Jehova i Save Tingim Yu
“God i save wari long yupela. Olsem na olgeta hevi yupela i karim, yupela i mas putim long han bilong en.”—1 PITA 5:7.
1. Jehova na Satan i narapela narapela kain long wanem bikpela samting?
JEHOVA na Satan i narapela narapela kain. Ol man i pilim olsem ol i stap klostu long Jehova, ol i nolaik tru long Satan. Buk Encyclopædia Britannica (1970) i kamapim dispela samting. Em i stori long wok Satan i mekim, olsem i stap long Buk Jop long Baibel, na em i tok: ‘Wok bilong Satan i bilong raun long graun na painim wok o sampela man em i ken sutim tok long ol; olsem na wok bilong em i narapela kain tru long wok em “ai bilong Bikpela” i mekim, em i save lukluk i go long olgeta hap graun bilong strongim olgeta samting i gutpela (II Chron. xvi, 9). Satan i save tingting nogut long gutpela pasin bilong ol man em ol i no save tingim ol yet tasol, na God i larim em i traim ol, tasol God i putim mak na Satan i no inap kalapim.’ Tru tumas, Jehova i narapela kain tru long Satan!—Jop 1:6-12; 2:1-7.
2, 3. (a) Olsem wanem insait bilong dispela tok “Satan” i kamap klia tru long samting i bin painim Jop? (b) Olsem wanem Baibel i soim olsem Satan i wok yet long sutim tok long ol wokboi bilong Jehova long graun?
2 Long tok Grik, dispela tok “Satan” i olsem “man bilong sutim tok giaman long narapela,” o “man bilong bagarapim gutnem bilong narapela.” Buk Jop i kamapim klia olsem Satan i sutim tok long gutpela wokboi bilong God, em Jop, olsem em i tingim skin bilong em yet na long dispela as tasol em i mekim wok bilong God. Satan i tok: “Yu ting bai Jop i aninit long yu sapos em i no kisim wanpela samting long han bilong yu, a?” (Jop 1:9) Dispela stori long Buk Jop i soim olsem maski Jop i kisim bikpela hevi na traim, em i go klostu moa yet long Jehova. (Jop 10:9, 12; 12:9, 10; 19:25; 27:5; 28:28) Taim bikpela hevi bilong em i pinis, em i tokim God: “Bipo mi bin harim tok bilong ol man tasol na mi kisim save long yu. Tasol nau mi lukim yu stret long ai bilong mi yet.”—Jop 42:5.
3 Orait, bihain long taim bilong Jop, yu ting Satan i lusim pasin bilong sutim tok long ol gutpela wokboi bilong God? Nogat. Buk Kamapim Tok Hait i soim yumi, nau long taim bilong las de, Satan i wok yet long sutim tok long ol brata bilong Krais em God i bin makim, na em i mekim olsem tu long ol gutpela poroman bilong ol. (2 Timoti 3:12; KTH 12:10, 17) Olsem na yumi olgeta Kristen tru i mas stap aninit long God Jehova, em i save tingim tru yumi, na yumi mas mekim wok bilong em long wanem yumi laikim em tru, na long dispela rot yumi kamapim klia olsem tok Satan i sutim long yumi i giaman tasol. Sapos yumi mekim olsem, bai yumi mekim bel bilong Jehova i amamas.—Sindaun 27:11.
Jehova i Laik Helpim Yumi
4, 5. (a) Jehova i laik painim wanem samting long graun, na dispela i narapela kain long pasin bilong Satan? (b) Bilong Jehova i ken orait long yumi, yumi mas mekim wanem?
4 Satan i save raun long olgeta hap graun bilong painim rot bilong sutim tok long wanpela man na kaikaim em. (Jop 1:7, 9; 1 Pita 5:8) Tasol Jehova i narapela kain. Em i laik painim rot bilong helpim ol man em ol i mas kisim strong long em. Profet Hanani i tokim King Asa: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.” (2 Stori 16:9) Em nau, pasin bilong Satan long sutim tok long man i narapela kain tru long pasin bilong Jehova long tingim tru ol man!
