Kisim Skul Long Tok Bilong God
I Gat Gutpela Samting Bai Painim Ol Man i Dai Pinis?
Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.
1. Wanem gutpela samting bai painim ol man i dai pinis?
Taim Jisas i kamap long Betani klostu long Jerusalem, pren bilong em Lasarus i dai inap 4-pela de pinis. Jisas i go long matmat wantaim Marta na Maria, tupela susa bilong man i dai pinis. I no longtaim na planti manmeri i kam bung. Yu inap piksaim long tingting amamas bilong Marta na Maria taim Jisas i kirapim bek Lasarus na em i kisim laip gen?—Ritim Jon 11:20-24, 38-44.
Marta i bilip olsem ol man i dai pinis ol bai kirap bek. Longtaim pinis ol gutpela wokboi bilong Jehova i save olsem bihain God bai kirapim bek ol man i dai pinis na ol bai kisim laip long graun.—Ritim Jop 14:14, 15.
2. Ol man i dai pinis ol i stap olsem wanem?
Tru, strong bilong laip, olsem “win,” i mekim na yumi ol man na ol animal i stap laip, tasol yumi no ol spirit i stap insait long wanpela bodi. (Saveman 3:19; Stat 7:21, 22) God i kisim graun na wokim yumi na yumi stap laip. (Stat 2:7; 3:18, 19) Taim kru bilong yumi i dai, tingting bilong yumi i pinis. Olsem na taim Lasarus i kirap bek, em i no mekim wanpela tok long samting i painim em taim em i dai pinis, long wanem, taim man i dai em i no gat moa tingting na save.—Ritim Song 146:4; Saveman 9:4, 5, 10.
I klia tru olsem taim man i dai pinis em i no pilim pen samting, nogat. Olsem na dispela bilip olsem God i save givim pen oltaim long ol man i dai pinis, em i bilip giaman. Dispela i nogutim nem bilong God. Dispela tingting bilong givim pen long ol man long ples paia, em samting God i nolaik tru long en.—Ritim Jeremaia 7:31.
3. Yu ting yumi inap toktok wantaim ol man i dai pinis?
Ol man i dai pinis i no inap toktok. (Song 115:17) Tasol taim ol ensel nogut i toktok long ol man, ol inap giamanim ol man na bai ol i ting olsem spirit bilong daiman i toktok long ol. (2 Pita 2:4) Jehova i tambuim pasin bilong painim rot bilong toktok wantaim ol daiman.—Ritim Lo 18:10, 11.
4. Husat bai kirap bek?
Long nupela taim klostu nau bai kamap, planti milion manmeri i stap long matmat ol bai kirap bek na kisim laip. Sampela man i bin mekim pasin nogut, long wanem, ol i no save long Jehova, ol tu bai kirap bek.—Ritim Luk 23:43; Aposel 24:15.
Ol man i kirap bek ol bai inap long kisim stretpela save long God, na long rot bilong bihainim tok bilong Jisas ol bai kamapim olsem ol i bilip long Jisas. (Revelesen 20:11-13) Ol manmeri husat i kirap bek na i bihainim gutpela pasin, ol bai kisim laip oltaim long graun. Tasol sampela husat i kirap bek bai mekim yet pasin nogut. Kirap bek bilong ol em olsem ‘kirap bek bilong kisim kot.’—Ritim Jon 5:28, 29.
5. Kirap bek i givim wanem save long yumi long Jehova?
Ol man inap kirap bek, long wanem, God i bin salim Pikinini bilong em bilong givim laip bilong em long baim bek yumi. Dispela i kamapim pasin laikim na bikpela pasin helpim bilong Jehova.—Ritim Jon 3:16; Rom 6:23.
Bilong kisim sampela save moa, lukim sapta 6 na 7 bilong dispela buk, em ol Witnes Bilong Jehova i wokim. Tru Tru Baibel i Tok Wanem? God i kisim graun na wokim Adam
[Piksa long pes 16]
God i kisim graun na wokim Adam