Rot Bilong Yu Ken Save Long Nem Bilong God
WANPELA meri bilong raitim ol stori long niuspepa i kisim dispela pas long wanpela man: “Long laip olgeta bilong mi, mi bin tingim tru dispela askim, na mi laik bai yupela i mas givim bekim. Wanem nem bilong God? Ol Juda i tok nem tru bilong Em i lus pinis. Ol Kristen i kolim Em Jisas. Ol Muslim i kolim Em Allah. . . . Olsem na wanem nem bilong God?” Niuspepa i kamapim dispela askim wantaim bekim bilong em: “Ol Hibru bilong bipo i tok God i gat olgeta strong, olsem na i no gat wanpela nem inap makim Em stret. Tasol mi ken tokim yu olsem, maski yu kolim em long wanem nem, tasol yu mekim long gutpela pasin rispek, Em bai harim yu.”
Planti man long nau i gat kain tingting olsem long nem bilong God. Maski ol man i save tingim ol samting bilong lotu, planti husat i bilip long Baibel ol i no tingim tumas nem bilong God. Tasol God i gat wanem tingting long nem bilong em? Yu ting em i liklik samting tasol long em?
I No Liklik Samting
Tingim dispela: Baibel i kolim nem bilong God, Jehova, planti tausen taim. Long Baibel New World Translation of the Holy Scriptures, nem bilong God i stap inap 7,210 taim!a God yet i bin kirapim ol man bilong raitim Baibel long putim nem bilong em long planti hap long Baibel. Wanpela bilong ol dispela man, Asap, em i tok: “Nem bilong yu tasol em Jehova, yu antap tru na bosim olgeta hap bilong graun.” (Song 83:18, King James Version) Devit tu i raitim long wanpela song olsem: “Mipela bai stori long nem bilong Jehova, God bilong mipela.”—Song 20:7, American Standard Version.b
Baibel i soim olsem God Jehova i skelim bel bilong yumi bilong save yumi ting olsem wanem long nem bilong em. Man bilong raitim song i tok: “Sapos mipela i lusim tingting pinis long [“nem bilong,” NW ] yu, . . . yu bai save. Yu save long olgeta tingting i hait i stap long bel bilong mipela man.” (Song 44:20, 21) Profet Aisaia i tok: “Kolim nem bilong Bikpela [“Jehova,” NW ] na singaut long em na tok tenkyu long em. Tokaut long olgeta lain manmeri long ol bikpela wok em i bin mekim, na tokim ol long em i gat biknem.”—Aisaia 12:4.
God yet i tok: “Bai ol i save nem bilong mi i olsem, mi Bikpela [“Jehova,” NW ].” (Jeremaia 16:21) Long narapela taim em i tok: “Bai mi soim ol dispela arapela lain olsem, pasin bilong mi em i gutpela na stretpela olgeta. Na bai ol i givim biknem long mi. Asua bilong yupela Israel yet na nau ol dispela lain i wok long daunim nem bilong mi. . . . Na bai ol i save gut olsem, mi yet mi Bikpela [“Jehova,” NW ].” (Esekiel 36:23) Sampela bilong ol dispela tok i stori long taim Jehova bai krosim ol man i no rispek long nem bilong em. Olsem na nem bilong God i no liklik samting.
God Jehova i No Stap Longwe Long Yu
Olsem wanem yu ken save long nem bilong God? Wanem mining bilong dispela askim? Baibel i bekim: “Ol man i save long [“nem bilong,” NW ] yu bai ol i bilip tru long yu.” (Song 9:10) Yes, pasin bilong save long nem bilong God i no olsem yu save long nem bilong em i husat na em tasol. Yu mas bilip long em. Dispela i makim olsem yu mas kisim save long em i wanem kain God na em i gat wanem kain ol pasin na tingting. Dispela bai kirapim yu long bilip long em.
Taim yu ritim na stadi gut long Baibel, dispela samting tasol inap helpim yu long kisim save long Jehova i wanem kain God. Em i tok promis long lukautim ol man husat i laikim em na nem bilong em. God i tok long ol man i mekim olsem: “Bai mi kisim bek ol man i laikim mi tru, na bai mi lukautim gut ol man i save tru long mi. Taim ol i prea long mi bai mi harim prea bilong ol. Na sapos hevi i kamap long ol bai mi stap wantaim ol. Na bai mi kisim bek ol na givim biknem long ol. Bai mi skruim laip bilong ol i go longpela olsem prais bilong ol. Na bai mi kisim bek ol na ol i stap wantaim mi.”—Song 91:14-16.
