Gutpela Samting Tru Inap Kamap!
FAMILI LOTU na Baibel stadi i bikpela samting bilong helpim papamama long trenim ol pikinini bilong ol “olsem Jehova i makim, na putim tingting bilong em long bel bilong ol.” (Efe. 6:4) Tasol sapos yu wanpela papa o mama, yu save olsem ol pikinini i save les kwik. Yu ken mekim wanem bilong kirapim tingting bilong ol? Tingim samting sampela papamama i bin mekim.
George bilong California, Amerika, i tok: “Taim ol pikinini bilong mitupela i liklik, mi na meri bilong mi i bihainim kain kain rot bilong mekim famili stadi na bai ol pikinini i amamas long en. Sampela taim mipela i bilas olsem wanpela man bilong Baibel na ektim wanpela stori mipela i ritim long buk Baibel Stori Buk Bilong Mi. Mipela i wokim ol samting bilong pilai, olsem bainat, stik bilong king, basket, na ol kain samting olsem. Na mipela i pilaim Baibel gem we wanpela i makim wanpela man bilong Baibel na ol narapela i ges em i husat. Na tu, mipela i mekim wanpela Baibel gem we mipela i raitim sampela askim bilong Baibel long hap pepa—sampela askim ol i strongpela askim na sampela i no hatwok long bekim. Na mipela i mekim ol projek olsem wokim sip bilong Noa o wokim wanpela sat, olsem taim-lain, i makim ol yia long Baibel we ol bikpela samting i bin kamap. Sampela taim mipela i save droim ol piksa i makim ol man Baibel i stori long ol. Long nau mipela i tingting long droim dispela klos pait em Efesus 6:11-17 i stori long en, na mipela wan wan bai stori long wan wan hap bilong dispela klos pait i makim wanem samting. Ol dispela pasin bilong stadi i bin helpim mipela long kisim amamas long famili stadi.”
Debi, wanpela mama long Michigan, Amerika, i tok: “Mi na man bilong mi i hatwok tru long kirapim pikinini meri i gat 3-pela krismas long putim gut yau. Tasol wanpela de mi ritim stori bilong Aisak na Rebeka long buk Baibel Stori Bilong Mi, na mi kisim tupela doli na mekim wanpela i makim maus bilong Aisak na narapela em Rebeka. Nau em i kirap long putim gut yau! Long ol mun bihain, mi yusim dispela tupela doli bilong makim ol narapela narapela man Baibel i stori long en. Taim mipela i ritim pinis wanpela stori, pikinini i save raun long haus bilong painim sampela toi o narapela samting bilong ektim dispela stori. Wanpela bokis na retpela string i makim haus bilong Rahap. Wanpela longpela (1.5 mita) toi snek i raunim wanpela stik i makim snek bras em Namba 21:4-9 i stori long en. Mipela i putim ol dispela samting bilong pilai long wanpela bikpela beg. Planti taim pikinini i save sindaun na painim painim ol samting insait long ‘Baibel stori beg’ bilong em. Mipela i amamas tru long lukim em i pilai na kamapim ol stori long pasin bilong em yet!”
Mekim bikpela long ol pikinini em samting i gat hatwok long en. Tru, bilong kirapim laik bilong ol pikinini long mekim wok bilong Jehova, papamama i mas stadi wantaim ol long olgeta wan wan wik, na ol i mas mekim sampela samting moa. Tasol famili lotu na Baibel stadi em i nambawan rot bilong helpim ol pikinini long kisim sampela tok moa long Baibel. Tru tumas, long hatwok bilong yu, gutpela samting tru inap kamap!