I Gat Wanpela i Tingim Mi Tru?
Olsem wanem? Sampela taim yu pilim olsem yu stap wanpis na i no gat helpim, i olsem i no gat wanpela husat i pilim ol hevi yu wok long karim? Na sapos sampela i save long ol hevi bilong yu, yu pilim olsem ol i no save tingim tru dispela.
TAIM ol hevi i kamap, yumi inap pilim olsem wanpela strongpela win i wok long sakim yumi na i no gat pinis bilong en. Sampela taim, hevi yumi karim i bikpela tru o pasin sampela i mekim long yumi i no stret liklik, olsem na yumi pilim olsem yumi no inap karim moa dispela hevi. Planti taim dispela i kamap taim bel bilong yumi i bagarap tru, yumi bel hevi, yumi kisim bikpela bagarap long eksiden, yumi gat bikpela sik, o kain samting olsem. Yumi inap pilim olsem yumi no gat helpim o yumi no gat rot, olsem na yumi tingting planti long yumi inap kisim we samting bilong mekim isi bel bilong yumi. I gat wanpela i tingim tru yumi?
“God Bilong Mekim Isi Bel” i Save Tingim Yumi
Baibel i tok God em i “as bilong olgeta pasin marimari na pasin sori. Em i God bilong mekim isi bel bilong olgeta man.” (2 Korin 1:3) God, nem bilong em Jehova, em i save olsem i mas i gat man bilong mekim isi bel bilong yumi. Inap planti handet taim Baibel i kolim ol kain tok olsem “mekim isi bel,” na dispela i soim olsem God i save pilim hevi bilong yumi, na tu, em i gat laik long mekim isi bel bilong yumi. Dispela i kamapim klia olsem maski i luk olsem ol narapela i no lukim hevi yumi karim, o i no pilim dispela hevi, o i no tingim yumi, God Jehova i save tingim tru yumi.
Baibel i kamapim klia tru olsem Jehova i save tingim ol man wan wan. Baibel i tok: “Bikpela i save lukim olgeta samting i kamap long olgeta hap. Em i lukim ol gutpela man na ol man nogut tu.” (Sindaun 15:3) Na Jop 34:21 tu i tok: “God i save lukim olgeta pasin bilong yumi manmeri na olgeta hap yumi go long en.” Jehova i save lukim ol samting yumi mekim—ol gutpela samting o ol samting nogut—na em i save long sindaun bilong yumi, olsem na em i ken mekim ol samting em i ting i stret long yumi. Tok em profet Hanani i mekim long King Asa bilong Juda i strongim dispela tok, em i tok: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”—2 Stori 16:7, 9.
I gat narapela as na Jehova i save was gut long yumi. Jisas i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Jehova i tingim man, olsem na em i skelim bel bilong em bilong save olsem man i gat laik long save gut long God o nogat. Sapos wanpela i laik save gut long God, God inap helpim dispela man long ol narakain gutpela rot. Olsem, long Ripablik Dominika, wanpela meri i stap long haus sik. Em i gat kensa na ol dokta i laik katim em. Em i beten askim God long helpim em long painim lotu i tru. Long dispela taim stret, man bilong em i bringim buklet God i Laik Yumi Mas Mekim Wanem?a i kam long em. Man i bin kisim buklet long dispela moning long wanpela Witnes Bilong Jehova i bin kam long haus bilong em. Meri i ritim buklet na i luksave olsem dispela em i bekim bilong God long beten bilong em. Em i orait long stadi long Baibel wantaim ol Witnes, na inap 6-pela mun bihain, em i dediketim laip bilong em long God na kisim baptais.
Long Buk Song bilong Baibel, yumi ken lukim planti gutpela tok bilong ol man Hibru bilong raitim ol song, olsem tok bilong King Devit. Ol i stori long gutpela pasin bilong Jehova long lukautim ol wokboi bilong em. Long Song 56:8, King Devit i beten long God olsem: “Mi krai i stap. Orait yu tingting yet long dispela, na yu raitim pinis long buk bilong yu.” Olsem dispela tok i kamapim, Devit i save olsem Jehova i pilim hevi em i karim, na tu, Em i save long samting dispela hevi i mekim long bel bilong Devit. Jehova i pilim hevi bilong Devit na i tingim ol samting em i pilim long bel na i mekim Devit i krai. Tru tumas, Man Bilong Wokim yumi i was gut long olgeta man i wok strong long mekim laik bilong em, em “ol manmeri i save aninit long em wanpela tasol.”
Song 23 em narapela hap bilong Baibel i stori long gutpela pasin bilong God long tingim ol man. Kirap bilong dispela song i tok God i olsem wanpela gutpela wasman bilong ol sipsip: “Bikpela em i wasman bilong mi. Olsem na mi no inap sot long wanpela samting.” Wanpela wasman bilong sipsip long Midel Is i save lukautim olgeta wan wan sipsip bilong em, em i save givim nem tu long ol. Long olgeta de em i save singautim ol sipsip i kam long em na i mekim gut long ol na lukim sapos ol i gat sua samting long skin. Sapos em i painim sua, em i save putim wel long skin na bai sua i drai hariap. Sapos sipsip i sik, ating wasman i mas strong long givim marasin long sipsip na helpim em long sanap, nogut em i slip long graun na i dai. Dispela i makim gut pasin bilong Jehova long lukautim ol man i askim em long helpim ol.
