BEKIM OL ASKIM BILONG BAIBEL
I gat gutpela samting bai painim ol man i dai pinis?
Dai i olsem slip, taim ol man i dai ol i no gat tingting moa na ol i no inap mekim wanpela samting. Tasol Man Bilong Wokim yumi inap givim bek laip long ol man i dai pinis long rot bilong kirapim bek ol. God i kamapim klia dispela samting long rot bilong givim strong long Jisas long kirapim bek sampela man i dai pinis.—Ritim Saveman 9:4, 5; Jon 11:11, 43, 44.
Olsem wanem dai i olsem slip?
God i promis olsem ol manmeri i dai pinis em ol i stap long tingting bilong em, ol bai kirap bek na kisim laip long nupela taim we stretpela pasin tasol bai stap long en. Ol man i dai pinis bai stap long matmat inap long God i kirapim bek ol na givim laip gen long ol. God i Gat Olgeta Strong i gat laik tru long yusim strong bilong em long givim bek laip long ol man i dai pinis.—Ritim Jop 14:13-15.
Kirap bek bai olsem wanem?
Taim God i kirapim bek ol man i dai pinis, ol bai luksave long ol yet, na tu, ol bai luksave long ol pren na famili bilong ol. Taim man i dai, bodi bilong em i sting na tanim i kamap graun gen, tasol God inap kirapim em bek na givim nupela bodi long em.—Ritim 1 Korin 15:35, 38.
I gat liklik lain tasol em ol bai kirap bek na kisim laip long heven. (Revelesen 20:6) Planti manmeri i kirap bek em ol bai kisim laip long Paradais bai kamap bek gen long graun. Ol bai statim nupela laip na ol inap wet long kisim laip i stap gut oltaim oltaim.—Ritim Song 37:29; Aposel 24:15.