Armagedon Sampela i Tok Em Wanem Samting?

“Ol dispela tok i bringim ol king i kam bung long dispela ples, long tok Hibru ol i kolim Armagedon.”—REVELESEN 16:16.

YU TINGIM wanem samting taim yu harim dispela tok “Armagedon”? Ating yu tingim wanpela bikpela bagarap. Tru, dispela tok i stap wanpela taim tasol long Baibel, tasol ol niuslain na ol hetman bilong lotu i save kolim dispela tok planti taim.

Yu ting tingting bilong planti man long Armagedon i stret wantaim tok bilong Baibel? I gutpela yumi save long bekim bilong en. Bilong wanem? Long wanem, taim yu kisim stretpela save long Armagedon, dispela inap mekim na bai yu wetim gutpela samting i kamap bihain, yu holim stretpela tingting long God, na bai yu no pret nating.

Orait, tingim 3-pela askim na skelim tingting bilong ol man long Armagedon wantaim tok bilong Baibel.

1. YU TING ARMAGEDON EM DISASTA OL MAN YET I KAMAPIM?

Planti taim ol niusman na ol man i mekim wok painimaut i kolim dispela tok “Armagedon” bilong makim wanpela bikpela bagarap ol man yet i kamapim. Olsem, ol i bin kolim Wol Woa 1 na Wol Woa 2 olsem Armagedon. Bihain long dispela tupela woa, ol man i pret olsem nogut Amerika na Soviet Yunion bai kirapim wanpela pait nuklia. Ol niuslain i kolim dispela pait olsem “nuklia Armagedon.” Ol man bilong mekim wok painimaut husat i pret olsem polusen bai kamapim ol bikpela senis long weda, ol i tok lukaut olsem bai i gat “klaimet Armagedon.”

Tok bilong ol i makim olsem: Ol man i kontrolim olgeta samting bai kamap bihain long graun na olgeta samting i gat laip. Sapos gavman i no bihainim gutpela tingting na mekim sampela samting, orait graun bai bagarap olgeta.

Tok bilong Baibel: God i no inap larim ol man i bagarapim dispela graun. Baibel i tokim yumi olsem Jehovaa i no wokim dispela graun “bilong i stap nating,” nogat. Em i wokim bilong “olgeta samting i ken i stap long en.” (Aisaia 45:18) God bai “bagarapim ol man i wok long bagarapim graun.”—Revelesen 11:18.

2. YU TING ARMAGEDON EM DISASTA I KAMAP NATING?

Sampela taim, ol niusman i save yusim dispela tok “Armagedon” bilong makim ol bikpela disasta. Olsem: Long 2010, wanpela ripot i tok “‘Armagedon’ i kamap long Haiti.” Dispela ripot i stori long bikpela pen na hevi, bagarap, na indai bilong planti man em bikpela guria i bin kamapim long dispela kantri. Ol niusman na ol muvi lain i kolim dispela tok bilong makim ol bikpela bagarap i kamap pinis, na tu, ol i kolim bilong makim ol bikpela bagarap em ol i ting bai kamap bihain. Olsem: Ol i yusim dispela tok “Armagedon” bilong stori long bagarap bai kamap sapos wanpela komet i bamim graun.

Tok bilong ol i makim olsem: Armagedon i kamap nating na kilim nabaut kain kain man i no gat asua. I no gat wanpela samting yu inap mekim bilong lukautim yu yet na yu no kisim bagarap.

Tok bilong Baibel: Armagedon bai i no bagarapim nating ol man, nogat. Long taim bilong Armagedon, ol man nogut tasol bai pinis olgeta. Baibel i tok promis olsem klostu nau “bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol.”—Song 37:10.

3. YU TING GOD BAI BAGARAPIM GRAUN LONG ARMAGEDON?

Planti manmeri bilong lotu i bilip olsem Armagedon em laspela pait namel long ol gutpela man na ol man nogut na em bai pinisim graun bilong yumi. Wanpela wok painimaut bilong lain Princeton Survey Research Associates long Amerika i kamapim olsem inap 40 pesen bilong ol man i bikpela pinis i bilip olsem graun bai pinis long “pait bilong Armagedon.”

Tok bilong ol i makim olsem: God i no wokim ol man bilong i stap oltaim long graun, na tu, God i no wokim graun bilong i stap oltaim. Taim God i wokim ol man, em i makim olsem i gat wanpela taim we olgeta man i mas i dai.

Tok bilong Baibel: Baibel i tokaut klia olsem God i “bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” (Song 104:5) Na Baibel i tok long ol manmeri bai stap long graun olsem: “Ol stretpela man bai i kisim graun God i givim ol, na bai ol i stap oltaim long en.”—Song 37:29.

Em nau, yumi luksave olsem tingting bilong ol man long Armagedon i no stret wantaim tok bilong Baibel. Olsem na i gat wanem stretpela save long dispela samting?

[Futnot]