Baibel i Save Senisim i Stap Bilong Man

WANEM samting i helpim wanpela stilman na man i insait long wanpela lain ami i pait long gavman long senisim pasin bilong em? Bilong wanem wanpela meri i save pait tae kwon do i senisim tingting bilong em long ol mak em i laik winim long laip bilong em? Wanem gutpela samting i kamap long pasin bilong wanpela papa long bilip long pikinini man bilong em? Ritim ol dispela stori na kisim bekim bilong ol dispela askim.

“Maski bipo laip bilong mi i nogut tru, nau mi amamas.”​—GARRY P. AMBROCIO

KRISMAS: 47

KANTRI: FILIPINS

BIPO: SOLDIA I INSAIT LONG LAIN AMI I PAIT LONG GAVMAN

LAIP BILONG MI LONG BIPO: Mi kamap bikpela long liklik taun Vintar. Ol naispela grinpela maunten i raunim gutpela ples daun mipela i sindaun long en, na i gat ol klinpela wara na gutpela win. Tasol maski ples i luk olsem i gat bel isi i stap, laip i hatwok. Ol man i bin stilim ol animal na ol samting insait long haus bilong mipela.

Taim mi tineja, mi dring planti alkohol wantaim ol pren bilong mi, smok sigaret, na stilim ol samting bilong helpim mi long baim alkohol na ol sigaret. Na mi stilim tu nekles samting long tumbuna mama bilong mi. Ami bilong gavman i ting mi insait long lain New People’s Army (NPA), em ol soldia i pait long gavman, na planti taim ol i paitim mi nogut tru. Olsem na mi go insait long dispela lain soldia. Inap 5-pela yia mi sindaun long ol maunten wantaim ol NPA soldia. Laip i bin hatwok tru. Oltaim mipela i raun bilong ranawe long ami. Bihain mi les pinis long hait long ol maunten, na mi givim mi yet long han bilong gavena bilong Ilocos Norte. Em i mekim gut long mi, na i helpim mi long painim wanpela gutpela wok. Tasol mi bihainim yet olpela pasin bilong mi long stilim ol samting long ol haus na pretim ol manmeri.

BAIBEL I SENISIM I STAP BILONG MI: Wanpela meri long ples wok bilong mi, nem bilong em Loida, em i wanpela Witnes Bilong Jehova. Long rot bilong em, mi bungim Jovencio, na em i kirap stadi long Baibel wantaim mi. Tasol mi holim strong yet ol olpela pasin bilong mi. Mi save smok paslain long Jovencio i kam long stadi wantaim mi, na mi insait yet long sampela wok em gavman i tambuim. Bihain polis i painimaut olsem mi brukim lo, na mi kalabus inap 11-pela mun. Long dispela taim, mi beten strong long Jehova, na askim em long helpim mi. Mi askim em long lusim rong bilong mi na long givim holi spirit long mi bilong stiaim na strongim mi.

I no longtaim na wanpela Witnes Bilong Jehova i visitim mi long haus kalabus na em i bringim wanpela Baibel long mi. Mi ritim Baibel na mi kisim save olsem Jehova i gat pasin marimari, pasin laikim, na pasin bilong lusim rong. Mi luksave olsem Jehova i marimari long mi na em i givim rot long mi long kisim save long em. Mi askim em long helpim mi long kisim strong long lusim ol pasin nogut bilong mi. Tok mi ritim long Sindaun 27:11 i mekim bikpela samting long mi. Mi tingim dispela ves olsem Jehova i toktok stret long mi. Ves i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”

Taim mi lusim kalabus, mi mekim gen Baibel stadi wantaim ol Witnes, na mi kirap go long ol miting bilong ol na bihainim ol stiatok bilong Baibel long i stap bilong mi. Jehova i helpim mi na isi isi mi lusim ol pasin nogut. Orait nau mi dediketim laip bilong mi long God Jehova.

GUTPELA SAMTING I PAINIM MI: Maski laip bilong mi long bipo i nogut tru, nau mi amamas. Mi kalabus long ol pasin nogut tru, tasol nau mi kamap olsem nupela man. (Kolosi 3:​9, 10) Long nau, mi amamas tru long bung wantaim lain bilong Jehova husat i stap klin, na mi inap helpim ol narapela long kisim save long God i Gat Olgeta Strong, em Jehova.

“Mi laik makim Brasil.”​—JULIANA APARECIDA SANTANA ESCUDEIRO

KRISMAS: 31

KANTRI: BRASIL

BIPO: SAVE GUT LONG PAIT TAE KWON DO

LAIP BILONG MI LONG BIPO: Mi kamap bikpela long Londrina. Maski planti manmeri long dispela hap i stap rabis, ples i stap klin na ol man i stap bel isi. Taim mi gat 10-pela krismas, bikbrata bilong mi i kirapim mi long joinim em long pait tae kwon do, mining bilong dispela tok em “pait long han na lek.” Papa i no amamas long nupela spot mi insait long en, tasol bihain em i orait long en.

