Pas i Kam Long Gana

Em i Lusim Pait Karate

EM I no luk olsem man mi bin piksaim long tingting. Em i putim longpela waitpela klos, na i taitim black belt​—braitpela bilong en em 5-pela sentimita​—long bel bilong em, em i sanap redi long pait, taitim strong han, na em i lek nating. Pes bilong em i soim olsem em i belhat nogut tru na ol mak olsem baret i kamap long pes, long wanem, em i tingting strong long pait. Ai bilong em i go liklik, em i lukluk strong bilong pretim man​—pes bilong em i no makim liklik olsem em i bel isi, nogat tru.

Wantu, em i singaut strong na tromoi han go daun kwiktaim na brukim plang i go tupela hap, bikpela pairap i kamap, na plang i pundaun long graun. Kwiktaim em i tanim gen, tasol nau em i kalap na i tanim long antap, long wankain taim em i tromoi lek na han i go stret olsem em i laik paitim man. Tru tru em dispela man tasol husat i laik save long tok bilong Baibel?

Mi go klostu long em na putim han i go bilong sekanim em. Mi tok: “Yu Kojo, laka? Mi harim olsem yu laik lainim tok bilong Baibel.” Em i holim han bilong mi na smail, na pes bilong em i lait. Ai bilong em i lait na i luk olsem em i laik kisim save. Em i tok: “Yes, mi laik tru long mekim olsem. Wanem taim bai yumi kirap?”

Mitupela i kisim ol Baibel na ol buk bilong lainim tok bilong Baibel na sindaun long liklik veranda bilong haus. Veranda i kol na i no gat nois, na mipela tasol i stap. Mipela tripela: Mi, Kojo, na liklik monki bilong em. Longpela bilong liklik monki em 35 sentimita, gras long het bilong em i retpela, na em i gat waitpela mausgras na i mekim em i luk pani, na em i hambak. Tasol em i luk nais, man bilong pilai, em i laik lukluk long olgeta samting, raun long laik, wokabaut antap long ol pepa bilong mipela, pulim pen, na putim han i go insait long poket bilong siot bilong mipela bilong painim kaikai. Kain olsem wanpela papa i lain pinis long nois na pasin bilong ol liklik pikinini long ol i no stap isi, Kojo i no bisi long samting liklik monki i mekim, tingting bilong em i stap tasol long samting em i lainim. Em i kamapim planti askim na dispela i soim olsem em i wok long tingting, na em i laik kisim save. Ating pait karate i skulim em long pasin bilong was gut, long wanem, em i no save bilipim nating wanpela tok inap long em i lukim stret long Baibel.

Skul em i kisim long Baibel i wok long kamap gut. Tasol i no longtaim na mi luksave olsem em i wok strong tru long daunim wanpela laik i wok long kamap strong long bel bilong em. Em i tokim mi: “Wanpela samting tasol em mi save laikim tru em pait karate.” Mi lukim olsem em i laikim tru dispela pait, em samting em i bin givim bel tru long en na em i mekim gut tru. Taim em i gat 26 krismas em i laikim tru pait karate, na tu, em i kamap hapman bilong pait, na em i winim mak bilong pasim black belt, dispela namba em wan wan man tasol i holim o inap kisim.

Mi no save Kojo bai lusim karate o nogat. Tasol mi pilim olsem em i luksave olsem pasin bilong mekim karate, na paitim narapela man long han na lek, dispela pasin em i no stret long pasin sori na pasin bilong tingim gut ol man, em ol i mak bilong pasin laikim i stap namel long ol trupela Kristen. Tasol mi save olsem tok i tru bilong Baibel i bin senisim pasin bilong ol man i gat hatpela pasin, winim em. Sapos Kojo i gat gutpela bel, Tok Bilong God inap helpim em, na isi isi em tu inap kamap man bilong sori na mekim gutpela pasin. Olsem na mi no ken les kwik.

Long wanpela apinun taim mipela i laik pinis long lainim tok bilong Baibel, mipela i ritim wanpela tok long Baibel na i mekim Kojo i kirap nogut olsem wanpela man i kikim em strong. Em i ritim dispela skripsa: “Jehova yet i save skelim ol stretpela man na ol man nogut. Na em i heitim tru ol man i laikim pasin pait.” (Song 11:​5, NW) Em i toktok isi long em yet: “Man i laikim pasin pait.” Pastaim em i gat strongpela tingting long winim pait na daunim man, tasol nau em i senis. Em i lukluk stret long ai bilong mi na em i smail. Em i tok: “Mi tingting pinis long samting mi laik mekim.”

