Yu Inap Save Gut Long God na Nem Bilong Em?

Sapos ol i singautim yu long sekanim na kolim nem bilong wanpela bikman, dispela i givim ona long yu. Ol man i save kolim ol bikman olsem “Mista Presiden,” “King,” o “Bikman.” Olsem na sapos wanpela bikman i tokim yu, “Plis, kolim mi long nem tru bilong mi,” bai yu amamas tru, a?

TRUPELA God i tokim yumi long Baibel olsem: “Mi Jehova. Em nem bilong mi.” (Aisaia 42:​8, NW) Tru, em i gat planti biknem, olsem “Man Bilong Wokim olgeta samting,” “God i Gat Olgeta Strong,” na “Bikpela King,” tasol long olgeta taim em i bin larim ol gutpela wokboi bilong em i kolim nem tru bilong em.

Olsem: Wanpela taim profet Moses i tokim God olsem: “Tasol Bikpela [“Jehova,” NW].” (Kisim Bek 4:10) Long bung bilong dediketim tempel long Jerusalem, King Solomon i kirapim beten bilong em olsem: “O Jehova.” (1 King 8:​22, 23, NW) Na taim profet Aisaia i beten long God bilong helpim ol manmeri bilong Israel, em i tok: “Yu Bikpela [“Jehova,” NW], yu papa tru bilong mipela.” (Aisaia 63:16) I klia tru olsem Papa bilong yumi long heven i singautim yumi long kolim em long nem bilong em.

Tru, em i bikpela samting long kolim nem bilong Jehova, tasol bilong save tru long em na nem bilong em, yumi mas mekim sampela samting moa. Ol man i save laikim tumas Jehova na bilip long em, Jehova i tok promis long ol olsem: “Bai mi lukautim gut ol man i save tru long [“nem bilong,” NW] mi.” (Song 91:14) Em nau, planti samting i insait long pasin bilong save long nem bilong God, long wanem, em i wanpela bikpela samting bilong God i ken lukautim yumi. Orait yu mas mekim wanem bambai yu ken save gut long Jehova na nem bilong em?