Yu Ting Bilip Bilong Lotu i Bilong Mekim Man i Pilim Gutpela Tasol?

Ol samting bilong mekim man i pilim gutpela, inap giamanim man na pasim em long wokim gut tingting. Olsem, sampela i save kisim alkohol bilong mekim ol i pilim gutpela. Pastaim, ating alkohol i mekim na man i bilip long em yet na i ting olsem em inap karim ol hevi bilong laip. Tasol bihain, pasin bilong man long kisim alkohol bilong pilim gutpela, dispela i bagarapim em yet. Yu ting bilip bilong lotu inap kamapim wankain samting?

Sampela man i ting bilip bilong lotu i wankain olsem pasin bilong bilip nating. Ol i tok olsem ol man i lotu ol i no laik wokim tingting o larim ol evidens i stiaim bilip bilong ol. Ol dispela man i tok, ol bilipman bilong lotu i no tingim ol samting i save kamap tru.

Baibel i stori planti long pasin bilong bilip. Tasol Baibel i no kirapim yumi long bilip nating tasol. Na tu, Baibel i no orait long man i no yusim het na wokim tingting. Baibel i tok, ol man husat i bilip long olgeta tok ol i harim, ol i gat liklik save tasol na ol i longlong man. (Sindaun 14:15, 18) Tru tumas, em longlong tingting long yumi bilip nating long wanpela tok na yumi no painimaut dispela tok em i tru o nogat! Em wankain olsem yumi karamapim ai na brukim rot i gat planti kar i ron long en bikos wanpela man i tokim yumi long mekim olsem.

Baibel i no kirapim yumi long bilip nating, nogat, em i tok ai bilong yumi mas op i stap na bai ol man i no inap giamanim yumi. (Matyu 16:6) Ai bilong yumi i op taim yumi yusim “gutpela tingting.” (Rom 12:1) Baibel i skulim yumi long skelim ol evidens na bilip long ol samting i gat as tru bilong en. Tingim sampela tok aposel Pol i bin raitim.

Taim Pol i raitim pas long kongrigesen long Rom, em i no laik bai ol i bilip long God, long wanem, em i tokim ol long mekim olsem, nogat. Em i kirapim ol long skelim ol evidens i kamapim klia olsem God i stap tru. Em i tok: “Kirap long taim God i wokim olgeta samting na i kam inap long nau, ol man i lukim ol samting God i bin wokim na long dispela rot ol inap save long ol pasin bilong en i stap hait. Na ol i save long bikpela strong bilong en i stap oltaim na ol i save olsem tru tru em i God. Olsem na i no gat eskius long ol [ol man i no daun long wok bos bilong God] i tok ol i no save long em.” (Rom 1:20) Pol i mekim wankain tok long pas em i raitim long ol Hibru. Em i tok: “Olgeta wan wan haus i gat man i bin wokim. Tasol man i bin wokim olgeta samting em God.” (Hibru 3:4) Long pas Pol i raitim long ol Kristen i stap long Tesalonaika, em i tokim ol long skelim gut ol samting ol i bilip long en. Em i tokim ol, “skelim olgeta samting, bai yupela i ken save olsem ol i stret o nogat.”—1 Tesalonaika 5:21.

Bilip em stretpela save i no as bilong en, inap kamap samting bilong mekim man i pilim gutpela, na em inap giamanim man na givim hevi long em. Pol i stori long sampela man bilong lotu long taim bilong em na i tok: “Mi tokaut olsem ol i save givim bel tru long mekim wok bilong God, tasol ol i no gat stretpela save na ol i mekim olsem.” (Rom 10:2) Olsem na em i bikpela samting long yumi mas bihainim edvais em Pol i givim long kongrigesen Rom! Em i tok: “Yupela i mas kisim nupela tingting na bai pasin bilong yupela i senis. Olsem bai yupela i ken save tru long laik bilong God, em dispela laik em i gutpela, na em i orait, na i gutpela olgeta.” (Rom 12:2) Bilip em stretpela save long God i as bilong en, i no samting bilong mekim man i pilim gutpela, nogat, kain bilip i olsem wanpela “hap plang” i lukautim yumi long ol samting inap bagarapim bel na tingting bilong yumi na pasin bilong yumi long pas gut wantaim God.—Efesus 6:16.