Mi trening strong na winim planti gem bilong pait tae kwon do long provins Parana. Bihain mi winim ol nesenel gem, na long 1993, ol i givim nem long mi olsem nambawan hapmeri bilong pait tae kwon do long Brasil. Mi laik resis insait long ol intenesenel gem. Tasol famili bilong mi i stap rabis na mi no gat mani bilong baim rot i go long ol narapela kantri.

Mi gat laik tru long tae kwon do i mas insait long Olimpik Gems, na bihain dispela samting i kamap. Mi laik makim Brasil long Olimpik Gems, olsem na mi trening strong tru, na tu, ol i sponsarim mi na dispela i mekim na mi inap pait long Frans, Vietnam, Saut Korea, Japan, na long ol South American Games. Narapela mak mi putim em long insait long Pan American Games, na mi pait gut tru, olsem na mi wanpela bilong ol tripela ol i makim bilong pait long Santo Domingo, Ripablik Dominika, long 2003.

BAIBEL I SENISIM I STAP BILONG MI: Long 2001, mi na boipren bilong mi i bungim ol Witnes Bilong Jehova, na ol i kirap stadi long Baibel wantaim mipela. Pastaim mi no gat laik tumas. Long olgeta taim skin bilong mi i les, mi no putim gut tingting, na mi aislip long taim bilong stadi. Tasol maski i olsem, mi pilim tru samting mi lainim​—dispela i kamap ples klia long narapela bikpela gem mi mas insait long en.

Ol i makim mi bilong insait long tim bilong i go long ol Pan American Games, olsem na tae kwon do tisa i makim mi long insait long sampela gem i kamap paslain long dispela bikpela gem. Long taim bilong mi long pait, mi sanap long mat na mi no muv liklik​—mi no gat laik moa long pait. Wantu mi tingting olsem wanpela Kristen i no ken pait wantaim ol narapela​—maski em i spot tasol! Mi tingim tok bilong Baibel olsem “yu mas laikim tru ol wantok olsem yu laikim yu yet.” (Matyu 19:19) Mi lusim pait na mi go, na mi no gat tupela tingting long dispela. Ol man i lukluk strong long mi na ol i no bilipim samting mi mekim.

Taim mi kam bek long haus, mi sindaun na tingting long samting mi bai mekim long laip bilong mi. Mi kisim wanpela buklet ol Witnes i wokim na i stori long ol samting God i laik yumi mas mekim. Long dispela buklet mi lukim tok bilong Song 11:5 (NW), em i tok long Jehova olsem: “Jehova yet i save skelim ol stretpela man na ol man nogut. Na em i heitim tru ol man i laikim pasin pait.” Dispela tok bilong man bilong raitim song i sutim tru bel bilong mi, na mi lusim pait tae kwon do.

Ol tae kwon do tisa bilong mi i no amamas long disisen mi mekim. Ol i traim long senisim tingting bilong mi na tok mi nambawan hapmeri bilong kantri na klostu nau bai mi insait long ol Olimpik Gems. Tasol mi no inap senisim tingting bilong mi.

Long dispela taim, mi na boipren bilong mi, mipela i marit pinis. Em i kirap pinis long autim tok wantaim ol Witnes. Em i kam bek long haus na i amamas tru na i stori long ol gutpela tok em i mekim wantaim ol man bilong haus. Mi save olsem sapos mi tu i laik insait long autim tok, mi mas senisim pasin bilong mi. Mi risain long olpela lotu bilong mi na bihain mi winim mak bilong kisim baptais olsem wanpela Witnes.

GUTPELA SAMTING I PAINIM MI: Mitupela man bilong mi i stap amamas na wanbel, long wanem, mipela i wok strong long bihainim ol stiatok bilong Baibel long marit bilong mipela. Mi amamas long sapotim em taim em i helpim na lukautim kongrigesen mipela i go long en. Mi inap wok strong long winim gol medal na kisim biknem. Tasol mi pilim olsem i no gat wanpela samting long dispela graun i winim pasin bilong mekim wok bilong God Jehova.

“Papa bilong mi i no bin les long helpim mi.”​—INGO ZIMMERMANN

KRISMAS: 44

KANTRI: JEMANI

BIPO: SEKIURITI BILONG DANIS KLAP

LAIP BILONG MI LONG BIPO: Mi kamap bikpela insait long wanpela famili i no wanbel long ol samting bilong lotu, na mipela i sindaun long taun Gelsenkirchen. Papa bilong mi i wanpela Witnes Bilong Jehova. Papa i laik skulim mi, brata bilong mi, na tupela susa bilong mi, long ol bilip bilong lotu bilong em, tasol Mama i birua long em long dispela. Papa i save wok inap 10-pela aua long olgeta de long draivim ol trak. Planti taim em i kirapim wok long 2 o 3 klok long moningtaim. Maski i olsem, long olgeta taim em i lukautim mipela long ol samting bilong lotu. Tasol mi no tingim tumas hatwok bilong em.