5 Jehova i no save lukstil long yumi bilong painim olgeta popaia na pasin kranki bilong yumi. Man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu?” (Song 130:3) Yumi ken tok, i no gat wanpela. (Saveman 7:20) Sapos yumi givim bel tru long Jehova na i go klostu long em, ai bilong em bai stap long yumi, tasol i no bilong kotim yumi, nogat; em i laik lukim wok bilong yumi na harim ol beten yumi mekim bilong kisim helpim na bilong askim em long lusim ol rong bilong yumi. Aposel Pita i tok: “Bikpela i save lukautim ol stretpela manmeri, na em i save putim yau long ol beten bilong ol. Tasol Bikpela i no save laikim ol manmeri nogut.”—1 Pita 3:12.
6. Stori bilong samting i bin painim Devit, olsem wanem em i mekim gut bel bilong yumi na em i olsem wanpela tok lukaut tu?
6 Devit em man bilong graun tasol na em i bin mekim bikpela rong tru. (2 Samuel 12:7-9) Tasol em i kamapim bel bilong em long Jehova na beten strong long em bilong i go klostu long em. (Song 51:1-12, het-tok bilong en) Jehova i harim beten bilong em na lusim rong bilong em, tasol ol hevi i painim Devit long dispela rong em i mekim. (2 Samuel 12:10-14) Dispela stori i mas mekim gut bel bilong yumi na em i mas i stap olsem wanpela tok lukaut tu. Taim yumi save, Jehova i amamas long lusim ol rong bilong yumi sapos yumi tanim bel tru, dispela i mekim gut bel bilong yumi, tasol taim yumi save olsem yumi inap karim ol bikpela hevi tru long ol rong yumi mekim, em nau, yumi save tingting gut. (Galesia 6:7-9) Sapos yumi laik i go klostu long Jehova, yumi mas i stap longwe tru long ol samting em i no save laikim.—Song 97:10.
Jehova i Save Bringim Lain Bilong Em i Kam Long Em
7. Jehova i save lukluk long wanem kain man? Olsem wanem em i save bringim ol i kam long em?
7 Long wanpela song bilong em, Devit i tok: “Bikpela, yu stap antap tru na yu nambawan, tasol yu save tingting long ol manmeri i no bikhet. Na ol bikhetman tu i no inap hait long yu.” (Song 138:6) Na narapela song i wankain liklik, em i tok: “I no gat wanpela man i olsem God, Bikpela bilong yumi. Em i stap antap tru. Em i save lukluk i kam daun na lukim heven na graun wantaim. Em i save helpim ol rabisman na ol i no i stap nogut moa. Ol i stap gut tasol.” (Song 113:5-7) Yes, Man bilong wokim heven na graun, em i gat olgeta strong, em i save lukluk i kam daun long graun na ai bilong em i save lukim “ol manmeri i no bikhet,” na “ol rabisman,” na ol manmeri i “bel nogut na i wari long olgeta dispela pasin nogut” ol man i save mekim. (Esekiel 9:4) Long rot bilong Pikinini bilong em, em i save bringim ol kain man olsem i kam long em. Taim Jisas i stap long graun em i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.”—Jon 6:44, 65.
8, 9. (a) Bilong wanem yumi olgeta i mas i kam long Jisas? (b) Wanem samting i mekim na yumi kirap nogut long God i bin stretim rot bilong givim ofa bilong baim bek ol man?
8 I stret olgeta man i mas i kam long Jisas na bilip long ofa bilong em, long wanem, ol i stap sinman yet taim mama i karim ol, na ol i stap longwe long God. (Jon 3:36) Ol i mas kamap wanbel wantaim God. (2 Korin 5:20) God i no bin wetim ol sinman i krai long em bilong em i ken wokim rot bambai ol inap i stap wanbel wantaim em, nogat. Aposel Pol i tok: “Yumi stap yet olsem ol manmeri bilong mekim sin, na Krais i dai bilong helpim yumi. . . . Taim yumi stap yet olsem birua bilong God, Pikinini Bilong God i dai bilong pinisim pasin birua na mekim yumi i kamap wanbel wantaim God. . . . Na yumi ol man i stap wanbel wantaim God i ken save tru, long laip bilong dispela Pikinini, God bai i kisim bek yumi.”—Rom 5:8, 10.
