Ol Man i Askim

Mi Mas Givim Hamas Mani Olsem Ofa?

“God i save laikim man i amamas na i givim samting long laik bilong em yet.” (2 Korin 9:7) Planti milion manmeri long olgeta hap i save long dispela tok. Tasol sampela man i save go lotu, ol i ting olsem ol i mas givim bikpela mani, winim skel bilong ol. Na sampela lotu i makim hamas mani stret ol man i mas givim. Ol i kolim dispela pasin olsem pasin bilong givim namba 10 hap, olsem ol i mas givim 10 pesen bilong mani ol i kisim long wok i go long lotu.

Olsem wanem? Baibel i makim hamas mani stret yumi mas givim olsem ofa? Mi yet mi mas givim hamas?

Samting Lo i Bin Makim Bilong Givim na Samting Man Yet i Laik Givim

Baibel i tokaut klia long God i laik ol Israel i mas givim hamas olsem ofa. (Wok Pris 27:​30-32; Namba 18:​21, 24; Lo 12:​4-7, 11, 17, 18; 14:​22-27) Dispela lo i no winim skel bilong ol. Jehova i tok promis, sapos ol i bihainim gut ol lo bilong em, em bai givim ‘planti gutpela samting’ long ol.​​—Lo 28:​1, 2, 11, 12.

Long sampela narapela taim, ol Israel i ken givim ol samting ol yet i makim​—olsem liklik samting o planti samting. Olsem: Taim King Devit i tingting long wokim tempel bilong Jehova, ol manmeri i stap aninit long em ol i givim “gol i winim 170,000 kilogram.”a (1 Stori 29:7) Skelim dispela wantaim samting Jisas i bin lukim taim em i stap long graun. Em i lukim “wanpela rabismeri, man bilong en i dai pinis, em i tromoi tupela liklik mani” i go long bokis mani bilong tempel. Em hamas mani? Em liklik hap tru long pe wanpela wokman i save kisim long wanpela de. Tasol Jisas i tok, em i amamas long samting meri i givim.​—Luk 21:​1-4.

I Gat Mak Stret Long Hamas Ol Kristen i Mas Givim?

Ol Kristen i no aninit long kontrak bilong Lo em God i bin givim long ol Israel. Olsem na i no gat mak long hamas stret ol i mas givim long God. Tasol long kongrigesen Kristen tru, pasin bilong givim i kamapim bikpela amamas. Jisas Krais i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”​—Aposel 20:35.

Ol Witnes Bilong Jehova i sapotim wok bilong autim tok long olgeta hap bilong graun long rot bilong mani ol i givim long laik bilong ol yet. Dispela mani ol i yusim bilong prinim ol buk na nius, olsem nius yu ritim long nau, na bilong wokim na lukautim ol ples bilong lotu, ol i kolim Haus Kingdom. Ol i no yusim dispela mani bilong baim ol wokman bilong ol. Sampela Witnes em ol i insait long wok fultaim bilong kamapim disaipel ol i kisim helpim bilong baim basfea na sampela samting ol i mas kisim. Tasol i no gat wanpela i askim long kisim dispela helpim. Klostu olgeta Witnes Bilong Jehova i no kisim mani bilong helpim ol long mekim wok autim tok. Ol i wok mani bilong lukautim ol yet, olsem Pol i bin mekim taim em i wok long samapim ol haus sel.​—2 Korin 11:9; 1 Tesalonaika 2:9.

Sapos wanpela man i laik givim mani bilong helpim wok bilong ol Witnes Bilong Jehova, em i mas givim hamas? Aposel Pol i tok: “Yupela olgeta wan wan i mas tingting gut pastaim na save gut long wanem samting yupela i laik givim. Nogut wanpela man i bel hevi long givim samting, na nogut em i ting ol man i strong tumas long em i mas givim. Dispela pasin bilong givim em i no gutpela. God i save laikim man i amamas na i givim samting long laik bilong em yet.”​—2 Korin 8:12; 9:7.

[Futnot]