Yu Tingim Yet?

Olsem wanem? Yu bin ritim gut ol tok bilong ol nupela Wastaua? Yu ken traim bekim ol dispela askim i stap daunbilo:

Wanem taim Jisas i “autim tok long ol spirit i stap long kalabus”? (1 Pita 3:19)

I luk olsem bihain liklik long taim Jisas i kirap bek, em i givim strongpela tok long ol spirit nogut olsem ol bai kisim strafe i stret long rong ol i bin mekim.—6/15, pes 23.

Wanem 3-pela rot bilong helpim namba 2 marit long wok gut?

Ol dispela rot em olsem: no ken tingim tumas fes marit na dispela i putim hevi long marit bilong yu long nau; bung wantaim ol olpela pren husat i no save long nupela poroman bilong yu; trastim nupela poroman marit maski sapos olpela poroman marit i no stap gut long yu.—7/1, pes 9-10.

Wanem taim bai Jisas i skelim ol man olsem ol sipsip na ol meme? (Mat. 25:32)

Jisas bai mekim dispela wok taim em i kam na stap olsem Jas na skelim olgeta man long taim bilong traipela hevi tru, bihain long ol lotu giaman i bagarap.—7/15, pes 6.

Tok piksa bilong wit na gras nogut i stori long ol man bilong sakim lo. Orait wanem taim bai ol man bilong sakim lo i sikirapim tit bilong ol? (Mat. 13:36, 41, 42)

Ol bai sikirapim tit bilong ol long taim bilong traipela hevi tru, taim ol i luksave olsem i no gat rot long abrusim bagarap.—7/15, pes 13.

Tok bilong Jisas long gutpela wokboi i gat savetingting i kamap tru long wanem taim? (Mat. 24: 45-47)

Dispela tok i no bin kamap tru long Pentikos 33 C.E., nogat, em i kamap tru bihain long 1914. Long 1919, Jisas i makim dispela wokboi long lukautim ol arapela wokboi. Ol arapela wokboi em olgeta Kristen husat i kisim kaikai bilong strongim ol long pas gut wantaim God.—7/15, pes 21-23.

Wanem taim Jisas i makim gutpela wokboi long lukautim olgeta samting bilong em?

Dispela bai kamap long bihain, long taim bilong traipela hevi tru, taim gutpela wokboi i kisim pe bilong em long heven.—7/15, pes 25.

Yu ting Baibel i no kolim nem bilong sampela man, long wanem, ol i man nogut o ol i samting nating tasol?

Yumi no ken kisim kain tingting olsem. Baibel i no kolim nem bilong sampela gutpela man na sampela man nogut. (Rut 4:1-3; Mat. 26:18) I gat planti gutpela ensel, tasol Baibel i kolim nem bilong 2-pela gutpela ensel.—8/1, pes 10.

Taim 230 Witnes i lusim banis kalabus nogut bilong Sachsenhausen na mats i go, strong bilong God na wanem samting moa i bin helpim ol?

Bikpela hangre na sik i pinisim strong bilong ol, tasol ol i wok yet long strongim narapela narapela.—8/15, pes 18.

Bilong wanem stori bilong lain Israel i brukim wara Jordan na go insait long Graun Bilong Promis i strongim tru yumi?

Maski wara i bin tait, Jehova i stopim wara na bai ol manmeri i ken i go long hapsait bilong wara. Dispela i strongim ol long bilip long em na trastim em, na dispela stori inap strongim yumi tu.—9/15, pes 16.

Planti taim Baibel i save kolim ol kala, na dispela i kamapim klia wanem samting?

Dispela i kamapim klia olsem God i save olsem kala inap kirapim tingting na bel bilong ol man na kala inap kirapim yumi long tingim ol samting.—10/1, pes 14-15.

Olsem wanem tok profet bilong Maika 5:5 long ol strongpela lida i kamap tru long nau?

Yumi save olsem “ol strongpela lida tru” em Maika 5:5 i kolim i makim ol elda long kongrigesen. Baibel i tok profet olsem birua bai painim lain bilong God long bihain, olsem na ol dispela strongpela lida i helpim lain bilong God long stap redi.—11/15, pes 20.

Wanem sampela samting i mekim na yumi nidim God?

Yumi nidim ol gutpela stiatok na bekim bilong ol askim bilong ol hevi bilong yumi na God tasol inap givim ol dispela samting. Em i givim ol samting bilong helpim yumi long stap gut na stap amamas, na em bai kamapim dispela samting taim em i truim ol tok promis bilong em i stap long Baibel.—12/1, pes 4-6.