God Jehova i pas gut wantaim ol man i save long nem bilong em! Yu tu inap pas gut olsem wantaim em. Taim yu beten, yu no ken surik long kolim nem bilong em. Em bai harim, long wanem, Baibel i tok, “em i no i stap longwe long yumi olgeta wan wan.”—Aposel 17:27.
[Futnot]
a Baibel New World Translation of the Holy Scriptures, ol Witnes Bilong Jehova i wokim, em wanpela Baibel i kamapim ol tok ol man i yusim long nau na i no mekim wok long ol tok ol man i bin yusim long bipo long ol olpela Baibel. Bikpela samting bilong dispela Baibel em nem bilong God i stap long ples stret bilong en long Baibel. Ol i bin wokim winim 122 milion kopi bilong en, Baibel olgeta o hap bilong en, long 45 tok ples.
b Long Buk Baibel nem bilong God i stap long sta bilong Kisim Bek 3:15.
[Blok/Piksa long pes 11]
God i Save Long Nem Bilong Yu
God i tokim Moses: “Mi save gut long [“nem bilong,” NW ] yu.” (Kisim Bek 33:12) Stori bilong diwai i paia i kamapim klia dispela samting. Baibel i tok God “i singaut long em olsem, ‘Moses, Moses.’ ” (Kisim Bek 3:4) Dispela em i wanpela ves tasol we God i yusim nem bilong ol man taim em i toktok long ol, i gat planti narapela ves olsem. Tru tumas, Man Bilong Wokim heven na graun i save tingim yumi wan wan.
Baibel i tok God i save long nem bilong planti bilion sta. (Aisaia 40:26) Em i save tingim moa yet ol man i save lotuim em! Aposel Pol i tok: “Bikpela i save gut long ol manmeri bilong em yet.” (2 Timoti 2:19) Dispela i no makim tasol olsem God i putim long tingting nem bilong ol man. God i save gut tru long ol man i lotuim em. Olsem na yumi mas save long nem bilong God na save gut tru long ol pasin bilong em.
Laspela buk bilong Baibel i kamapim tok piksa long wanpela buk we God i save raitim nem bilong ol man i bin lotuim em kirap long bipo yet i kam inap nau. Dispela buk em “buk bilong laip,” long wanem, God Jehova bai givim laip oltaim long ol man em nem bilong ol i stap long dispela buk. (KTH 17:8) Dispela em i wanpela gutpela samting ol man i save long nem bilong God ol i ken wet long kisim.
[Blok/Piksa long pes 12]
Ol i Autim Nem Bilong God
● Singsing bilong Moses paslain long lain Israel i go insait long Graun Bilong Promis: “Bai mi litimapim nem bilong Bikpela [“Jehova,” NW].”—Lo 32:3.
● Tok Devit i mekim long Goliat: “Mi kam pait long yu long nem bilong Bikpela I Gat Olgeta Strong [“Jehova,” NW], em God i bosim ol ami.”—1 Samuel 17:45.
● Tok Jop i mekim bihain long olgeta samting bilong em i lus na olgeta pikinini bilong em i dai: “Mi litimapim nem bilong en [“Jehova,” NW].”—Jop 1:21.
● Aposel Pita i kolim tok bilong Ol Skripsa Hibru: “Olgeta manmeri i singaut long Bikpela [“Jehova,” NW] long helpim ol, em bai i kisim bek ol.”—Aposel 2:21.
● Profet Aisaia: “Bikpela Jehova i strongim mi . . . na em i kisim bek mi.”—Aisaia 12:2, King James Version.
● Jisas Krais i lainim ol disaipel long beten: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi.’ ”—Matyu 6:9, 10.
● Jisas Krais i beten long God: “Mi autim pinis nem bilong yu long ol man.”—Jon 17:6.
● Tok God i mekim long lain bilong em: “Mi tasol mi Bikpela. Bikpela [“Jehova,” NW], em nem bilong mi, na yupela i mas givim biknem long mi wanpela tasol.”—Aisaia 42:8.