9 Aposel Jon i strongim dispela gutpela tok i tru olsem God i laik kamap wanbel wantaim ol man. Em i tok: “God i gat wanpela Pikinini tasol, na em i salim dispela Pikinini i kam long graun, bai yumi kisim laip long em. Long dispela pasin God i soim yumi olsem em i laikim yumi tru. . . . Yumi no ken ting, yumi bin laikim God pastaim. Nogat. God i laikim yumi pastaim. Olsem na em i bin salim Pikinini Man bilong en i kam long graun bilong lusim ol sin bilong yumi.” (1 Jon 4:9, 10) God yet i bin kirap pastaim long mekim ol samting bambai yumi ken kamap wanbel wantaim em—yumi ol man, nogat. Em nau, ating yu laik i go klostu tru long wanpela God em i bin laikim tumas ol ‘sinman’ em ol i stap olsem “birua,” a?—Jon 3:16.
Yumi Mas Wok Long Painim Jehova
10, 11. (a) Yumi mas mekim wanem bilong painim Jehova? (b) Yumi mas ting olsem wanem long dispela graun bilong Satan?
10 Yumi save, Jehova i no save subim yumi long kam long em, nogat. Yumi mas “wok long painim em. Tasol em i no i stap longwe long yumi olgeta wan wan.” (Aposel 17:27) Yumi mas save, i stret Jehova i tok yumi mas daun long em. Disaipel Jems i tok: “Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe. Yupela i mas i go klostu tru long God, na em bai i kam klostu tru long yupela. Yupela man bilong sin, bel bilong yupela i mas kamap klin, olsem man i wasim han bilong en na i kamap klin. Yupela man i gat tupela tingting, yupela i mas rausim dispela tingting nogut long bel bilong yupela.” (Jems 4:7, 8) Yumi mas sanap strong na sakim Satan na stap aninit long Jehova.
11 Bilong mekim olsem, yumi mas i stap longwe long pasin bilong dispela graun em Satan i bosim. Jems i tok moa olsem: “Harim. Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.” (Jems 4:4) Em nau, sapos yumi laik i stap pren bilong Jehova, yumi mas save, ol lain bilong dispela graun bilong Satan bai birua long yumi.—Jon 15:19; 1 Jon 3:13.
12. (a) Devit i mekim wanem tok i strongim bel bilong yumi? (b) Jehova i mekim wanem tok lukaut long rot bilong profet Asaria?
12 Taim ol lain bilong dispela graun bilong Satan i biruaim yumi long wanpela samting, yumi mas beten long Jehova na askim em long helpim yumi. Planti taim Devit i bin pilim olsem Jehova i bin kisim em bek long han bilong ol birua, olsem na bilong strongim bel bilong yumi, em i tok: “Wanem ol manmeri i save bel tru na i singaut long em [Jehova], em i save stap klostu long ol. Wanem ol manmeri i save pret long em, . . . em i save harim krai bilong ol na kisim bek ol. Em i save was gut long ol manmeri i save laikim em tru. Tasol em bai i bagarapim ol manmeri i save mekim pasin nogut.” (Song 145:18-20) Dispela song i soim yumi olsem, taim wanpela traim i painim yumi wan wan, Jehova inap tru long kisim bek yumi long dispela traim, na tu, em bai kisim bek olgeta manmeri bilong em wantaim long taim bilong “bikpela hevi” tru. (KTH 7:14) Jehova bai stap klostu long yumi sapos yumi stap klostu long em. “Spirit bilong God” i stiaim tingting bilong profet Asaria na em i mekim wanpela tok i tru em i stret long yumi olgeta i ken bihainim, em i tok: “Sapos yupela i stap klostu long Bikpela, orait bai em i stap wantaim yupela. Na sapos yupela i wok long painim em, orait bai yupela inap i kam klostu long em. Tasol sapos yupela i givim baksait long em, orait bai em i givim baksait long yupela.”—2 Stori 15:1, 2.