Long nau mitupela Kojo i mekim wok em mipela i laikim moa​—mipela i mekim wok tisa long lainim ol man em ol i laik harim tok bilong Baibel, na mipela i no kisim pe long dispela wok. Nau long moning, mipela i laik go lukim wanpela yangpela man em mipela i bin pasim tok wantaim em, nem bilong em Luke.

Taim mipela i laik go long haus bilong em, mipela i bihainim rot i go long maket we ol man i pulap na pas pas tru. Planti handet liklik haus maket na ol man i stap arere long ol rot bilong salim ol samting: ol hip retpela na grinpela lombo, ol basket tomato, ol hip okra, na tu, ol redio, ambrela, sop, giaman gras, ol samting bilong haus kuk, na ol hip sekenhen klos na ol su. Ol meri i salim ol kaikai​—ol i kukim wantaim lombo na kari​—i stap long ol bikpela sospen em ol i sindaunim gut long het bilong ol. Ol i raun namel long ol manmeri i pas pas tru na pulim ol long baim naispela kaikai em ol i bin kukim wantaim kuka, demdem na pis ol i smokim. Ol dok, ol meme, na ol kakaruk i wokabaut na ol man i krungutim ol. Ol redio i pairap, ol ka i bengim hon, na ol man i toktok bikmaus.

Mipela i bihainim rot i go lusim bikpela nois bilong taun, na mipela i kamap long wanpela olpela haus tru i gat sain em rait long en i no klia tumas, i tok: “Ples Bilong Kisim Malolo Long Longpela Wokabaut.” Luke, em wanpela yangpela man i gat 20 krismas samting, em i sanap long dua na i singautim mipela long kam long malur. Ples bilong em i pulap tru long ol beg na boks i gat ol kain kain lip na rop bilong diwai samting em ol i bin draim, ol lip em i ol i pasim long string, na ol traipela hap skin bilong ol diwai​—ol dispela samting i bilong lapun anti bilong Luke, em meri bilong oraitim ol sikman long rot bilong ol dispela samting. Em i save miksim ol dispela lip samting olsem marasin, moa yet em i save memeim ol lip na mekim i kamap wara bilong oraitim kain kain sik, em samting em i bin lainim long ol tumbuna. Luke i wok long wetim mipela. Em i brumim ples na putim ol samting i go long sait na em i putim 3-pela sia. Mipela i sindaun klostu klostu na kirap long lainim tok bilong Baibel.

Kojo i lainim Luke long tok bilong Baibel. Mi sindaun na putim yau taim dispela tupela yangpela i toktok long ol tok bilong Baibel long as na i gat pen na hevi long graun. Taim Kojo i putim han i go bilong helpim Luke long painim skripsa, mi lukim strongpela han bilong em i opim isi ol pes bilong Baibel. Na mi tingim gen. I no longtaim i go pinis, em i bin yusim ol dispela strongpela han long pait. Tok Bilong God i gat strong long senisim ol pasin nogut i stap insait long bel bilong ol man na mekim i kamap ol gutpela pasin olsem pasin sori na pasin laikim. Dispela senis man i mekim long pasin bilong em i winim tru ol narapela senis.

Taim mipela i wokabaut i go bek long haus, mipela i bungim wanpela man i sindaun long malur bilong mango. Em i stap isi na putim yau taim Kojo i opim Baibel na ritim wanpela skripsa. Taim dispela man i luksave olsem mipela i Witnes Bilong Jehova, wantu em i kirap sanap na bikmaus strong: “Mi no laikim yupela!” Kwiktaim, bel bilong Kojo i kirap. Bihain mi lukim em i stap isi gen na em i wokabaut i go. Mipela i lusim dispela man na i go.

Long rot, Kojo i kam klostu na tok isi long mi: “Man! Bel bilong mi i kirap taim dispela man i tok olsem. Yu save long samting mi inap mekim long dispela man, laka?” Mi smail na tok, “Mi save.” Em i smail long mi na mitupela i wokabaut i go.