekim beten bilong pinisim program. Program bilong dispela miting bilong olgeta yia em i gutpela program tru bilong strongim bel bilong ol brata!

[Futnot]

[Blok long pes 5]

SKUL BILONG OL ELDA

Long dispela miting bilong olgeta yia, Anthony Morris bilong Gavening Bodi em i tokaut olsem ol elda bilong ol kongrigesen bai i wok long kisim skul bilong mekim wok bilong ol. Wanpela skul bilong ol elda bilong Yunaitet Stets i bin kirap long stat bilong 2008 long Patterson, New York. Namba 72 klas i pinis, na i kam inap long dispela taim inap 6,720 elda ol i bin kisim skul. I gat planti wok i stap yet. Long Yunaitet Stets yet, i gat olsem 86,000 elda. Olsem na Gavening Bodi i tok orait long wanpela skul moa i kamap long Brooklyn, New York, kirap long Disemba 7, 2009.

Inap tupela mun, 4-pela wasman raun i kisim skul long Patterson bilong mekim wok tisa. Bihain long en ol i go long Brooklyn bilong skulim ol elda, na i gat 4-pela moa ol i kisim skul. Orait nau ol bai lukautim skul long Brooklyn, na 4-pela tisa bilong pastaim ol bai go lukautim skul i kamap long ol Haus Kibung na Haus Kingdom. Ol bai mekim olsem i go inap long taim i gat 12-pela tisa i lukautim 6-pela skul long olgeta wik long tok Inglis long Yunaitet Stets. Orait nau 4-pela tisa bai lain long mekim dispela skul long tok Spen. Dispela skul i no ken senisim Skul Bilong Wok Kingdom; wok bilong en i bilong helpim ol elda long kamap strong moa long ol samting bilong spirit. Ol brens long olgeta hap bilong graun bai kirap mekim dispela skul long ol Haus Kibung na Haus Kingdom long sevis yia bilong 2011.

[Ol Piksa long pes 4]

Bilong kirapim dispela miting bilong olgeta yia, ol i mekim singsing i stap long nupela buk singsing bilong yumi, “Sing to Jehovah”