Yu Save Long Dispela?

Wanem dispela “ples kot” ol man i bringim aposel Pol i go long en?

▪ Aposel 18:12, 13 i stori olsem ol Juda long Korin i sutim tok long Pol olsem em i brukim lo na autim tok, na ol i bringim em i go long “ples kot,” olsem beʹma (tok Grik i makim “step”). Taun Korin bilong bipo i gat wanpela bikpela pletfom long ples maket na ating em i stap klostu long haus lotu. Ol man i save sanap long dispela pletfom taim ol i laik toktok long bikpela lain manmeri. Ol i wokim dispela pletfom long blupela na waitpela ston mabol na bilasim gut long ol stetiu, na i gat tupela rum i gat ol fom bilong sindaun na plua em ol i wokim long ol ston mabol i gat kain kain kala.

Ating dispela pletfom em dispela ples kot we aposel Pol i sanap long en long ai bilong gavana Galio bilong Rom, em man i bosim Akaia. Long dispela hap, ol ofisa i save sindaun na harim kot na toksave long ol manmeri long ol disisen bilong ol.

Long ol bikpela taun bilong kantri Grik, em pasin bilong ol man long bung long kain beʹma olsem bilong mekim ol disisen bilong komiuniti. Long stori bilong kot bilong Jisas, tok Grik long Matyu 27:19 na Jon 19:13 i tok Pontius Pailat i bin sanap long beʹma na toktok long ol manmeri.—Aposel 12:21.

Bilong wanem pasin Jisas i dai long en i pasim sampela Juda long kamap Kristen?

▪ Aposel Pol i tok long ol Kristen bilong pastaim olsem: “Yumi autim tok long ol i bin nilim Krais long pos. Dispela tok i mekim ol Juda i pundaun, na long olgeta arapela lain pipol dispela tok i olsem longlong tok.” (1 Korin 1:23) Bilong wanem pasin Jisas i bin i dai long en i pasim sampela long kamap Kristen?

Saveman bilong Baibel, em Ben Witherington Namba 3, i stori long dai bilong Jisas na kalsa bilong ol man long hap bilong Midel Is long bipo, na em i tok “dispela kain pasin bilong indai i samting bilong sem nogut tru long en long dispela hap. Ol man i no tingim dispela olsem gutpela rot bilong man i redi long i dai bilong holimpas bilip.” Witherington i tok moa: “Ol manmeri long dispela taim i bilip olsem pasin man i dai long en i makim em i wanem kain man. Olsem na ol i tingim Jisas olsem wanpela raskol, man i birua long gavman, na i stret em i kisim strafe wankain olsem wanpela sleiv i bikhet long gavman.” Taim yumi tingim ol dispela samting, yumi ken save olsem ol Kristen bilong pastaim i no kamapim nating dispela stori long indai na kirap bek bilong Jisas.