Yumi Mas Tingim Jehova i Stap Tru Tru
13. Olsem wanem yumi ken soim olsem yumi tingim Jehova i stap tru tru?
13 Aposel Pol i stori long Moses na i tok: “Moses i mekim wankain pasin olsem man i bin lukim God, na em i stap strong tru.” (Hibru 11:27) Tru yumi save, Moses i no bin lukim Jehova long wanpela taim. (Kisim Bek 33:20) Tasol Moses i tingim Jehova i stap tru tru, na dispela i mekim na i olsem Moses i lukim Em tru long ai bilong em. Na i wankain tu long Jop—taim ol hevi na traim bilong em i pinis, strongpela bilip bilong em i mekim na i olsem em i lukim Jehova klia moa, olsem wanpela God i save larim ol traim i painim ol gutpela wokboi bilong em, tasol em i no save lusim ol. (Jop 42:5) Baibel i tok long Enok na Noa olsem ol i “pren tru bilong God.” Bilong i stap olsem, ol i wok long mekim ol samting God i laikim na ol i bihainim tok bilong em. (Stat 5:22-24; 6:9, 22; Hibru 11:5, 7) Sapos yumi tu i tingim Jehova i stap tru tru, olsem Enok, Noa, Jop, na Moses i bin mekim, bai yumi “tingting strong” long Em long olgeta samting yumi mekim, na em bai “soim [yumi] stretpela rot long bihainim.”—Sindaun 3:5, 6.
14. Wanem insait bilong dispela tok “holimpas strong” long Jehova?
14 Taim ol Israel i redi long go insait long Graun Bilong Promis, Moses i tokim ol: “Yupela i mas aninit long Bikpela na bihainim em. Na yupela i mas harim tok bilong em na bihainim ol lo bilong em, na lotu long em na holimpas strong long em.” (Lo 13:4) Ol i mas bihainim Jehova, pret long em, bihainim tok bilong em, na holimpas strong long em. Wanpela saveman bilong Baibel i stori long dispela tok ol i tanim olsem “holimpas strong” na em i tok, ‘long tok Hibru dispela tok i makim olsem man i pas gut long God olsem pren bilong em.’ Man bilong raitim song i tok: “God em i pren tru bilong ol manmeri i save stap aninit [olsem pret] long em.” (Song 25:14) Yumi tu inap pas gut long Jehova sapos yumi tingim em i stap tru tru na yumi laikim em tumas na yumi pret long mekim wanpela samting em i no save laikim.—Song 19:9-14.
Yu Save Olsem Jehova i Tingim Yu?
15, 16. (a) Olsem wanem Song 34 i soim olsem Jehova i save tingim yumi? (b) Sapos yumi hatwok long tingim bek ol gutpela pasin Jehova i bin mekim long yumi, orait yumi mas mekim wanem?
15 Wanpela trik bilong Satan, em i laik bai yumi lusim tingting olsem oltaim God bilong yumi, Jehova, i save was long ol gutpela wokboi bilong em. King Devit bilong Israel i save tru olsem Jehova i bin lukautim em, na Jehova i mekim olsem tu long taim nogut bilong birua i bin painim Devit. Wanpela taim em i sanap long ai bilong King Akis bilong Get na em i mas mekim olsem em i longlong, na em i raitim wanpela gutpela song tru bilong dispela na sampela tok bilong en i kamapim strongpela bilip bilong em, olsem: “Yumi tokaut long biknem bilong God. Yumi litimapim nem bilong em. Mi bin beten long Bikpela bai em i helpim mi, na em i harim prea bilong mi. Em i rausim olgeta pret long bel bilong mi, na nau mi stap bel isi. Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap. Bikpela i save mekim gutpela pasin long yumi. Yupela yet i mas traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru. God i save stap klostu long ol manmeri i gat hevi. Na em i save helpim ol manmeri bilip bilong ol i bagarap. Planti hevi i save kamap long stretpela man, tasol Bikpela i save helpim em na ol dispela hevi i no daunim em.”—Song 34:3, 4, 7, 8, 18, 19; 1 Samuel 21:10-15.
16 Olsem wanem? Yu bilip tru long strong bilong Jehova long kisim bek yu long taim nogut? Yu save olsem ol ensel bilong em i lukautim yu? Yu bin traim na lukim olsem Jehova i save mekim gutpela pasin long yumi? Wanem laspela taim yu bin pilim tru olsem Jehova i mekim gutpela pasin long yu? Traim long tingim bek. Wanpela taim yu bin autim tok long laspela haus na skin bilong yu i les na yu pilim olsem yu no inap wok moa? Ating em dispela taim, a? Ating yu bin stori gut tru wantaim man bilong haus. Orait yu bin tok tenkyu long Jehova, em i bin givim hap strong moa long yu bilong autim tok long dispela haus na em i givim gutpela pe long yu? (2 Korin 4:7) Tasol ating yu hatwok liklik long tingim bek wanpela taim Jehova i bin mekim gutpela pasin tru long yu bilong helpim yu. Ating yu mas tingting i go bek inap wanpela wik, o wanpela mun, o wanpela yia samting. Sapos olsem, orait yu ken wok strong long i go klostu moa long Jehova na save long olsem wanem em i save stiaim yu na soim rot long yu, a? Aposel Pita i tokim ol Kristen: “Yupela i mas daunim laik bilong yupela yet na stap aninit long strongpela han bilong God. . . . God i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:6, 7) Tru tumas, Jehova i save tingim yu tru!—Song 73:28.
