Yu Save Long Papa Bilong Yu Long Heven?

YU SAVE gut long papa bilong yu? Ating dispela askim i narapela kain sapos yu kamap bikpela insait long wanpela famili i gat pasin laikim. Ating bai yu tok, ‘Mi save gut long em!’ Tru tumas, planti man i save long ol samting papa bilong ol i laikim na i no laikim, papa i save mekim wanem long taim sampela samting i kamap, na pasin bilong em long lukautim famili.

Tasol ating sampela taim yu bin kirap nogut long lukim papa bilong yu i mekim narapela kain pasin. Olsem: Ating pikinini i save long papa bilong em olsem wanpela man i gat pasin isi na i no save mekim planti toktok​—papa bai stap olsem inap wanpela hevi i kamap. Orait nau, wantu pikinini i lukim olsem papa i strong tru long mekim ol samting bilong lukautim famili bilong em.

Olsem wanem long Man Bilong Wokim yumi? Baibel i tok long em olsem: “Yumi save kisim laip long em na em wanpela tasol i givim strong long yumi na yumi save wokabaut.” (Aposel 17:28) God i givim laip long yumi, olsem na yumi ken tok em i Papa bilong olgeta man i stap laip. (Aisaia 64:8) Ating yu gat dispela tingting long God, na dispela i gutpela na i stret. Tasol i gat planti samting moa yumi ken save na lain long em​—dispela bai helpim yumi na mekim yumi i stap amamas tru.

Pasin bilong yu long save gut long papa bilong yu bai mekim na yu rispek na laikim tru papa o nogat. Na i wankain long God, sapos yu save gut long em, bai yu pas gut moa wantaim em. God inap helpim yu long winim ol hevi na traim sapos yu save gut long em na lain long bihainim laik bilong em.

God i gat wanem kain pasin? Ol pasin bilong em i mas mekim wanem long tingting yu gat long em? Sapos yu save gut long em, dispela bai mekim na yu gat sampela wok long mekim? Yu bai painim bekim bilong ol dispela askim long stori i kamap bihain long dispela.

[Rait long pes 3]

Sapos yu save gut long ol narapela, dispela inap mekim na yu laikim ol tru o nogat