Taim mi gat 15 krismas, mi les long go long ol miting bilong lotu em Papa i bin kirapim mi long go long en, na mi bikhet. Wanpela yia bihain, mi go joinim wanpela klap bilong boksen. Insait long tupela yia i kamap bihain, mi mekim ol pasin i bagarapim tru bel bilong papa bilong mi. Taim mi gat 18 krismas, mi go sindaun long narapela hap.

Mi laikim tru spot na mi trening inap 6-pela taim long wik​—pastaim mi lain long boksen na bihain mi hapim ain. Long ol wiken, mi na ol pren bilong mi i go long ol danis klap. Wanpela taim, mi kirapim pait wantaim wanpela kastama na i isi long mi long daunim em. Papa bilong klap i luksave long dispela na wantu em i laik kisim mi long wok olsem sekiuriti bilong klap. Em i laik givim gutpela pe long mi, olsem na mi orait long kisim dispela wok.

Long olgeta wiken mi save sanap long dua bilong klap na makim husat bai go insait long klap na husat nogat. Inap olsem 1,000 manmeri inap go insait long klap, olsem na mi save bisi tru. Planti taim pait i save kamap. Ol man i pretim mi long gan na ol botol i bruk. Sampela man em mi no larim ol i go insait long klap o mi rausim ol, ol i save wet ausait na ol i laik bekim nogut long mi. Mi gat 20 krismas na mi ting i no gat wanpela man inap winim mi. Tasol tru tru, mi gat pasin nogut tru​—mi kros hariap, hambak, bikhet, na mi laik kisim biknem.

BAIBEL I SENISIM I STAP BILONG MI: Papa bilong mi i no les long helpim mi. Em i stretim rot bambai ol i bringim nius Wastaua na Kirap!a i kam long hap mi stap long en. Mi no bin ritim ol dispela nius na ol i hip i stap long rum bilong mi. Wanpela de mi opim sampela nius na lukluk long en. Mi ritim sampela stori i toktok long olsem wanem wok politik, hevi bilong mani, na ol wok bilong lotu long nau bai pinis, na dispela i kirapim mi long ringim susa bilong mi. Em na man bilong em ol i Witnes Bilong Jehova. Ol i tokim mi olsem ol i laik stadi long Baibel wantaim mi na mi orait long dispela.

Stiatok i stap long Galesia 6:7 i kirapim mi long senisim pasin bilong mi. Mi save pinis olsem ol samting mi mekim, toktok bilong mi, na ol disisen bilong mi long nau, inap mekim sampela samting long i stap bilong mi long bihain. Na tu, tok bilong Aisaia 1:18 i strongim mi tru, em i tok: “Harim. Bai yumi mas bung na stretim tok. Maski yupela i gat planti sin, na yupela i stap olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais.” Kirap long taim mi stadi, dispela ves i helpim mi tru na mi no pilim olsem mi samting nating, na mi gat rot long kam bek na lotuim Jehova.

Insait long 6-pela mun mi mekim ol bikpela senis long laip bilong mi, maski i hatwok tru long mekim olsem. Mi mas lusim ol ples na poroman nogut em mi bin bung wantaim. Olsem na mi kirap tokim ol pren bilong mi olsem mi stadi long Baibel na mi tokim ol long samting mi lainim. Ol i wok long abrusim mi na ol i kolim mi pris. Susa bilong mi i helpim mi na mi kisim wanpela gutpela wok.

Na tu, mi kirap go long ol miting long Haus Kingdom we susa na man bilong em i save go long en, maski dispela ples i stap longwe inap 30 kilomita. I gat wanpela Haus Kingdom i stap klostu long haus bilong mi, tasol mi tingting planti long bungim ol manmeri em ol i bin save long mi taim mi liklik yet. Na tu, mi pret long go autim tok long ol haus long hap mi sindaun long en. Bai mi mekim wanem sapos mi bungim wanpela man mi bin rausim long klap o wanpela em mi bin givim drak long em? Tasol long trening mi save mekim, mi kisim skul olsem ol eksasais i hatwok tru long mekim em ol eksasais i bikpela samting tru long mekim. Olsem na taim mi winim mak bilong autim tok, mi strong tru long mekim.

Mi gat narapela hatwok mi mas winim​—mi no gat laik long rit na stadi. Tasol mi save olsem sapos mi laik kisim strongpela bilip, mi mas bosim gut skin na stadi gut long ol tok bilong Baibel. Mi kisim save olsem wankain olsem long pasin bilong hapim ain, mi mas wok strong bilong kisim strong.

GUTPELA SAMTING I PAINIM MI: Mi stap laip yet! Mi mas was gut yet bambai ol pasin bilong mi long bipo i no ken daunim mi. Tasol nau mi na meri bilong mi i amamas tru long famili bilong mipela, we mipela i save bihainim ol gutpela pasin Kristen. Namel long ol Witnes Bilong Jehova, mi gat ol gutpela pren em mi ken bilip tru long ol. Papa bilong mi i dai inap 5-pela yia i go pinis, tasol paslain long em i dai em i amamas long kisim bek pikinini man bilong em.

[Futnot]