Jisas​—⁠As na Em i Dai

‘Pikinini bilong man i kam bilong givim laip bilong em olsem pe bilong baim bek planti manmeri.’​—MAK 10:⁠45.

JISAS i save long ol samting bai painim em. Em i save olsem em bai i no stap bel isi long laip bilong em, nogat. Em i save olsem em bai dai taim em i gat 30 krismas samting, na em i redi long i dai.

Baibel i tok olsem indai bilong Jisas i gat bikpela mining bilong en. Wanpela buk i tok Ol Skripsa Grik, olsem Nupela Testamen, i stori inap 175 taim long indai bilong Jisas. Tasol bilong wanem Jisas i mas karim bikpela pen na i dai? Yumi mas save long dispela, long wanem, indai bilong Jisas inap mekim bikpela samting long laip bilong yumi.

▪ Jisas i save long samting bai painim em Long laspela yia bilong laip bilong em, Jisas i givim tok lukaut long ol disaipel bilong em long pen na hevi na indai bilong em. Taim Jisas i go long Jerusalem bilong mekim laspela Pasova, em i tokim ol 12-pela aposel bilong em: “Ol bai putim Pikinini bilong man long han bilong ol bikpris na ol saveman bilong Lo. Ol bai kotim em na tok long em i mas i dai na ol bai putim em long han bilong ol man bilong ol arapela lain. Na ol bai tok bilas long em na spetim em na wipim em na kilim em i dai.”a (Mak 10:​33, 34) Bilong wanem em i save long ol samting bai painim em?

Jisas i save gut long ol tok profet bilong Ol Skripsa Hibru em ol i stori long laip bilong em bai pinis olsem wanem. (Luk 18:​31-33) Tingim sampela bilong ol dispela tok profet na ol ves bilong Baibel em ol i stori long olsem wanem ol dispela tok profet i kamap tru.

Samting bai painim Mesaia . . .

▪ Man i kamapim em bilong kisim 30 silva koin.​—SEKARAIA 11:12; MATYU 26:​14-16.

▪ Ol i spetim em na paitim em.​—AISAIA 50:6; MATYU 26:67; 27:​26, 30.

▪ Nilim em long pos.​—SONG 22:16; MAK 15:​24, 25.

▪ Ol i tok bilas long em taim em i hangamap long diwai.​—SONG 22:​7, 8; MATYU 27:​39-43.

▪ Ol i kilim em i dai na i no brukim wanpela bun bilong em.​—SONG 34:20; JON 19:​33, 36.

Jisas i bin truim ol dispela tok profet na planti narapela tok profet moa. Yumi save olsem em i no inap mekim ol dispela samting long strong bilong em yet. Truim bilong ol dispela tok profet i kamap tru long Jisas, na dispela i soim olsem God i bin salim em i kam.b

Tasol bilong wanem Jisas i mas karim pen na i dai?

▪ Jisas i dai bilong stretim sampela bikpela tok Jisas i save long ol bikpela tok i bin kamap long gaden Iden em ol lain long heven na graun i insait long en. Wanpela bikhet ensel i kirapim Adam na Iv na ol i sakim tok bilong God. Taim tupela i mekim pasin bikhet, i olsem ol i tok i no stret God i stap nambawan bos, o pasin bilong em long bosim ol man i no stret. Na tu, pasin bikhet bilong ol i kamapim askim olsem ating man i no inap stap gut long God sapos traim i painim em.​—⁠Stat 3:​1-6; Jop 2:​1-5.

Jisas i kamapim klia tru olsem i stret Jehova i stap nambawan bos na ol man inap i stap gut long God. Long rot bilong bihainim tru tok bilong God “i go inap long em i dai . . . long diwai pos,” Jisas i stap gut long wok bos bilong God. (Filipai 2:⁠8) Na tu, Jisas i kamapim olsem man i gutpela olgeta inap i stap gut olgeta long God, maski ol bikpela traim i painim em.

▪ Jisas i dai bilong baim bek ol man Aisaia i bin tok profet olsem Mesaia bai karim planti pen na em bai dai, na dispela bai tekewe sin bilong ol manmeri. (Aisaia 53:​5, 10) Jisas i kliagut long dispela samting, na em i amamas long givim “laip bilong em olsem pe bilong baim bek planti manmeri.” (Matyu 20:28) Indai bilong em olsem ofa i opim rot long ol man i gat sin long pas gut wantaim Jehova na bilong kisim bek ol long sin na dai. Na tu, em i opim rot long yumi long kisim samting Adam na Iv i bin lusim​—⁠em laip i stap gut oltaim oltaim long graun.c​—⁠Revelesen 21:​3, 4.

▪ Samting yu ken mekim Long ol dispela stori, mipela i kamapim ol tok em Baibel i mekim long Jisas olsem em i bilong we, ol wok em i mekim, na as na em i dai. Taim yumi kisim save long ol dispela tok i tru bilong Jisas, dispela bai helpim yumi long stretim sampela tingting kranki yumi gat long em. Na tu, sapos yumi bihainim ol tok bilong em, dispela bai givim ol blesing long yumi​—⁠olsem laip bilong yumi long nau bai i gutpela moa na bihain bai yumi inap kisim laip oltaim. Baibel i tokim yumi long ol samting yumi mas mekim bilong kisim ol dispela gutpela samting.

▪ Kisim sampela save moa long Jisas Krais na ol wok em i mekim bilong kamapim ol samting Jehova i tingting pinis long mekim.​—JON 17:⁠3.

▪ Bilip long Jisas, na long wokabaut bilong yu kamapim olsem yu orait long em olsem Man Bilong Kisim Bek yu.​—JON 3:36; APOSEL 5:⁠31.

Ol Witnes Bilong Jehova bai amamas long helpim yu long kisim sampela save moa long Jisas Krais, em “Pikinini tru” bilong God, na long rot bilong em yumi inap kisim presen bilong “laip oltaim.”​—⁠Jon 3:16.

[Ol Futnot]