Rot Namba 2
Sakim Laik Bilong Skelim Yu Yet Wantaim Ol Narapela
BAIBEL I TOK WANEM? “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man.”—Galesia 6:4.
BILONG WANEM I HATWOK? Ating yumi gat laik long skelim yumi yet wantaim ol narapela—sampela taim wantaim ol man i no gat planti samting olsem yumi, na planti taim wantaim ol man i gat strong, planti mani kago, o i gat save long mekim ol kain kain samting winim yumi. Maski yumi skelim yumi yet wantaim husat, i no gat gutpela samting i save kamap long dispela pasin. Yumi popaia na ting olsem samting i mekim na man i gutpela tru em ol samting em i holim o ol samting em inap mekim. Taim yumi mekim olsem, yumi inap kirapim man long kisim pasin mangal na pasin bilong resis.—Saveman 4:4.
YU INAP MEKIM WANEM? Traim long tingim yu yet olsem God i save tingim yu. Larim tingting bilong em i stiaim tingting yu gat long yu yet. God i tok: “Ol man i save lukluk long bodi. Tasol mi save lukim tingting na laik bilong man na mi skelim ol.” (1 Samuel 16:7) Jehovaa i save skelim bel, tingting, na laik bilong yu, na em i tingim yu olsem gutpela samting, em i no save skelim yu wantaim ol narapela. (Hibru 4:12, 13) Jehova i save long skel bilong yu, na em i kirapim yu long mekim ol samting inap tasol long skel bilong yu. Sapos yu skelim yu yet wantaim ol narapela, yu inap kisim pasin antap o oltaim bai yu bel nogut. Olsem na long pasin daun luksave olsem yu no inap mekim gut olgeta samting.—Sindaun 11:2.
Yu mas mekim wanem na bai God i tingim yu olsem gutpela samting? Em i kirapim profet Maika long tok: “Bikpela i tokim yumi pinis long ol gutpela pasin, na em i laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol.” (Maika 6:8) Sapos yu bihainim dispela tok, God bai lukautim yu. (1 Pita 5:6, 7) Dispela em i bikpela samting tru bilong stap belgut.
[Futnot]
a Em nem bilong God olsem i stap long Baibel.
[Piksa long pes 5]
Jehova i save skelim bel bilong yumi na tingim yumi olsem gutpela samting