Prea na Kirap Bek—Samting i Soim Olsem God i Tingim Yumi
Ol dispela song na sampela narapela song i no stap tasol long Baibel bilong yumi ken ritim na amamas long en. Nogat. Ol i soim yumi olsem wanem ol gutpela wokboi bilong God long bipo i bin kamapim bel bilong ol long Jehova na askim God long helpim ol, na tu, ol i tok tenkyu long God i stiaim na blesim ol. Ol dispela tok i kamapim klia olsem ol dispela wokboi bilong God long bipo, ol i bilip tru olsem God i tingim ol. Pasin bilong ritim na tingim tingim long bel ol dispela gutpela tok inap helpim yumi long kisim wankain tingting long God. Prea em i wanpela bikpela samting i kamapim klia olsem God i save tingim yumi.
Tasol sampela taim wanpela hevi i daunim tru yumi na yumi no save long olsem wanem bai yumi beten long dispela samting. Yu ting dispela i mekim na Jehova i no inap save long bel hevi bilong yumi? Rom 8:26 i bekim dispela askim: “Holi Spirit i save helpim yumi man i no gat strong. Yumi no save yumi mas prea long wanem samting. Yumi save krai long bel tasol, na yumi no inap long tokaut. Na long dispela pasin Holi Spirit yet i save prea bilong helpim yumi.” Dispela skripsa i soim olsem ol prea bilong ol wokboi bilong God bilong bipo inap kamapim wankain tingting olsem i stap long bel bilong yumi, olsem na yumi ken save olsem Jehova, Man bilong “harim beten,” em bai harim beten bilong yumi.—Song 65:2.
Kirap bek i narapela samting i kamapim klia olsem God i save tingim olgeta wan wan man. Jisas Krais i tok: “Taim i laik kamap na olgeta manmeri i stap long matmat [“memorial matmat,” NW] ol bai i harim maus bilong Pikinini, na ol bai i lusim matmat na i kam ausait.” (Jon 5:28, 29) Tok Grik i stap long dispela ves ol i tanim stret olsem “memorial matmat” na i no “matmat” tasol. Dispela tok i makim olsem God i tingim man i dai pinis, olsem em i wanem kain man taim em i bin stap laip.
Tingim, bilong kirapim bek wanpela man, God i mas tingim olgeta samting bilong em, olsem em i bin luk olsem wanem, olgeta kain save em yet i bin kisim na olgeta kain pasin em i bin kisim long papamama, na olgeta samting i stap long tingting bilong em! (Mak 10:27) God i no save lusim tingting long dispela man, maski man i bin stap inap planti tausen yia i go pinis. (Jop 14:13-15; Luk 20:38) Olsem na planti bilion manmeri husat i dai pinis, God Jehova i save tingim olgeta samting bilong ol—dispela i kamapim klia tru olsem God i save tingim yumi olgeta wan wan!
Jehova i Man Bilong Mekim Gut Long Man
Yumi mas mekim wanem na bai God i tingim na mekim gut long yumi? Yumi mas soim olsem yumi trastim em na bihainim tok bilong em, olsem yumi bilip long em. Aposel Pol i soim olsem yumi mas i gat bilip na bai God i ken mekim gut long yumi. Em i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.”—Hibru 11:6.
I gat tupela samting bilong bilip em God i save amamas long en. Namba wan, yumi mas “bilip olsem God i stap” na em i Nambawan Bikpela King, na i stret yumi bihainim tok bilong em na lotuim em. Namba tu, yumi mas bilip olsem em i “save mekim gut tru long ol man i wok long painim em.” Man i bilip tru em i bilip olsem God i tingim i stap bilong ol man i wok strong long mekim laik bilong em na i bilip olsem em i mekim gut long ol. Long rot bilong stadi long Baibel na bung wantaim ol manmeri i bihainim tok bilong em, yu tu inap kisim kain bilip i kirapim God long tingim yu tru na mekim gut long yu.
Long nau planti man i ting olsem God i no save tingim i stap bilong ol man. Tasol olsem yumi lukim pinis, Baibel i soim olsem God i tingim tru ol man i bilip tru long em. Maski laip long nau i pulap long ol hevi, wari, na bel i bagarap, yumi no ken bel hevi tumas. God Jehova i save tingim yumi. Long gutpela pasin em i save singautim yumi long beten askim em long helpim yumi. Man bilong raitim song i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”—Song 55:22.
[Futnot]
a Ol Witnes Bilong Jehova i wokim.
[Blok/Piksa long pes 29]
Ol Skripsa Bilong Strongim Bilip Bilong Yu Olsem God i Save Tingim Yu
“Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”—2 STORI 16:9
“Mi krai i stap. Orait yu tingting yet long dispela, na yu raitim pinis long buk bilong yu.”—SONG 56:8
“Bikpela em i wasman bilong mi. Olsem na mi no inap sot long wanpela samting.”—SONG 23:1
“Yu save harim beten bilong mipela. Olsem na mipela olgeta manmeri i mas i go long yu.”—SONG 65:2
“Bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples na kam long yu.”—JOP 14:15
“Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.”—HIBRU 11:6
“Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”—SONG 55:22