Wok Yet Long Painim Jehova
17. Yumi mas mekim wanem bambai yumi ken wok yet long painim Jehova?
17 Oltaim yumi mas wok long pas gut wantaim Jehova. Jisas i beten long Papa bilong em na i tok: “Bilong kisim laip i stap oltaim oltaim, ol i mas wok long kisim save long yu, yu wanpela tasol yu God tru, na long man yu bin salim i kam, em Jisas Krais.” (Jon 17:3, NW ) Bilong kisim save long Jehova na Pikinini bilong em, oltaim yumi mas wok strong. Yumi mas beten na yumi mas kisim spirit holi bilong helpim yumi long save long “olgeta tingting hait bilong God.” (1 Korin 2:10; Luk 11:13) Na tu, “wokboi i gat gutpela tingting” i mas stiaim yumi bambai yumi ken kisim ol kaikai bilong spirit “long taim bikman i makim.” (Matyu 24:45) Long rot bilong dispela “gutpela wokboi,” Jehova i bin tokim yumi long ritim Baibel long olgeta de, na go oltaim long miting, na givim bel long autim “gutnius bilong kingdom.” (Matyu 24:14) Sapos yumi mekim olsem, bai yumi wok long painim dispela God i save tingim yumi, em Jehova.
18, 19. (a) Yumi mas strong long mekim wanem? (b) Sapos yumi sanap strong na sakim Satan na yumi wok long painim Jehova, bai yumi kisim wanem ol blesing?
18 Satan i wok strong tru long kirapim ol man long mekim nogut long lain bilong Jehova na birua long ol na putim hevi long ol. Em i laik bagarapim bel isi bilong yumi na pasin bilong yumi long i stap gut long ai bilong God. Em i no laik bai yumi mekim yet wok bilong painim ol man i gat stretpela bel na helpim ol long kam long Jehova na helpim Em long bikpela tok em i mas stretim. Tasol yumi mas strong long i stap gut long Jehova, na bilip olsem em bai kisim bek yumi long han bilong dispela man nogut. Sapos yumi larim Tok Bilong God i stiaim yumi, na yumi wok strong wantaim oganaisesen bilong em long graun, yumi ken bilip tru olsem, long olgeta taim em bai i stap bilong helpim yumi.—Aisaia 41:8-13.
19 Olsem na oltaim yumi mas sanap strong na sakim Satan na ol pasin bilong trik na giaman em i save mekim, na wok oltaim long painim gutpela God bilong yumi, Jehova, em bai ‘strongim bilip bilong yumi na mekim yumi i sanap strong oltaim.’ (1 Pita 5:8-11) Olsem na bai yumi stap insait long sori bilong God na “wetim Bikpela bilong yumi Jisas Krais, bai em i kamapim sori bilong en long ples klia, na [yumi] bai i kisim tru laip bilong i stap gut oltaim oltaim.”—Jut 21.
Bai Yu Bekim Olsem Wanem?
• Wanem insait bilong dispela tok “Satan”? Olsem wanem Satan i save truim dispela nem bilong em?
• Olsem wanem Jehova i narapela kain long Satan long pasin bilong Em long lukluk i go long ol manmeri bilong graun?
• Bilong i go long Jehova, bilong wanem man i mas bilip long ofa bilong baim bek ol man?
• Wanem insait bilong dispela tok “holimpas strong” long Jehova? Olsem wanem yumi ken wok long painim em?
[Piksa long pes 15]
Maski Jop i karim ol bikpela hevi, bihain em i pilim tru olsem Jehova i tingim em
[Ol Piksa long pes 16, 17]
Pasin bilong ritim Baibel long olgeta de, go oltaim long ol miting Kristen, wok strong long autim tok, dispela i save kirapim gen tingting bilong yumi olsem Jehova i save tingim yumi