Tru Tru Jehova i Save Tingim Yu?

“Mi pilim olsem mi samting nating tasol na dispela em i wanpela bikpela samting we i pasim rot bilong mi long i go klostu long God, na mi wok strong long daunim dispela tingting.” Em tok bilong wanpela meri husat i hatwok long bilip olsem Jehova i tingim em. Olsem wanem? Yu gat wankain tingting olsem em? Sapos olsem, ating bai yu tingting, ‘Jehova i save tingim tru ol wan wan manmeri i lotuim em?’ Yumi ken tok yes! Tok bilong Jisas i kamapim klia olsem Jehova i save tingim olgeta wan wan.—Ritim Jon 6:44.

Jisas em man husat i save gut tru long ol pasin na laik bilong Jehova, em i tok wanem? (Luk 10:22) Jisas i tok: “I no gat man inap kam long mi sapos Papa, husat i bin salim mi i kam, i no kirapim em long kam long mi.” Olsem na sapos Jehova yet i no bin kirapim yumi long i go long em, yumi no inap kamap wanpela disaipel bilong Krais na stap olsem man o meri i lotuim Papa bilong yumi long heven, Jehova. (2 Tesalonaika 2:13) Sapos yumi kliagut long tok bilong Jisas, orait bai yumi save tru olsem God i save tingim yumi olgeta wan wan.

Olsem wanem Jehova i kirapim yumi long i go long em? Insait bilong tok Grik ol i tanim olsem “kirapim em long kam,” ol i tanim tu olsem “pulim” taim ol i tok long pasin bilong pulim umben i gat pis long en i kam antap. (Jon 21:6, 11) Yu ting Jehova i subim yumi long mekim laik bilong em? Nogat. Jehova i larim yumi stap fri bilong makim wanem samting yumi laik mekim, olsem na em i no save subim yumi long givim bel long mekim wok bilong em. (Lo 30:19, 20) Jehova i save skelim bel bilong planti bilion manmeri bilong dispela graun, na em i wok long painim ol manmeri i gat gutpela bel na i laik lotuim em. (1 Stori 28:9) Taim em i painim kain man olsem, em i save mekim gutpela samting long dispela man.

Isi isi Jehova i save kirapim bel bilong man em “bel bilong ol i gutpela.” (Aposel 13:48) Jehova i save mekim olsem long tupela rot, em long rot bilong gutnius bilong Baibel em yumi wan wan i kisim save long en, na long rot bilong holi spirit bilong em. Taim Jehova i lukim bel bilong wanpela man i gat laik long harim tok i tru bilong Baibel, em i yusim holi spirit bilong em long helpim dispela man long kliagut long tok i tru na bihainim long i stap bilong em. (1 Korin 2:11, 12) Sapos Jehova i no helpim yumi olsem, bai yumi no inap kamap disaipel tru bilong Jisas na givim bel olgeta long lotuim Jehova.

Orait, ol tok bilong Jisas long Jon 6:44 i skulim yumi olsem wanem long God Jehova? Jehova i save pulim ol man i kam long em, long wanem, em i lukim gutpela samting i stap long bel bilong ol na em i save tingim ol wan wan. Meri em mipela i kamapim tok bilong em long kirap bilong dispela stori, em i kliagut long dispela gutpela tok i tru na dispela i mekim gut bel bilong en. Em i tok: “Mi save mekim wok bilong Jehova na dispela em i nambawan gutpela samting yumi inap mekim. Na sapos Jehova i makim mi long mekim wok bilong em, mi ken save mi gutpela samting tru long ai bilong em.” Olsem wanem long yu? Nau yu save olsem Jehova i tingim olgeta wan wan man i lotuim em na dispela i kirapim yu long i go klostu moa long em?